अघिल्लाेचाेटी माओवादीबाट उठ्न नपाएकी मञ्जली एमालेबाट बनिन् ललितपुरकाे उपमेयर उम्मेदवार

अघिल्लाेचाेटी माओवादीबाट उठ्न नपाएकी मञ्जली एमालेबाट बनिन् ललितपुरकाे उपमेयर उम्मेदवार

A+ A A-

नेकपा एमालेबाट ललितपुर महानगरको उपमेयरमा मञ्जली शाक्य बज्राचार्यले सोमबार उम्मेदवारी दर्ता गराइन् । उम्मेदवारी दर्ता गराउन आएका उम्मेदवारहरूले मुख्य निर्वाचन अधिकृतको कार्यालयको प्राङ्गण खचाखच थियो । उत्सवमय थियो, माहाेल । उम्मेदवारहरूको घाँटीमा माला र अनुहार अबिरले रङ्गिएको थियो । पञ्चेबाजा, झाँकी, नाराजुलुसको चर्को ध्वनि । तर, मञ्जलीको घाँटीमा न माला थियो, न अनुहारमा अबिर नै ।

‘शोकमा छु नि !,’ उनले सुस्तरी भनिन् । उनको मोबाइलमा बधाई र शुभकामनाका घण्टी बजिरहेका थिए । प्राङ्गणमा रहेका शुभचिन्तकले पनि उनलाई घेरिरहेका थिए । ‘तीन दिन भयो मामाघरको हजुरबुबा बित्नु भएको,’ शाक्यले शोकको कारण खुलाइन् । चुनावी चटारोले उनलाई शोक भनेर घरमा बस्ने अबस्था भएन ।

सुभ्रपा शाक्य एमालेबाट ललितपुर महानगरकी एक्लाे महिला वडाध्यक्ष उम्मेदवार

रोचक त के छ भने, गत २०७४ सालको स्थानीय तहको निर्वाचनमा उनलाई माओवादी केन्द्रले उपमेयरको उम्मेदवार बनाउने निर्णय गरेकाे थियाे । तर, मतदाता नामावलीमा नाम नभएका कारण उम्मेदवारी दर्ता गराउन पाएकी थिइनन् । यो पटक उनको मतदाता नामावलीमा नाम छ । उपमेयरकै उम्मेदवार छिन् तर भिन्न पार्टी एमालेबाट ।

एमाले र माओवादी मिलेर बनेको नेकपा अदालतको आदेशपछि अलग हुँदा उनी नेकपाकाे निरन्तरताभन्दै एमालेमै बसिन् । उनी रामबहादुर थापा बादलनिकट मानिन्छन् । २०५६ सालदेखि उनी माआवादी आन्दोलनमा होमिएकी थिइन् । माओवादीले आफ्नो सिद्धान्त छोडेकाले एमालेमै बसेको तर्क गर्छिन् उनी । ‘माओवादीले आफ्नो कार्यदिशा र सिद्धान्त बाँकी राखेको भए सायद माओवोदीमै हुन्थेँ । माओवादी दक्षिणपन्थीमा लागेकाले एमालेमै रहेकी हुँ,’ उनले भनिन् ।

'जनयुद्ध'कालमा भूमिगत भएकी उनले पुरानो घाउ भने कोट्याउन चाहिनन् । ‘जनयुद्धको धेरै ठाउँमा परेको छु । राजनीतिक करियर त्यहीँ बनेको हो । विगतको इतिहास हो । तर, अहिले कोट्याउनुको अर्थ छैन,’ उनी भन्छिन् ।

पुराना दिनलाई बिर्सेर उनी यतिबेला एमालेबाट उपमेयरमा जित्ने लडाइँमा छिन् । उनी मतदाताप्रति विश्वस्त देखिन्छिन् । ‘अरु उम्मेदवारले घोषणापत्र र प्रतिबद्धतापत्र ठेलीका ठेली बनाउँछन्, मसँग ठेली छैन । जनताको माझमा छु । जनताको समस्या थाहा छ । महानगरभित्र शिक्षा, स्वास्थ्य, रोजगारीको समस्या छ । महिलालाई उद्यमशील बनाउने र महानगरलाई समृद्ध बनाउने हो,’ उनी भन्छिन् ।