काउन्सिल रिपोर्ट: बीपी प्रतिष्ठानको स्वास्थ्य सेवा अत्यन्तै नाजुक, प्रतिदिन २० जना बिरामी अन्यत्र रिफर

काउन्सिल रिपोर्ट: बीपी प्रतिष्ठानको स्वास्थ्य सेवा अत्यन्तै नाजुक, प्रतिदिन २० जना बिरामी अन्यत्र रिफर

A+ A A-

धरानस्थित बीपी कोइराला स्वास्थ्य विज्ञान प्रतिष्ठानको स्वास्थ्य सेवा अत्यन्तै नाजुक र गुणस्तरहीन रहेको रिपोर्ट सार्वजनिक भएको छ । नेपाल मेडिकल काउन्सिलको टोलीले तयार पारेको रिपोर्टमा प्रतिष्ठानको स्वास्थ्य सेवा नाजुक रहेको उल्लेख छ ।

‘बीपी कोरोइराला स्वास्थ्य विज्ञान प्रतिष्ठानको स्वास्थ्य सेवा अत्यन्तै नाजुक र गुणस्तरहीन रहेकाले सेवाग्राहीले ठूलो दुःख पाइरहेको देखिन्छ । व्यवस्थापनको कमजोरीका कारण अस्पतालको रेडियोलोजी तथा ल्याब सेवाको अवस्था निकै तल्लो स्तरमा पुगेको र अस्पतालको आफ्नै हाताभित्र फार्मेसी सेवा नभएकाले सेवाग्राहीलाई निकै सकस भएको पाइयो,’ रिपोर्टमा भनिएको छ ।

काउन्सिलका उपाध्यक्ष डा. नारायणविक्रम थापा र सदस्य डा. प्रेणित कुमार पोखरेलको टोलीले गत २ भदौदेखि ५ गतेसम्म निरीक्षण गरेको थियो । टोलीले निरीक्षण गरेर स्वास्थ्य तथा जनसंख्या मन्त्रालयलाई बुझाएको रिपोर्टका केही बुँदा हामीले प्राप्त गरेका छौँ ।

आकस्मिक स्वास्थ्य सेवाको अवस्था

-आकस्मिक कक्षमा अत्यन्त भिडभाडको अवस्था हुने, स्वास्थ्य जनशक्ति पुग्दो मात्रामा भए पनि व्यवस्थापन तथा भौतिक संरचनाको अभावमा पर्याप्त सेवा दिन नसकेको पाइयो ।

-अस्पतालमा आईसीयू बेडको कमीले गर्दा आकस्मिक कक्षमा आएका नाजुक अवस्थाका बिरामीहरू अन्य अस्पतालमा रिफर हुने गरेको पाइयो । प्रतिदिन १५-२० जना बिरामी रिफर भएको देखियो ।

प्रयोगशाला सेवाको अवस्था

-पर्याप्त जनशक्ति भएर पनि उपकरण, रि-एजेन्ट, किट जस्ता कुरा नहुँदा आधाभन्दा बढी जाँच परीक्षण प्रतिष्ठानभित्र नहुने र बाहिर रिफर गरिने गरेको पाइएको ।
-जाँच परीक्षणका लागि समय पाउन पनि दिनहुँ कुर्नुपर्ने देखियो ।
-भएका जाँच परीक्षणका रिपोर्ट धेरै ढिला गरी आउने गरेको देखियो ।
–प्रयोगशालाको रिपोर्ट ठीक नआउने डाक्टरहरूको गुनासो सुनियो ।

डेन्टल सेवाको सम्बन्धमा

-नेपालको सबैभन्दा पुरानो दन्त सेवा प्रदान गर्ने डेन्टल कलेजको सेवाको स्तर खस्किएको पाइयो ।
-आधुनिकीकरण र नयाँ उपकरण जडान गर्नुपर्ने स्थितिमा भएका पुराना ओपिजी मेसिन पटक-पटक बिग्रिने गरेको ।
-बाङ्गोटिङ्गो दात मिलाउन नभई नहुने लेटरल सिफालोग्रम एक्सरे दुई वर्षदेखि थन्किएकाले सेवाग्राही इटहरी, विराटनगर जानुपर्ने बाध्यात्मक परिस्थिति रहेको ।
-डेन्टल अस्पतालका ९० प्रतिशत डेन्टल कुर्सी काम नगर्ने स्थितिमा रहेको ।
-सेवाग्राहीले विशेषज्ञ चिकित्सकद्वारा सेवा प्रवाहमा समय नदिएको गुनासो गरेको ।

फार्मेसी सेवा

-अस्पतालभित्र फार्मेसी सेवा नभएकाले सेवाग्राहीलाई ठूलो समस्या परेको ।
-अस्पतालको मूल ढोका अगाडि आवधिक रूपमा फार्मेसी रहेको पाइयो ।

अस्पतालको फोहोरमैला व्यवस्थापन

-फोहोरमैला व्यवस्थापन अत्यन्तै नाजुक रहेको ।
-अस्पतालको खाली ठाउँमा यत्रतत्र फोहोर फालिएको
-सरसफाइमा ध्यान नदिएको

मेडिकल रेकर्ड शाखा

-अस्पतालको मेडिकल रेकर्डहरू जथाभावी राखिएको ।
-काउन्सिलको मापदण्ड अनुसार व्यवस्थित गरी नराखिएको ।

सुझाव

-प्रतिष्ठानभित्रका कर्मचारी, प्रशासन, व्यवस्थापन समिति, सञ्चालक समितिबीचको समन्वयमा कमीकमजोरी देखिन्छ ।

-प्रतिष्ठानको स्वास्थ्य सेवालाई अत्यन्तै प्रभावकारी बनाउन एकापसमा समन्वयात्मक व्यवस्थापन आवश्यक देखिन्छ।

-स्वास्थ्य उपचारका लागि आवश्यक उपकरणको समेत अभाव भएको देखियो ।

-फ्याकेल्टीहरूको योग्यता, सीप, अनुभव तथा सक्रियताको विषयमा चिकित्सा सेवा आयोगबाट समय-समयमा नियमन, नियन्त्रण र निर्देशन हुन जरुरत देखियो ।

-प्रतिष्ठनालाई उठाउन प्रतिष्ठानको सेवाको सबै तहमा व्यवस्थित संरचना गर्नुपर्छ ।