बीपी प्रतिष्ठानमा बेथिति : अप्रेसन गर्न बिरामी महिनौँ कुर्न बाध्य, उपचारकै क्रममा दुर्घटना हुने स्थिति

बीपी प्रतिष्ठानमा बेथिति : अप्रेसन गर्न बिरामी महिनौँ कुर्न बाध्य, उपचारकै क्रममा दुर्घटना हुने स्थिति

A+ A A-

धरानस्थित बीपी कोइराला स्वास्थ्य विज्ञान प्रतिष्ठानमा अप्रेसनका लागि बिरामीले महिनौँसम्म कुर्नुपर्ने स्थिति रहेको प्रतिवेदन सार्वजनिक भएको छ । चिकित्सा शिक्षा आयोगको टोलीले तयार पारेको प्रतिवेदनमा भनिएको छ, ‘सेवाग्राहीले महिनौँ पालो पर्खनुपर्ने, अप्रेसन कक्षमा टेबुलदेखि चेयरसम्म अति जीर्ण हुँदा उपचारकै क्रममा दुर्घटनाको स्थिति रहनु र न्यूनतम औजारसमेत समयमा जोहो हुन नसक्नु यस विभागको प्रमुख समस्या भएको जानकारी प्राप्त भयो ।’

अप्रेसन थियटरको संख्या कम भएकाले आलोपालो अप्रेसन गर्नुपर्ने स्थिति रहेको प्रतिवेदनमा उल्लेख छ । प्रतिवेदनमा भनिएको छ, ‘अप्रेसन थियटरहरू पनि अस्पताल सञ्चालनका समयकै संख्यामा भएकाले थियटर संख्यामा कमी हुनु, विभागले आलोपालो थियटर प्रयोग गरी सेवा प्रदान गर्नुपर्ने अवस्था लामो समयदेखि रहिरहेको छ ।’

डेन्टल चेयर पूर्ण रूपमा काम नगर्ने स्थितिमा रहेको प्रतिवेदनमा औँल्याइएको छ । ‘डेन्टल सर्जरीमा भएका डेन्टल चेयर अधिकांश पूर्ण रूपमा काम नगर्ने तथा प्रयोगात्मक र सेवा प्रवाहका सामग्री समयमा सप्लाई नहुनेजस्ता कार्यले शिक्षण सिकाइ कार्यमा ढिला हुने गरेको’ प्रतिवेदनमा भनिएको छ ।

प्रतिष्ठानमा एमआरआई र सीटी स्क्यान तीन वर्षदेखि नरहेको पाइएको छ । ‘उपचार र शिक्षणमा प्रयोगमा आउने एमआरआई तीन वर्षदेखि नहुनु र संस्थाको सीटी स्क्यान मेसिन लामो समयदेखि बिग्रनुले अस्पतालको सेवा प्रवाहमा दीर्घकालीन असर पारेको विषय समस्याका रूपमा प्राप्त भयो,’ प्रतिवेदनमा भनिएको छ ।

भूकम्पले क्षतिग्रस्त भवन पानी चुहिने हुँदासमेत मर्मतसम्भार नगरिएको देखिएको छ । ‘भवनमा पानी चुहिएर कार्यसम्पादनमा समस्या हुने अवस्थामा थियो भने अर्कोतिर २०७२ सालमा गएको भूकम्पले क्षतिग्रस्त बनाएका भागहरू अवलोकनको मितिसम्म कुनै मर्मत वा रेट्रोफिटिङबेगर नियमित प्रयोगमा ल्याउँदा शिक्षक, विद्यार्थी, कर्मचारी र सेवाग्राहीमा नकारात्मक प्रभाव पारेको र जोखिमसमेत बढाएको देखियो,’ आयोगको प्रतिवेदनमा भनिएको छ ।

प्रतिष्ठानमा लामो समयदेखि सरसफाइ नभएको प्रतिवेदनमा उल्लेख छ । ‘सरसफाइका कर्मचारी भए पनि भवनका स्टोरलगायत कक्षमा लामो समयदेखि सरसफाइ गरिएको देखिएन । सिकाइका कतिपय सामग्री विद्यार्थी स्वयम्‌ले किन्नुपर्ने नियति हुनुजस्ता विषय विभागीय प्रमुख र व्यवस्थापन हेर्ने कर्मचारीको जिम्मेवारी वहन गर्ने क्षमता कमजोर भएका कारण सिर्जना भएको देखियो,’ प्रतिवेदनमा भनिएको छ ।

