बीपी प्रतिष्ठानमा भ्रष्टाचारको प्रश्न उठाउने डाक्टरलाई कारबाहीको चेतावनीसहित उपकुलपतिले साेधे स्पष्टीकरण

बीपी प्रतिष्ठानमा भ्रष्टाचारको प्रश्न उठाउने डाक्टरलाई कारबाहीको चेतावनीसहित उपकुलपतिले साेधे स्पष्टीकरण

A+ A A-

धरानस्थित बीपी कोइराला स्वास्थ्य विज्ञान प्रतिष्ठानका एसोसियट प्रोफेसर डा. विष्णु पोखरेलले पाँच दिनअघि अख्तियार दुरुपयोग अनुसन्धान आयोगका प्रमुख प्रेमकुमार राईलाई म्यासेज गरे, ‘सर नमस्कार, बीपी कोइराला स्वास्थ्य विज्ञान प्रतिष्ठानका अनियमितता र भ्रष्टाचारसम्बन्धी उजुरीहरूको प्राथमिकताका साथ छानबिन तथा कारबाही गर्नुहोला । एउटा राष्ट्रिय गौरवको प्रतिष्ठान धराशयी बन्दै छ । केही गर्नुहोस् ।’

अख्तियार प्रमुखलाई गरेको म्यासेज उनले सामाजिक सञ्जाल फेसबुकको प्रतिष्ठानका कर्मचारी र अल्मुनाई ग्रुपमा पनि पोस्ट गरे । भ्रष्टाचारका कारण प्रतिष्ठान उँभो नलागेको निष्कर्ष निकाल्दै उनले हरेक माध्यमबाट बोल्दै आएका छन् ।

‘प्रतिष्ठानको सुधारका लागि पटक–पटक बोल्दै आएका छौँ । यो राष्ट्रिय गौरवको प्रतिष्ठान हो । एसियाकै राम्रो बनाउन सकिन्छ,’ शिलापत्रसँग उनले भने, ‘यहाँ भ्रष्टाचारको लेखाजोखा छैन । पहिलेदेखि नै हुँदै आएको छ । अनियमितता रोकिनुपर्‍यो । प्रतिष्ठान राम्रो भयो भने सबैको राम्रो हुन्छ ।’

अनियमितता राेक्न उनले माग गरेलगत्तै प्रतिष्ठानका उपकुलपति डा. ज्ञानेन्द्र गिरीले स्पष्टीकरण सोधेका छन् । उपकुलपति गिरीले कारबाहीको धम्कीसहितको स्पष्टीकरण सोधेका हुन् । ‘स्पष्टीकरण चित्तबुझ्दो नपाइएमा प्रतिष्ठानको नियमावलीबमोजिम कारबाही भइजानेसमेत जानकारी गराइन्छ,’ स्पष्टीकरणपत्रमा भनिएको छ ।

डा. पोखरेललाई भने औपचारिक रूपमा प्रतिष्ठानले स्पष्टीकरणपत्र दिएको छैन । यद्यपि, सामना गर्न आफू तयार रहेको उनी बताउँछन् । ‘स्पष्टीकरणपत्र मैले बुझेको छैन । मिडियामा आएको देखेँ । अनियमितताबारे आवाज उठाएको हो । सामना गर्न तयार छु,’ उनी भन्छन्, ‘प्रतिष्ठानको भविष्य देखेर आवाज उठाएको हो ।'

प्रतिष्ठानमा जग्गा, भवन निर्माण, अक्सिजन प्लान्ट हरेक क्षेत्रमा अनियमितता हुने गरेको कर्मचारीले आरोप लगाउँदै आएका छन् । यसबारे उपकुलपति गिरी बोल्न चाहेनन् । प्रवक्तालाई जिम्मा लगाएर उनी पन्छिए ।

प्रकाशित मिति: सोमबार, जेठ ३१, २०७८ १९:२२