सुनिताको अन्तर्वार्ता हेरेपछि ओलीले भेट्न बोलाए, उपमेयरको उम्मेदवार बनाए

A+ A A-

नेकपा एमालेले शनिबार काठमाडौं महानगरकाे उपमेयरमा सुनिता डंगोललाई उठाउने निर्णय गर्‍यो । एमालेले उपमेयरकाे टिकट दिनेमा दिउँसाेसम्म उनी ढुक्क थिइनन् । त्यसैले एमालेलगायत साना/ठूला दलसँग निरन्तर छलफलमै थिइन् । उनले एजेण्डा मिल्ने पार्टीकाे साथ खोजिरहेकी थिइन् ।

‘साना ठूला दलसँग छलफल गरिरहेकी थिएँ । एजेन्डा एमालेसँग बढी मिलिरहेको थियो,’ सुनिता भन्छिन्, ‘अन्तिम निर्णय नआएसम्म कुनै आशा हुँदैन ।’ शनिबार राति एमालेको निर्णय आयो- महानगरको उपमेयरमा सुनिता डंगोल ।

कसरी सम्भव भयो त ?

काठमाडौं महानगरको मेयरमा उठ्ने घोषणा गरेलगत्तै डंगोल चर्चामा आएकी थिइन् । उनले आठखम्बे विकासको मोडल र आफ्नो प्रतिबद्धतापत्र सार्वजनिक गरेपछि चर्चा चुलिँदो थियो । मिडियामा एकाएक उनी छाउन थालिन् । एक अन्तर्वार्तामा उनले भिजन भएको र मन पर्ने नेता केपी ओली भएको बताएकी थिइन् । त्यो कुरा ओलीको कानमा पुग्यो । र, ओलीले उनलाई भेटका लागि निम्ता दिए । ‘अध्यक्षज्यूले अन्तर्वार्ता हेर्नुभएको रहेछ । मेरो कुरा उहाँसम्म पुगेपछि भेट्ने निमन्त्रणा दिनुभयो,’ सुनिता भन्छिन् ‘पहिलो भेटमा ओलीसँग आफ्नो विचार खुलेर राखेँ ।’

भेटका क्रममा पदको विषयमा भन्दा पनि एजेन्डाका विषयमा छलफल भएको बताउँछिन् उनी । ‘पद लिनेदिने कुरा भएको थिएन । मेरो विचार राखेँ । हामीजस्तो युवाको कुरा सुन्नुपर्छ, समेट्नुपर्छ भनेँ । यसलाई बार्गेनिङका रूपमा नलिन पनि भनेँ,’ उनी भन्छिन्, उहाँ सकारात्मक हुनुभएकाे थियाे ।’

यता सत्ता गठबन्धनको किचलो, उता ‘युवासँग ओली’

स्थानीय चुनावमा युवाहरूको यस्तो ‘क्रेज’ देखेर नै ओलीले गत बुधबार ‘युवासँग म’ कार्यक्रम राखे । उक्त कार्यक्रममा पनि सहभागी भएकी थिइन्, डंगोल । गोदावरी भेलाले ओली र सुनिताको निकटता मात्र बढाएन, ओलीले सुनिताको मन पनि जिते । ‘युवासँग म कार्यक्रममा मेरो कुरा उहाँसँग स्पष्ट रूपमा राख्न पाएँ,’ उनी भन्छिन् ।

ओलीसँग आफ्नो एजेन्डा राखेपछि उनले एमालेको वडा, जिल्ला, प्रदेश र केन्द्रीय तहमा छलफल बढाउँदै गइन् । र, अन्ततः उनी उपमेयरको उम्मेदवार बन्न सफल भइन् । ‘एमालेले उपमेयरको उम्मेदवारमा विश्वास गर्‍यो । यो युवाहरूका लागि उपहार हो,’ उनी भन्छिन्, ‘पार्टीहरूले युवालाई अगाडि नसारिरहँदा एमालेले मूल्याङ्कन गरेर ल्याएको छ ।’

मेयरबाट उपमेयरको उम्मेदवार

स्वतन्त्र रूपमा मेयरमा उम्मेदवार घोषणा गरेकी सुनिताले पार्टीगत रूपमा आउने चाहना सुरुदेखि नै राख्दै आएकी थिइन् । ‘स्वतन्त्र रूपमा उम्मेदवारी दिने कुरा गरेको थिइनँ । म पार्टीगत रूपमा पनि आउन सक्छु भनेको थिएँ,’ उनी भन्छिन्, ‘पार्टीहरूले सक्षम युवालाई अगाडि बढाउनुपर्छ, अवसर दिनुपर्छ ।’

पदमा भन्दा काममा विश्वास गर्ने बताउँछिन् उनी । मेयरको उम्मेदवारबाट उपमेयरमा ‘डिमोसन’ भएको नबुझ्न सुझाउँछिन् उनी । ‘यसलाई डिमोसन भयो भनेर बुझ्नु हुँदैन । युवा जमात राजनीतिमा आउनुपर्छ भन्ने सन्देश दिएको छ,’ उनी भन्छिन् ।

के छ उनको विकासको मोडेल ?

२०११ कि मिस नेवा:समेत रहेकी सुनिताको काठमाडौंलाई सुन्दर, जीवन्त र सांस्कृतिक महानगर बनाउने योजना छ । पूर्वाधारको विकास, मेट्रो सिटी, स्मार्ट शौचालय, युवा, खेलकुद, रोजगारी तथा उद्यमशीलताको विकासलाई पनि उनले जोड दिएकी छिन् । महानगरको विकासका लागि अल्पकालीन, मध्यमकालीन र दीर्घकालीन योजनासमेत उनको छ । ‘काठमाडौंलाई सांस्कृतिक नगरमा विकास गर्ने हो । सबैले आ-आफ्नो ठाउँबाट योगदान पुर्‍याउनुपर्छ,’ उनी भन्छिन् ।

प्रकाशित मिति: आइतबार, वैशाख ११, २०७९ १३:४७