पार्टीले चार महिला सिफारिस गरेकाे थियाे, ओलीले सूचीमै नभएकी सुनिता डंगाेलकाे नाम लिए

पार्टीले चार महिला सिफारिस गरेकाे थियाे, ओलीले सूचीमै नभएकी सुनिता डंगाेलकाे नाम लिए

A+ A A-

नेकपा एमालेबाट काठमाडौं महानगरपालिकाको उपमेयरमा सुनिता डंगोलले मनोनयन दर्ता गराएकी छिन् । उनी यतिबेला मत माग्न मतदाताको घरदैलोमा छिन् । उनी एमालेकी त्यस्ती उम्मेदवार हुन्, जो हालसम्म पार्टीको साधारण सदस्यसमेत छैनन् ।

पार्टीको कुनै कमिटीबाट सिफारिसमा परेकी पनि होइनन्, सुनिता ।

काठमाडाैं महानगर कमिटीकाे सिफारिसमा परेका रत्न गुरुङ, शान्ति अधिकारी, पेम्बा लामा र मीना काफ्लेलाई उछिन्दै उनै सुनिताले उपमेयरकाे टिकट हात पारिन् । टिकट नपाएका गुरुङ, अधिकारी र लामा संविधानसभा सदस्यसमेत हुन् ।

कुनै पनि पार्टीमा नयाँ पुस्ताले अवसर पाउनु निश्चय नै राम्राे हाे । तर, त्यसले निर्धारित प्रक्रिया पार गर्नुपर्ने हुन्छ । सिफारिस भएकाबाट उम्मेदवार भएको भए राम्रो सन्देश जाने थियाे भन्छिन्, शान्ति अधिकारी । ‘सिफारिस भएकामध्येबाट आउनुपर्ने हो । साधारण सदस्य पनि नभएकोलाई बनाइयो । अचम्मै भाे । तर के गर्ने, अब पार्टीको निर्णयलाई मान्नैपर्छ,’ उनी भन्छिन्, ‘युवालाई अवसर दिन खोजिएको होला ।’ अधिकारी स्वयम् पनि २०३६ सालदेखि नै वाम आन्दोलनमा लागेकी महिला हुन् ।

संघर्षबाट खारिएका पार्टीमा लामो समय त्याग, योगदान दिएकालाई टिकट नदिएर अन्याय गरेको भन्दै एमालेवृत्तमा विवाद चुलिएको छ । तर, यसलाई नकार्छन् काठमाडौं महानगर कमिटीका अध्यक्ष निर्मल देउला । ‘सहमतिमै टिकट दिइएको हो । तल्लो कमिटीबाट सिफारिस भए पनि महानगरकाे हकमा निर्णय केन्द्रले गर्ने हो,’ उनी भन्छन्, ‘तल्लो कमिटीले उहाँको नाममा सहमति दिएको छ ।’

सिफारिसभन्दा बाहिरबाट अध्यक्ष केपी ओलीले सुनितालाई उम्मेदवार बनाउने निर्णय गरेको एमालेका असन्तुष्ट नेताहरू बताउँछन् । ‘अरू कसैले सिफारिस गरेको होइन, ओली आफैँले दिनुभएकाे हो । सिफारिसभन्दा बाहिरकोलाई टिकट दिँदा आश्चर्यमा परेका छौँ,’ सिफारिसमा परेका एक नेताले भने, ‘अहिले बोल्न पनि पाँइदैन । बोल्ने समय पनि छैन ।’

सुनिताको अन्तर्वार्ता हेरेपछि ओलीले भेट्न बोलाए, उपमेयरको उम्मेदवार बनाए

एमालेभित्र शक्तिशाली अध्यक्षकाे अभ्यास भइरहेकाले हुनुपर्छ, भरसक केपी ओलीको बोलीलाई अरुले काट्न सक्दैनन् । शनिबार एमालेको सचिवालय बैठकमा पनि त्यस्तै भयो । बैठकमा महानगर र उपमहानगरको मेयर र उपमेयरका उम्मेदवारको नाम छनोट हुँदै थियो । ‘काठमाडौं महानगरको उपमेयरमा ओलीले नै उहाँको नाम लिनुभयो । अरूले मौन समर्थन जनाए,’ एक नेताले भने ।

यसबारे सिफारिसमा परेका उम्मेदवारहरूले मिश्रित प्रतिक्रिया दिए । ‘पार्टीले नीतिअनुसार नै गरेको हो । सिफारिसभन्दा बाहिरबाट त आयो । पार्टी अध्यक्षले गरेको निर्णय हो । अनौठो र अप्ठ्यारो भएको छैन,’ सिफारिसमा परेकी मीना काफ्ले भन्छिन्, ‘पार्टीको कार्यकर्ता हुँ । पार्टीको निर्णयलाई मान्छु ।’ २०३६ सालदेखि वामपन्थी आन्दोलनमा लागेकी काफ्लेले सिफारिसमा परेर पनि टिकट पाउन सकिनन् ।

महानगरको उम्मेदवार छनोटमा समावेशी पनि नभएको भन्दै नेता/कार्यकर्ता असन्तुष्ट देखिएका छन् । ‘मेयर उपमेयर दुवै नेवार समुदायबाट भयो,’ एक नेताले भने, ‘उपमेयरको उम्मेदवारले पार्टीमा लगानी गरेको भए पनि ठीकै हो भन्न हुन्थ्यो । हाई प्रोफाइल पनि होइन ।’

सिफारिसमा परेकी अर्की उम्मेदवार रत्न गुरुङ समयको मागले युवापुस्तालाई टिकट दिइएको मत राख्छिन् । ‘हामी राजनीतिक आन्दोलनबाट आएका हौँ । राजनीतिक परिवर्तन गरायौँ, गणतन्त्र ल्यायौं,’ उनी भन्छिन्, ‘अब समृद्धिको लक्ष्य हो । आर्थिक समृद्धिका लागि युवापुस्तालाई खोजिएको हो । यो समयको माग हो ।’ उनी कम्युनिस्ट आन्दोलनमा लागेको ४० वर्ष बित्यो तर उनले पनि टिकट हात पार्न सकिनन् । ‘२०३६ सालको आन्दोलनका लागि घरबाट निस्किएको हो । ४० वर्ष बित्यो, कम्युनिस्ट आन्दोलनमा लागेको,’ उनी भन्छिन् ।

पार्टीले जित्ने अभियान लिएका कारण युवालाई अगाडि सारिएको बताउँछिन् सिफारिसमा परेकी पेम्बा लामा । ‘पार्टीमा सबैको योगदान छ । अहिले पार्टीले जित्ने अभियान लिएको छ । यसलाई हामीले स्वीकार गर्नुपर्छ,’ उनी भन्छिन्, ‘ महिला नै आउनुभएको छ, ठीकै छ ।’ २०४१ सालदेखि उनी पार्टीमा संघर्ष गर्दै आएकी छिन् । निर्वाचनपछि समीक्षा गरिने एमाले नेताहरू बताउँछन् । ‘अहिले बोलेर काम छैन । निर्वाचन सकिएपछि बोल्नुपर्छ,’ ती नेता भन्छन् ।

प्रकाशित मिति: मंगलबार, वैशाख १३, २०७९ १७:३२