समयमा तलब नपाएको, लामो समयदेखि बढुवाको ढोका बन्द भएको, आर्थिक अनियमितताले विकास निर्माण तथा खरिदका प्रक्रिया सञ्चालन नहुँदा सेवा प्रवाहमा कठिनाइ भएको, अधिकार र जिम्मेवारी बाँडफाँट नभएको, दण्ड र सजायको अभावमा चरम लापर्बाही, अनुशासनहीनता बढेकोजस्ता समस्या प्रतिवेदनमा औँल्याइएको छ ।

प्रतिष्ठानमा सुधार ल्याउन व्यवस्थापनको जिम्मेवारीमा परिवर्तन, नियमावलीमा परिवर्तन गरी दण्ड, पुरस्कार विभागीय सजाय बढुवा र सेवा सुरक्षामा आमूल परिवर्तनको खाँचो रहेको आयोगको प्रतिवेदनमा जनाइएको छ ।

प्रा.डा. जगदीशप्रसाद अग्रवालको संयोजकत्वको टोलीले प्रतिष्ठानको निरीक्षण गरेर प्रतिवेदन बनाएको हो । आयोगले प्रतिवेदन स्वास्थ्य तथा जनसंख्या मन्त्रालयलाई बुझाएको थियो । उक्त प्रतिवेदन मन्त्रालयले सार्वजनिक गरेको हो ।

आयोगको प्रतिवेदनको पूर्णपाठ

यसअघि आइतबार नेपाल मेडिकल काउन्सिलको प्रतिवेदन पनि सार्वजनिक गरिएको थियो । काउन्सिलको प्रतिवेदनमा पनि प्रतिष्ठानको स्वास्थ्य सेवा अत्यन्तै नाजुक र गुणस्तरहीन रहेको सार्वजनिक भएको छ ।

१०५औँ दिन आन्दोलन

आयोग र काउन्सिलको प्रतिवेदनले आफूहरूले उठाउँदै आएको मुद्दा लिपिबद्ध भएको ठहर प्रतिष्ठान संघर्ष समितिको छ ।

‘अस्तिसम्म हामीले भन्दै आएका थियौँ । अब सबै विषय लिपिबद्ध भएको छ । हामीले उठाएका विषय सबै सत्य रहेछन् भन्ने सरकारले प्रमाणित गरेको छ,’ समितिका संयोजक सूर्यप्रसाद रिमालले भने, ‘स्वास्थ्य शिक्षा ध्वस्त छ । कर्मचारीले तलब पाएको छैन । बढुवा भएको छैन । विद्यार्थी, कर्मचारी र बिरामी सबै रुने स्थिति छ । हाँस्ने त पदाधिकारी मात्र रहेछन् ।’

आयोग र काउन्सिलको प्रतिवेदन सार्वजनिक भए पनि स्वास्थ्य मन्त्रालयमा मन्त्री नभएकाले कार्यान्वयनमा ढिलाइ भएको उनले गुनासो गरे । ‘उपकुलपति प्राध्यापक नरहेको आफैँले प्रमाणित गर्नुभएको छ । दारु खाएको पनि प्रमाणित भएको छ । पदाधिकारी हटाउने निर्णय सिनेट बैठकले गर्ने हो,’ उनले भने, ‘स्वास्थ्यमन्त्री नियुक्त गर्नुपर्‍यो, अनि सिनेटले निर्णय गर्छ ।’

आन्दोलनमा रहेका प्रतिष्ठानका स्वास्थ्यकर्मी, विद्यार्थी र कर्मचारीहरू । तस्वीर : संघर्ष समितिको फेसबुकबाट ।

प्रतिष्ठान शुद्धीकरणको माग राख्दै प्रतिष्ठान संघर्ष समितिले आन्दोलन सुरु गरेको १०५औँ दिन पुगेको छ । प्रतिष्ठान जीर्ण भएको भन्दै समितिले जोगाउन माग गर्दै आन्दोलन थालेको हो ।

