सगरमाथा चढेकी माया पाँचपोखरी थाङपालको अध्यक्षमा उठिन्, भन्छिन्–डलर फलाउँछु

सगरमाथा चढेकी माया पाँचपोखरी थाङपालको अध्यक्षमा उठिन्, भन्छिन्–डलर फलाउँछु

A+ A A-

सगरमाथा आरोही हुन् माया गुरुङ । सातवटै महादेशका हिमाल चढेर विश्व कीर्तिमान राखेकी माया यसपटक सिन्धुपाल्चोकको पाँचपोखरी थाङपाल गाउँपालिकाको अध्यक्षमा विजयी भएर अर्को कीर्तिमान राख्न चाहन्छिन् । हिमालका चुचुरोमा १६औँ पटकसम्म पाइला टेकेकी मायाको राजनीतिमा भने यो पहिलो पाइला हो ।

पाँच पोखरीलाई पर्यटनको ‘अन्तर्राष्ट्रिय हब’ बनाउने अठोटसहित उनी स्वतन्त्र रूपमा चुनावी मैदानमा उत्रिएकी छन् । ‘के छैन यहाँ ?,’ प्रश्नसहित आफैँ उत्तर दिन्छिन्, ‘प्रकृतिले अग्ला–अग्ला हिमाल दिएको छ । हिमाल, खोलानाला, ताल–तलैया बनाउनै पर्दैन । ऐतिहासिक मठमन्दिर छन् । यसबाट रोजगारी सिर्जना गर्न सकिन्छ । यो डलर फल्ने देश हो । यस्तो ठाउँ छोडेर डलर कमाउन युवा विदेश गइरहेका छन् ।’

‘युवा पलायनलाई रोक्ने काम नेतृत्वमा रहेका दलहरूको काँधमा थियो । तर सकेनन्,’ माया निचोड निकाल्छिन् । यसका लागि आफैँ मैदानमा उत्रनुको विकल्प उनले देखिनन् । ‘परिवर्तन लामो समय हेर्‍यौँ । फलानो पार्टीले गर्ला कि अर्कोले गर्ला भनेर जनता कुरिरहे, हेरिरहे तर पूरा भएन,’ उनी भन्छिन्, ‘निराश भएका जनतालाई आशा जगाउन आवश्यक छ ।’

गाउँघरमा जनताको आँखामा आँसु र निराशा मात्र देखिन् उनले । ‘नरुने मानिस भेटेको छैन । पीडित शोषित छन् । महिला हिंसा छ । गुणस्तरीय शिक्षा छैन । ज्येष्ठ नागरिकले उपचार सेवा पाएका छैनन्,’ उनी भन्छिन्, ‘०७२ का भूकम्पपीडितले अहिलेसम्म राहत पाएका छैनन् । पहुँचवालाले मात्र पाएका छन् ।’

राजनीतिक पार्टीको नेतृत्वमा भिजन नहुँदा नागरिकको जीवनस्तर माथि उठ्न नसकेको र महिलालाई पछि पारिएको उनको बुझाइ छ । ‘भिजनबिना नेतृत्व लिन सकिँदैन,’ माया भन्छिन्, ‘राजनीति गर्छु भनेर आएका महिलालाई पार्टीले नेतृत्वमा नपुर्‍याउने स्थिति छ । काम गर्न पार्टी नै चाहिन्छ भन्ने छैन । जनताको जीवनस्तर उकासेर देखाउन चाहन्छु । अफ्नो ठाउँ आफैँ बनाउन सकिने भिजन मसँग छ ।’

युवालाई ‘गाउँ फर्क’ अभियान चलाउने उनको योजना छ । ‘भ्रष्टाचारमुक्त समाज बनाउने हो । गाउँ छोड्ने क्रम जारी छ, युवालाई गाउँ फर्क अभियान चलाउनुपर्छ,’ उनी भन्छिन्, ‘तपोभूमि, ज्ञानभूमि देश बनाउनुपर्छ ।

’स्वतन्त्र उम्मेदवारी दिएकी मायाका लागि चुनाव जित्न दलहरू नै मुख्य चुनौती हुन्, तर मतदाताले आफूलाई मत दिनेमा उनी ढुक्क छिन् । ‘समाजमा पार्टीले जित्नुपर्छ भन्ने छ । अहिले दलहरू सक्षम नभएकाले गठबन्धन बनाइरहेका छन् । एक्लै भिड्ने आत्मविश्वास गुमाएका छन् । जग बलियो भयो भने कसैले भत्काउन सक्दैनन्,’ उनी भन्छिन्, ‘मतदाताले दियोको रूपमा हेरेका छन् । मत दिनेमा ढुक्क छु ।’

सगरमाथा आरोहण मात्र होइन उनले देश विदेशका अनुभव पनि बटुलेकी छन् । यी अनुभवहरूलाई गाउँको विकासमा प्रयोग गर्न चाहन्छिन्, उनी । ‘गाउँमा जन्मिएँ हुर्किएँ । देशविदेशमा पनि पुगेँ तर अथाह त यही माटोमा रहेछ,’ उनी भन्छिन्, ‘यी अनुभवलाई समेटेर आफ्नो माटो भूगोल, इतिहास धर्म, संस्कृतिको पनि जगेर्ना गर्नुपर्छ ।’

नारी दिवसको दिन नै उनले उम्मेदवारी दिने घोषणा गरेकी थिइन् । ‘वर्षमा एक दिन नारी दिवस मनाउँछौँ । त्यो दिन रुन्छौँ, नाच्छौँ कराउँछौँ,’ उनी भन्छिन्, ‘दिवसको दिन विद्रोहको गीत गाउने होइन भनेर त्यो दिन उम्मेदवारी दिने आँट गरेकी हुँ ।’ चुनावी मैदानमा रहेकी मायाले ९ जेठ २०६५ मा सात महिलाको नेतृत्व गरेर सगरमाथाको सफल आरोहण गरेकी थिइन् ।