यता सत्ता गठबन्धनको किचलो, उता ‘युवासँग ओली’

A+ A A-

‘युवासँग म’ : जसले आयोजना गर्‍यो, निकै सुझबुझ र तयारीसाथ गर्‍यो । अरु दलहरूले पैसा खर्चेर चुनावी गीत निकाल्दै गर्दा एमालेले आज बुधबार गोदावरीमा आफ्नो निःशुल्क ब्रान्डिङ गर्‍यो । एमाले अध्यक्ष केपी ओली उपस्थित रहेको ‘युवासँग म’ मा एक जना महत्त्वाकांक्षी युवा वक्ताले त मुखै फोरे, ‘मार्केटिङभन्दा ब्रान्डिङ धेरै ठूलो कुरा हो ।’

एमालेले गरेको चलाखीपूर्ण यो ब्रान्डिङलाई निर्वाचन आयोगको आचारसंहितासमेतले छुन सक्दैन । कमल थापाले सूर्यमा भोट माग्दैमा यो ब्रान्ड भ्यालु घटिहाल्ला भनी पत्याउने कसरी ! अराजनीतिक भनिँदै आएको ठूलो, अनि नयाँ मतदाता समूहमा एमाले पहिल्यै पुगिसकेको देखिन्छ ।

युवा उद्यमी खेलाडी कलाकार आदिको गोदावरी भेलामा आज बुधबार एमाले समर्थित युवा र उद्यमीहरूले ओलीलाई आफ्नो ‘प्रोडक्ट’ कै रूपमा अघि सारे । युवा वक्तामध्ये अधिकांशले ओलीलाई भावी प्रधानमन्त्रीका रूपमा प्रस्तुत गरे । कतिले त अहिलेकै प्रधानमन्त्रीजस्तो गरी ‘सरकारले यो गरोस्, त्यो गरोस्’ बोले । ओली बोल्दाबोल्दै ‘केपी ओली आई लभ यु’ भनेर दर्शकदीर्घामा केटीहरू कराउनु कुन अनौठो कुरो भो ! मिडियाहरूमा निःशुल्क लाइभ भयो । शिलापत्र पछि पर्ने कुरै थिएन ।

एमालेको मुख्य प्रतिस्पर्धी कांग्रेस यतिबेला सत्तारुढ छ । आसन्न स्थानीय चुनावलाई लक्षित गर्दै माओवादी, एसलगायतसँग चुनावी गठबन्धनको तयारी गर्ने क्रममा ऊ भयंकर आन्तरिक किचलोमा फसेको छ । गगन थापा संयोजक रहेको चुनावी घोषणापत्र लेखन समितिमा मनोनीत भएबापत कांग्रेस कार्यकर्ताहरू बधाई खाएका खायै छन् । कार्यकर्ताहरू भने पार्टीका प्रदेश, जिल्ला कार्यालयहरूमा भोटेताल्चा झुन्ड्याउन थालेका छन् ।

कांग्रेस कार्यकर्ताले कास्की मुख्यालयमा ताला लगाउँदै स्वतन्त्र बागी उम्मेदवार उठाउने धम्की नेतृत्वसामु दिँदैगर्दा एमाले भने त्यहीँनेर आन्तरिक चुनावमार्फत उम्मेदवार टुंग्याउँदै छ । दोस्रो तहका नेताहरू राप्रपा नेपाल, परिवार दलजस्ता ठुटे पसलहरूसँग वार्तारत हुँदैगर्दा ओली आफ्नै योजनामा देखिन्छन् । प्रतिनिधिसभा विघटन गरेको, अनि जसपा लक्षित गरेर दलफुटाऊ अध्यादेश ल्याएको, सांसदै उठाएर ल्याएको लगायत प्रसंग अब राष्ट्रिय विस्मरणमा जाने लक्षण देखियो ।