प्रतिष्ठानलाई कमजोर बनाएको आरोप लगाउँदै संघर्ष समितिले प्रतिष्ठानका उपकुलपति डा. ज्ञानेन्द्र गिरी, रजिष्ट्रार प्रा.डा. मोहनचन्द्र रेग्मी, रेक्टर प्रा.डा. गुरु खनाल र निर्देशक प्रा.डा. गौरीशंकर साहको राजीनामा माग गर्दै आएका छन् ।

आन्दोलनरत पक्षका केही माग क्याबिनेट विस्तार भएपछि मात्र हुने खालका रहेको स्वास्थ्य तथा जनसंख्या मन्त्रालयका प्रवक्ता डा. कृष्ण पौडेल बताउँछन् ।

अख्तियारको प्रतिवेदन खोइ ?

अख्तियार दुरुपयोग अनुसन्धान आयोगको प्रतिवेदन सार्वजनिक नभएकोमा समितिले प्रश्न गरेको छ । ‘आयोग र काउन्सिलको प्रतिवेदन सार्वजनिक भयो । आर्थिक अनियमितता भएको प्रतिवेदन अख्तियारले कहिले सार्वजनिक गर्छ ? कतिवटा छापा मारेपछि प्रतिवेदन आउँछ ?,’ उनले प्रश्न गरे ।

संघर्ष समितिले समाधानका लागि तीन विकल्प अगाडि सारेको छ । पदाधिकारी नियुक्त गर्न मापदण्ड बनाउनुपर्ने, अब्बल समूह बनाउनुपर्ने र समूहले सिफारिस गरेकोलाई पदाधिकारी बनाउनुपर्ने, अनियमितता छानबिन गर्न उच्चस्तरीय आयोग बनाउनुपर्ने समितिको माग छ ।

‘हिजो कम्युनिस्टको कोटाबाट आए, आज कांग्रेसको कोटाबाट आउन थाले भने त प्रतिष्ठान बन्दैन । पदाधिकारी चयनको मापदण्ड बनाउनुपर्छ,’ डा. रिमाल भन्छन्, ‘रिसर्च गर्ने, शिक्षामा काम गरेको र बिरामीको सेवामा अब्बल भएको एउटा समूह बनाउनुपर्छ । उसले सिफारिस गरेकोलाई पदाधिकारी बनाउनुपर्छ । अनियमितता छानबिन गर्न उच्चस्तरीय समिति बनाउनुपर्छ ।’

याे पनि पढ्नुस् :

काउन्सिल रिपोर्ट: बीपी प्रतिष्ठानको स्वास्थ्य सेवा अत्यन्तै नाजुक, प्रतिदिन २० जना बिरामी अन्यत्र रिफर

बीपी प्रतिष्ठानको फार्मेसीमा पाइँदैन औषधि, एमआरआई गर्न बिर्तामोड पुग्छन् बिरामी

बीपी प्रतिष्ठान: सरकारको आग्रहपछि संघर्ष समितिले बदल्यो आन्दोलनको स्वरुप

बीपी प्रतिष्ठानका उपकुलपति गिरी प्राध्यापक नभएको पुष्टि

सरकारले भन्यो, ‘बीपी प्रतिष्ठानका पदाधिकारीको कारबाही प्रक्रिया सिनेटबाट अगाडि बढ्छ, आन्दोलन फिर्ता लिनू’

बीपी प्रतिष्ठान : जताततै अनियमितता, स्वास्थ्य सेवा भद्रगोल

चाउचाउ र बिस्कुटको भरमा पढ्छन् बीपी प्रतिष्ठानका विद्यार्थी

बीपी प्रतिष्ठानका उपकुलपति गिरीको योग्यतामाथि उठ्यो प्रश्न, ७ दिनभित्र कागजात पेश गर्न समितिको सुझाव [प्रतिवेदनसहित]

बीपी प्रतिष्ठान आन्दोलन : सरकारले किन कार्यान्वयन गरेन सम्झौता ?

बीपीमा ८३ दिनदेखि आन्दोलन : माग पूरा गर्न सरकारले देखाएन चासो, चिकित्सक तथा कर्मचारीद्वारा सेवा बहिष्कार

बीपी कोइराला स्वास्थ्य विज्ञान प्रतिष्ठानमा अख्तियारको छापा