चाडपर्वको अवसरमा मोबाइलमार्फत फण्ड ट्रान्सफर अब नि:शुल्क

A+ A A-

कनेक्ट आईपीएसले चाडपर्वको अवसरमा निःशुल्क रकम ट्रान्सफर गर्न सकिने योजना ल्याएको छ । कम्पनीले दसैँ, तिहार र छठको अवसरमा मोबाइलबाट गरिने फण्ड ट्रान्सफरलाई प्रोत्साहन गर्ने उद्देश्यले उक्त योजना ल्याइएको कम्पनीले जनाएको छ ।

कम्पनीका अनुसार कनेक्ट आईपीएसको मोबाइल एप, बैंक तथा वित्तीय संस्थाको मोबाइल बैंकिङमा रहेको कनेक्ट आईपीएस फण्ड ट्रान्सफरमार्फत मोबाइल वालेटमा गरिने फण्ड लोड २५ कात्तिकसम्म पूर्ण रूपमा नि:शुल्क गरिएको छ ।

कनेक्ट आईपीएसको बढ्दो प्रयोग तथा मोबाइलबाट बैङ्क खातामा आधारित फण्ड ट्रान्सफरलाई थप प्रवर्द्धन गर्न उक्त अवधिमा कारोबार शुल्क पूर्ण रूपमा मिनाहा गरिएको कम्पनीले जनाएको छ ।

फण्ड ट्रान्सफरलगायत अन्य विभिन्न भुक्तानी एकै प्लेटफर्मबाट गर्न सकिने कनेक्ट आईपीएसले गत आर्थिक वर्षमा १३ खर्ब ६० अर्ब रुपैयाँबराबरको कारोबार गरेको थियो । जसका लागि १ करोड ८९ लाख भुक्तानी कारोबार फर्छ्योट गरिएका थिए । त्यस्तै, चालू आर्थिक वर्षमा ४ खर्ब ५ अर्ब रुपैयाँको कारोबार कनेक्ट आईपीएसबाट भएको छ । जसका लागि ६२ लाख भुक्तानी कारोबारहरू फर्छ्योट गरिएका छन् ।

हाल यो प्रणालीमा ५४ वटा बैंक तथा वित्तीय संस्था आबद्ध छन् । बैंक तथा वित्तीय संस्थाका ग्राहकहरूले कनेक्ट आईपीएसको वेबसाइट वा यसको मोबाइलएपमार्फत अनलाइन रजिस्टर गरी सेवा लिन सक्नेछन् ।

साथै, सम्बन्धित बैंक तथा वित्तीय संस्थाको मोबाइल बैंकिङमा रहेको कनेक्ट आईपीएसको सुविधाका लागि छुट्टै रजिस्टरसमेत गर्नु पर्दैन । केवल त्यहाँ रहेको कनेक्ट आईपीएस फण्ड ट्रान्सफर अप्सनमार्फत यो सेवा प्रयोग गर्न सकिन्छ ।

१४ भन्दा बढी डिजिटल वालेटका प्रयोगकर्ताले पनि कनेक्ट आईपीएसमार्फत सोझै बैंक खाताबाट रकम लोड गर्न सक्छन् । कनेक्ट आईपीएसको मोबाइल एपमार्फत प्रतिकारोबार १ लाख रुपैयाँ तथा प्रतिदिन २ लाख रुपैयाँसम्म कारोबार गर्न सकिन्छ । त्यस्तै, मोबाइल बैंकिङबाट हुने फण्ड ट्रान्सफरमा भने बैंक तथा वित्तीय संस्थाले ५० हजार रुपैयाँदेखि २ लाख रुपैयाँसम्म कारोबार सीमा प्रदान गरेका छन् ।

प्रकाशित मिति: बुधबार, असोज २०, २०७८ १९:०५