पत्रकार र विश्लेषकले नयाँ गठबन्धनका कारण ०७४ को चुनावी मतभार कतापट्टि कोल्टिएला भनी दिमाग खियाउँदै गर्दा ओली भने नयाँ मतदातालाई सम्बोधन गर्न खोजिरहेका छन् भन्ने प्रस्टै बुझ्न सकिन्छ । योपल्टको एमाले प्रचार अभियानले ०६४ सालको पहिलो संविधानसभा चुनावमा माओवादीको प्रचार अभियान सम्झाइरहेको छ, जहाँ प्रचण्ड–बाबुराम भट्टराईहरू पूरै हावी थिए । अरु पूरै निरीह ।

बुधबार गोदावरीको सम्मेलन हलमा यस्तै एउटा हाइटेक युवा भेला भयो, जसलाई सहभागीहरूले इतिहासमै पहिलोपल्ट भनी ब्रान्डिङ गर्न चाहे । क्रिकेटर विनोद दासदेखि पाइलट उदीप श्रेष्ठसम्म, कलाकार राजा राजेन्द्र पोखरेलदेखि ‘मेमोरी किङ’ अर्पण शर्मालगायत सहभागी भएका थिए । ओलम्पियन दीपक विष्ट, अनि अन्तिममा ओलीकै आग्रहमा अपांगता भएकाहरूको तर्फबाट कलाधर भण्डारीसमेतको प्रस्तुति हेर्दा एमाले अरुभन्दा प्रचारात्मक कार्यमा अघि बढिसकेको आभास मिल्छ । राखेपका पूर्वसदस्यसचिव रमेश सिलवाललगायतको सक्रियतामा सञ्जय सिलवाल गुप्ता प्रस्तोता थिए ।

स्टार्ट–अप थालेका युवाहरू, अनि उल्टोसुल्टो हिँड्ने टाइपका नानाथरी रेकर्ड राख्दै हिँडेका युवाहरूले महत्त्वाकांक्षी योजनाहरू सुनाए । कतिपयका योजनाहरू असाध्यै उग्रराष्ट्रवादी, अनि क्षणवादी किसिमका पनि थिए । बोल्ने अधिकांश वक्ताले ओलीलाई सर्काउनुसम्म सर्काए । तर, तीमध्ये कतिपय युवाले सचेत हुँदै देशमा के चाहिएको छ, नयाँ पुस्ता के सोच्छ, राजनीतिले ती आकांक्षाहरू डेलिभर गर्न सक्छ कि सक्दैन भन्ने प्रसंगहरू उठाए । एयरपोर्टमै भ्रष्टाचार, अनि नयाँ कम्पनी खोलेर राज्यलाई कर तिर्न चाहने युवा उद्यमीलाई कसरी कम्पनी रजिस्ट्रार कार्यालयले अपमानित गर्छ भन्ने व्यथाहरूसमेत सुनाए, किन्तु यिनको सम्बोधन हिजो कसरी भएको थियो, भोलि कसरी होला ?

पूर्वप्रधानमन्त्री, अनि संसद्‌को ठूलो पार्टीको प्रमुखलाई विभिन्न क्षेत्रका युवाहरूसँग जोड्दा कतिपय प्रश्नहरू निर्देशित किसिमका पनि लाग्थे । ‘यो बोल्ने युवा नै हो र’ भनी शंका गर्न मिल्ने गरी प्रशंसाका पुलिन्दाहरू बर्सेका थिए, जसमा विकास, समृद्धि, राष्ट्रियता अनि नयाँ पुस्ताको एक्लो नायकका रूपमा ओलीलाई अघि सारिएको थियो । तीन वर्ष सरकार चलाउने क्रममा उनले गरेका राम्रा कामलाई जोडतोडले दोहोर्‍याइयो, तेहेर्‍याइयो । उनका कमजोरीबारे कसैले एक वाक्य बोलेन । ओली कमजोरीसहितका नेता हुन् । तन्नेरीहरूले व्यर्थै वायुमण्डलमा उचाले ।

