प्रधानन्यायाधीशको विवादबारे अझै अलमलमै बार एसोसिएसन

A+ A A-

सर्वोच्च अदालतका न्यायाधीशहरूले प्रधानन्यायाधीशको कार्यशैलीप्रति असन्तुष्टि जनाउँदै फुलकोर्ट बैठक बहिष्कारसम्मको निर्णय गरे पनि न्यायपालिकाको कामकारबाहीबारे ‘वाचडग’को भूमिकामा देखिनुपर्ने नेपाल बार एसोसिएसन भने अझै अनिर्णित छ ।

७ र ८ कात्तिकमा लगातार बैठक बसेर समेत बार एसोसिएसनले प्रधानन्यायाधीश चोलेन्द्र शमशेर राणामाथि लागेको न्यायिक विचलनको आरोपबारे आफ्नो प्रस्ट धारणा बाहिर ल्याउन सकेको छैन ।

सर्वोच्चमा उपस्थित १४ न्यायाधीशले प्रधानन्यायाधीश राणाले बोलाएको फुलकोर्ट बैठकमा सहभागी नहुने निर्णय गरेपछि सोमबार बारको पदाधिकारी बैठक बसेको थियो । तर, आज बैठकले समेत प्रधानन्यायाधीशको भूमिकाबारे ठोस निर्णय गर्न सकेन ।

बारका अध्यक्ष चण्डेश्वर श्रेष्ठले न्यायिक संकटको ‘निकास दिन प्रधानन्यायाधीशलाई आग्रह गर्ने’ निष्कर्ष बारले निकालेको बताए । तर, निकास दिने बाटो के हुने भन्नेबारे भने बार अनिर्णित छ । ‘निकासको उपाय खोज्न भोलि (मंगलबार) बिहान ११ बजे हामीले बारको सल्लाहकार समितिको बैठक बोलाएका छौँ,’ अध्यक्ष श्रेष्ठले भने, ‘प्रधानन्यायाधीशले कसरी निकास दिने भन्ने त्यही बैठकको सल्लाहअनुसार निर्णय गर्छौं ।’

हिजो प्रधानन्यायाधीश राणासँगको भेटमा समेत बारले उनको कार्यशैलीबारे प्रश्न नउठाई वरिष्ठ अधिवक्ताको उपाधि वितरणमा भइरहेको ढिलाइबारे मात्रै कुराकानी गरेको थियो । सरकारमा भागबण्डा खोजेको विषय मिडियामा आएकोबारे भने बारले जिज्ञासा राखेको थियो । यो आरोपलाई प्रधानन्यायाधीश राणाले अस्वीकार गरेका थिए ।

सर्वोच्च बारले पनि प्रधानन्यायाधीशको कार्यशैलीले न्यायपालिकाको स्वतन्त्रतामा आघात पुर्‍याएको विवादबारे कुनै निर्णय गर्न सकेको छैन । हिजो यो विषयलाई समेत एजेण्डा राखेर सर्वोच्च बारको बैठक बसे पनि छलफल नसकिँदै नेपाल बारले सर्वोच्चको फुलकोर्टसँग बैठक गर्ने खबर आएपछि निर्णयबिनै बैठक टुंगिएको थियो ।

आज सर्वोच्च बारको सल्लाहकार समितिको बैठकले पनि नेपाल बार एसोसिएसनकै प्रकृतिसँग मिल्दोजुल्दो सुझाव दिएको छ । सल्लाहकार समितिले प्रधानन्यायाधीशले ‘उपयुक्त निकास दिनु उचित हुने’ सुझाव दिएको सर्वोच्च बारका सदस्य विकास भट्टराईले बताए । यसबारे प्रस्ट निर्णय गर्न अहिले सर्वोच्च बारको पदाधिकारी बैठक बस्दैछ । उपयुक्त निकासबोर पदाधिकारी बैठकले थप प्रस्ट पार्ने अपेक्षा छ ।

प्रकाशित मिति: सोमबार, कात्तिक ८, २०७८ १७:१७