७ साना दलसँग छलफल गर्दै निर्वाचन आयोग, प्रमुख आयुक्त भन्छन्- समाधानकाे विकल्प पहिल्याएका छाैँ

७ साना दलसँग छलफल गर्दै निर्वाचन आयोग, प्रमुख आयुक्त भन्छन्- समाधानकाे विकल्प पहिल्याएका छाैँ

A+ A A-

निर्वाचन आयाेगले आज नेपालका साना दलहरूसित छलफल गर्दै छ । दलीय चुनाव चिह्नमा निर्वाचन लड्न पाउनुपर्ने माग राख्दै आन्दोलन गरिरहेका ३७ साना दलका प्रतिनिधिहरूसँग आयोगले संवाद गर्न लागेकाे हाे ।

प्रमुख आयुक्त दिनेशकुमार थपलियाले साना दलका मागहरू के कति सम्बाेधन गर्न सकिन्छ भन्नेमा आयाेगले काम गर्ने बताए । उनका अनुसार साना दलहरूलाई दलीय चिह्नमा निर्वाचनमा जान अहिलेको मौजुदा ऐनले दिँदैन । ऐनको अधीनमा रहेर के गर्न सकिन्छ, यसबारे साना दलका प्रतिनिधिसित छलफल भएलगत्तै आयाेगले कानुनविद्हरूसँग परामर्श गर्ने उनले बताए ।

स्थानीय तह निर्वाचन ऐन २०७३ र राजनीतिक दलसम्बन्धी ऐन २०७३ मा स्थानीय तहको निर्वाचनमा राष्ट्रिय दलको मान्यता प्राप्त दलले मात्रै दलीय चुनाव चिह्न पाउने व्यवस्था छ । स्थानीय तह निर्वाचन ऐन २०७३ को दफा २६ मा स्थानीय तहको निर्वाचनका उम्मेदवारलाई चुनाव चिह्न वितरण गर्नेसम्बन्धी प्रावधान छ ।

ऐनको दफा २६ (६) मा ‘यस दफाबमोजिम निर्वाचन चिह्न वितरण गर्दा राजनीतिक दलसम्बन्धी प्रचलित संघीय कानुनबमोजिम राष्ट्रिय दलको रूपमा मान्यता प्राप्त गरेको दलको उम्मेदवारलाई मात्र सम्बन्धित दलको निर्वाचन चिह्न वितरण गरिने' उल्लेख छ ।' याे कानुनअनुसार अहिले ६ वटा प्रमुख राजनीतिक दलले मात्र दलीय चुनाव चिह्नमा लड्न पाउनेछन् ।

राजनीतिक दलसम्बन्धी ऐन २०७३ को दफा ५२ मा प्रतिनिधिसभा निर्वाचनमा समानुपातिकतर्फ ३ प्रतिशत र प्रत्यक्षतर्फ एक सिट जितेपछि राष्ट्रिय दलको मान्यता पाउने उल्लेख छ ।

'प्रचलित कानुनलाई मध्यनजर गरी केही विकल्पमाथि छलफल हुने छ । कुनै दलले मतपत्रको स्वतन्त्र समूहमा रहेको चुनाव चिह्न रोज्ने र त्यही चिह्न लिएर सम्बन्धित दलका देशभरका उम्मेदवारले चुनाव लड्न सक्ने विकल्पमाथि पनि कुराकानी भइरहेको छ’, उनले भने ।

प्रकाशित मिति: सोमबार, फागुन ३०, २०७८ ०७:०२