अपांगता भएका कलाधर भण्डारीले बोल्ने सूचीको २० नम्बरमा पालो पाएका रहेछन् । तर, तिनको पालो अर्कैले मिच्यो । ओली त्यो दृश्य हेरिबसेका रहेछन् । आफ्नो बोल्ने पालोमा ओलीले तिनै भण्डारीलाई बोल्न दिए । अनि दुई वाक्य अंग्रेजी बोले । नयाँ पुस्ता अंग्रेजीमा बोल्न मन पराउँछ भन्ने उनको बुझाइ प्रकट भयो । तर, त्यसपछि ओलीले बोल्ने क्रममा तिनै पुराना कुराहरू बोले ।

जस्तो: ‘धर्तीको यो भूभाग सभ्यताको सुरुवात गर्ने भूभाग हो । साहित्य, संगीत, नृत्य यहाँबाट सुरु भएको थियो । यो ज्ञानलाई विस्तार गर्ने काम धर्तीको यसै भूभागमा भएको थियो । शैव, सांख्य, चार्वाक, लोकायत दर्शन, बुद्ध दर्शन, जैन दर्शन यही भूभागबाट पैदा भएका थिए । योगको सुरुवात यहीँबाट भएको थियो । औषधिविज्ञानको सुरुवात यहीँबाट भएको थियो । खगोलको अवस्थितिबारे अध्ययन यहीँबाट सुरु भएको थियो । म जेनेभा जाँदा त्यहाँको प्रयोगशालामा भास्कराचार्यको नाम देखेँ । सोह्रौँ शताब्दीमा न्युटनले भन्दा पहिले बाह्रौँ शताब्दीमा भास्कराचार्य द्वितीयले गुरुत्वाकर्षणको नियम पत्ता लगाइसकेका रहेछन् भन्ने थाहा भयो ।’

ओलीले अरु थपे: ‘हाम्रा पुर्खा विश्वका पहिला, आदिविद्वान्‌हरू थिए । हामी तिनका सन्तान भएकाले तिनको ज्ञानको जिन, जेनेटिक मेमोरी पावर हामीसँग छ । पुर्खाहरूको विरासतका कारण हाम्रो रगतमा परिश्रम र इमानदारी छ’ आदि इत्यादि ।

ओलीले अरु पनि थप्दै गए । आफू प्रधानमन्त्री छँदा बेला एकैदिन ३६० अस्पतालको शिलान्यास गरे पनि देउवा सरकारले त्यो काम रोकेको, सडक निर्माणको यस्तै परियोजना देउवा सरकारले रोकेको कुरा गरे । युवाहरूको मेहनत, ऊर्जा र सोचले आफू प्रभावित भएको कुरा गरे ।

गोदावरीको कार्यक्रम यावत् सीमाहरूबीच नवीन किसिमकै सुरुवात रह्यो, जसबाट अरु दलका अरु नेताहरूले समेत सिक्न सक्छन् । अनि समस्याहरूलाई समाधानसम्म लैजाने गरी राजनीतिले रचनात्मक पहल गर्न सक्छ । त्यो काम भने कति होला, प्रश्न त एमालेमाथि नै पनि गर्न सकिन्छ । तर, आसन्न तीन तहको चुनाव प्रचार अभियानमा एमालेको आक्रामकतालाई यसले थप गति दिन सकेको देखिन्छ । हुम्लादेखि ताप्लेजुङसम्मको ओलीको देशाटन यत्तिकै सुरु भएको होइन ।

हुन त ओलीलाई पनि आफ्नै खाले दबाब छ । माधव नेपाललगायत समकालीन सहकर्मीहरूलाई घर फर्कने कुनै मौका छैन । ओली आफ्नै प्रकारको गठबन्धनमा एक्लै छन् । अरु नेता पुरानो भोट जोडघटाउमा लाग्दा उनी नयाँ मतदाताहरू फकाउन लागिसके । आखिर ‘ब्रान्डिङ’ ठूलै कुरा हो ।

प्रकाशित मिति: बुधबार, वैशाख ७, २०७९ १७:५०