बीपीमा ८३ दिनदेखि आन्दोलन : माग पूरा गर्न सरकारले देखाएन चासो, चिकित्सक तथा कर्मचारीद्वारा सेवा बहिष्कार

बीपीमा ८३ दिनदेखि आन्दोलन : माग पूरा गर्न सरकारले देखाएन चासो, चिकित्सक तथा कर्मचारीद्वारा सेवा बहिष्कार

A+ A A-

बेथिति अन्त्यको माग राख्दै सुनसरीको धरानस्थित बीपी कोइराला स्वास्थ्य विज्ञान प्रतिष्ठानका विद्यार्थी, चिकित्सक र कर्मचारीहरूले संयुक्त रूपमा आन्दोलन थालेको ८३ दिन पुगिसकेको छ । तर, विभिन्न बहानामा सरकारले माग पूरा नगरेको भन्दै आइतबारदेखि प्रतिष्ठानका विद्यार्थी, चिकित्सक र कर्मचारीहरू थप संघर्षमा उत्रिएका छन् ।

सरकारले आफूहरूका माग पूरा गर्न आलटाल गरेको भन्दै संयुक्त संघर्ष समितिको अगुवामाइमा आइतबारदेखि अनिश्चितकालका लागि सम्पूर्ण सेवा ठप्प पर्दै कडा संघर्षमा उत्रिनुपरेकाे उनीहरूले बताएका छन् ।

प्रतिष्ठानका आन्दोलनरत चिकित्सक तथा कर्मचारीहरूले आजदेखि माग पूरा नहुञ्जेल सम्मका लागि सेवा बहिष्कार गरेका छन् । उच्चस्तरीय छानबिन कार्यदलको प्रतिवेदन र मन्त्रालयले गरेको ६ बुँदे सहमति कार्यान्वयन नभएको भन्दै संयुक्त संघर्ष समितिले आजदेखि इमर्जेन्सी, कोभिड अस्पतालको सेवा र नियमित परीक्षाबाहेक अन्य सबै सेवा बहिष्कार गरेको हो ।

संयुक्त संघर्ष समितिका संयोजक डा. एसपी रिमालले माग पूरा नगरेर सरकारले कडा आन्दोलनमा उत्रन बाध्य बनाएको बताए ।

‘आज आन्दोलन सुरु गरेको ८३ दिन भयो, हामीसँग सम्झौता गरेको ३२ दिन भयो, डा. गोविन्द केसीसँग सम्झौता गरेको १९ दिन भयो, तर कार्यान्वयन भएन’, उनले भने, ‘तिमीहरूको केही कुरा मान्दैनौँ भन्नेखाले सरकारको नेचर देखियो र आजदेखि हामी कडा आन्दोलनमा उत्रिन बाध्य भयौँ ।’

उनले सरकारले गठन गरेको उच्चस्तरीय छानबिन कार्यदलले आफ्नो प्रतिवेदन बुझाएको एक महिना नाघे पनि आफ्ना माग सम्बोधन नगरेकाले सरकारले नै सेवा बहिष्कार गर्न बाध्य बनाएको रिमालले बताए ।

डा. रिमालका अनुसार आन्दोलनकर्मीसँग स्वास्थ्य मन्त्रालयले सम्झौता गरेको ३२ दिन पुगेको छ । तर, सरकारले कार्यदलको प्रतिवेदनले दोषी औँल्याएका पदाधिकारीहरूलाई कारबाही गर्न चासो अझै देखाएको छैन ।

सरकारले छानबिन मात्र गर्ने र प्रतिवेदन कार्यान्वयन नगर्ने प्रवृत्ति दोहोर्‍याएका कारण आन्दोलनलाई थप कडा बनाइएको डा. रिमालले बताए ।

‘चाहेको खण्डमो हाम्रा माग सरकारले आधा घण्टामै सम्बोधन गर्न सक्छ,’ उनले भने, ‘आलटाल गरेर सम्बोधन गर्ने नियत नदेखिएपछि आन्दोलनको स्वरूप परिवर्तन गरेका हौँ ।’

उनले सेवा बहिष्कार गर्दा उपचारमा आएका बिरामीहरूलाई आन्दोलनस्थलबाटै सेवा दिइने बताए ।

‘सेवा बन्द गरे पनि टाढाबाट आउने बिरामीलाई सेवा नदिन मनले मान्दैन । आन्दोलनस्थलबाटै बिरामीलाई हेरेर पठाउने, अनलाइन र फोनबाटै सेवाहरू दिइरहेका छौँ, ’उनले भने, ‘गाडीको बढी माया चालकलाई लाग्छ, बिरामीको सबभन्दा बढी माया डाक्टरलाई लाग्ने हो ।

गएकाे असार १ गतेदेखि संयुक्त संघर्ष समितिले प्रतिष्ठानमा बेथिति अन्त्य र शुद्धीकरणका लागि आन्दोलन जारी राखेको छ । बेथिति बढेको भन्दै उनीहरूले पदाधिकारीहरूको राजीनामा र छानबिन गरेर दोषीलाई कारबाही गर्न माग गर्दै आएका छन् ।