अमरगढी किल्ला–खप्तड साइकल यात्रा सुरु

A+ A A-

'पर्यटन पूर्वाधार, समृद्ध प्रदेश आधार' भन्ने नाराका साथ डडेल्धुराको ऐतिहासिक ढुंगे अमरगढी किल्लादेखि खप्तडसम्मको अन्तराष्ट्रिय साइकल यात्रा सुरु गरिएको छ । शुक्रबार डडेलधुरा जिल्ला सदरमुकाम खलंगामा रहेको अमरगढी किल्लादेखि खप्तडसम्मका लागि अन्तर्राष्ट्रियस्तरको साइकल यात्रा सुरु भएको हो ।

सुदूरपश्चिमको उद्योग, पर्यटन, वन तथा वातावरण मन्त्रालयअन्तर्गतको प्रदेश पर्यटन विकास कार्यक्रम कार्यान्वयन इकाई धनगढीको प्रायोजन तथा सिके रिसर्च एण्ड ग्रिनरी प्रोमोसन प्रालिको आयोजनामा साइकल यात्रा आयोजना गरिएको हो ।

साइकल यात्रा कार्यक्रमको उद्घाटन अमरगढी नगरपालिकाका नगरप्रमुख डिल्लीराज जोशी, डडेलधुराका प्रमुख जिल्ला अधिकारी अञ्जन न्यौपाने, प्रदेश पर्यटन विकास कार्यक्रम कार्यान्वयन इकाई धनगढीका निमित्त प्रमुख डबलबहादुर बोहराले साइकल चलाएर संयक्तरूपमा गरेको पर्यटन विकास कार्यक्रम कार्यान्वयन इकाई योजना अधिकृत दानबहादुर थापाले जानकारी दिए ।

नेपाल एकीकरणको गौरव बोकेको ऐतिहासिक पर्यटकीयस्थल अमरगढी किल्लादेखि सुरु भएको साइकल यात्रा धरतीको स्वर्गका रूपमा अर्थात भूस्वर्गका नामले चिनिएको खप्तडको त्रिवेणी धामसम्म पुग्नेछ । चार दिने साइकल यात्राका क्रममा खप्तडको त्रिवेणीधाम, खप्तड बाबा आश्रम, घोडेदाउन पाटनलगायका क्षेत्रहरूको अवलोकन गरिने छ ।

साइकल यात्रामा तीन भारतीय नागरिकसहित २८ जना साइकल यात्रीको सहभागिता छ । तीन जना महिलासमेत गरी कूल ४५ जनाको यात्रामा सहभागी छन् ।

अमरगढी किल्ला र खप्तडलाई एक आपसमा जोडेर अन्तर्राष्ट्रिय स्तरमा चिनाउने उद्देश्यले साइकल यात्राको आयोजना गरिएको हो ।

khaptad cycle yatra1714894240.jpg

साइकल यात्रा कार्यक्रम आयोजक सिके रिसर्च एण्ड ग्रिनरी प्रोमोसन प्रा.ली.का अध्यक्ष छिन्डुम भोटेले स्वस्थ्य रहन र वातावरणमा कुनै असर नपुग्ने भएका कारण यात्राको आयोजना गरिएको बताए । यात्राका क्रममा प्रयोग भएका गाडी, मोटरसाइकलको इन्धनबाट निस्केको धुवाले वातावरणमा परेको असरको तथ्याङ्क संकलन गरी बोट विरुवाहरू रोपिने उनले बताए ।

प्रकाशित मिति: आइतबार, वैशाख २३, २०८१ १३:०९