सुप्रभा शाक्य एमालेबाट ललितपुर महानगरकी एक्लाे महिला वडाध्यक्ष उम्मेदवार

सुप्रभा शाक्य एमालेबाट ललितपुर महानगरकी एक्लाे महिला वडाध्यक्ष उम्मेदवार

A+ A A-

ललितपुर महानगरपालिकाका २९ वटा वडामध्ये एमालेले वडाध्यक्षमा एक जना मात्र महिलालाई पत्यायाे । वडा १६ काे वडाध्यक्ष लड्ने माैका पाइन्, ४६ वर्षीया सुप्रभा शाक्यले । ०७४ काे चुनावमा ललितपुर- १६ मा उनले नै एमालेकाे साख जाेगाइदिएकी थिइन् ।

२९ वडामध्ये सबैभन्दा 'लाेकप्रिय मत'का साथ उनी सदस्यमा निर्वाचित भइन् । याे वडामा सुप्रभा एक्ली उम्मेदवार थिइन्, जसले एमालेबाट चुनाव जितिन् । वडाकाे मतदाता ८ हजार हुँदा उनले २१४७ मत पाएकी थिइन् । एमालेबाट वडाध्यक्षका उम्मेदवारलाई कांग्रेसका निर्मलरत्न शाक्यले हराएका थिए । यसपालि वडाकाे मतदाता ९ हजार बढी छ । सुप्रभाले उनै निर्मलरत्नलाई चुनाैती दिएकी छन् । कांग्रेसले निर्मलरत्नलाई नै चुनावी मैदानमा उतारेकाे छ ।

विश्व सम्पदा सूचीकाे गाेल्डेन टेम्पलदेखि कृष्ण मन्दिर, मंगलबजारका सम्पदासम्म रहेकाे यस वडा सांस्कृतिक विविधताले सम्पन्न मानिन्छ । त्यसैले सम्पदाकाे जगेर्नादेखि पर्यटन प्रवर्धनसम्मका एजेण्डा सुप्रभाले तय गरेकी छन् । बाटाे पिच गर्नु, चिटिक्क परेकाे कुनै भवन बनाउनुलाई मात्र विकास नठान्ने उनी आफूले जिते वडाबासीलाई खुसी बनाउनेगरी काम गर्ने बताउँछिन् । भन्छिन्, 'पूर्वाधार बनाउनु मात्र समृद्धि हाेइन, जनताकाे बाैद्धिकता विकास गर्ने, उनीहरूकाे जीवनयापनलाई सहज पार्ने, झन्झटरहित र चुस्त सेवाप्रवाह गर्न सक्नुपर्छ । तब जनताले विकासकाे अनुभूति गर्न पाउँछन् ।'

अघिल्लाेचाेटी माओवादीबाट उठ्न नपाएकी मञ्जली एमालेबाट बनिन् ललितपुरकाे उपमेयर उम्मेदवार

ललितपुर महानगरकाे कार्यपालिका सदस्य भएरसमेत काम गरेकी उनी चार सन्तानकी आमा हुन् । 'मेराे उम्मेदवारी ललितपुर महानगरका लागि एक सन्देश पनि हाे । अब महिलाहरू प्रमुख पदमा अघि सर्नुपर्छ । यसपालि म वडाध्यक्षमा अघि बढेँ । जितेँ र राम्राे काम गरेँ भने अर्काेपालि अरू थुप्रै महिला दिदीबहिनीले माैका पाउनुहुन्छ', उनले भनिन्, 'वडा मात्र नभएर देश नै हाँक्न महिलाहरू सक्षम छन् । अवसरचाहिँ पाउनुपर्छ ।'

उनी सरकारी जागिर छाेडेर राजनीतिमा हाेमिएकी थिइन् । ०७१ सालमा लिखित र माैखिक परीक्षा पास गरेर सामाजिक परिचालकका रूपमा जागिर खान थालेकी उनले ०७४ सालकाे चुनाव लड्न राजीनामा दिएकी थिइन् । भन्छिन्, 'जागिरका बेला जनतामाझ नै रहेर काम गरेकाले वडा सदस्य जितेँ । त्यसपछि त झन् जनताकाे दुखसुखमा सँगै छु, त्यसैले जित्नेमा ढुक्क छु ।'