(फलोअप-९) अन्तरजातीय विवाह प्रकरण : प्रकाश र उनको परिवारको सुरक्षाको ग्यारेन्टी गर्न नौ संगठनको माग

(फलोअप-९) अन्तरजातीय विवाह प्रकरण : प्रकाश र उनको परिवारको सुरक्षाको ग्यारेन्टी गर्न नौ संगठनको माग

A+ A A-

अन्तरजातीय विवाह गरेपछि ज्यान मार्ने धम्की खेपेका कैलाली भजनी नगरपालिका-४ का प्रकाश विश्वकर्मा र उनका परिवारको सुरक्षाको ग्यारेन्टी गर्न सुदूरपश्चिमका ९ वटा संगठनले माग गरेका छन् ।

४ असारमा कैलाली जानकी गाउँपालिका-८ कि मालती रावलसँग विवाह गरेका प्रकाशलाई जात नमिलेको भन्दै ज्यान मार्ने धम्की दिइएको थियो । अर्को रूकुम घटना दोहोर्‍याउने भन्दै प्रकाश र उनका परिवारलाई युवतीका आफन्तले धम्की दिएका थिए । यसबाहेक २५ असारमा युवतीका आफन्तले प्रकाशलाई कुटपिट समेत गरेका थिए ।

दलित मुक्ति मोर्चा नेपाल, कैलाली, जात व्यवस्था उन्मूलन मोर्चा नेपाल, सुदूरपश्चिम प्रदेश, नेपाल राष्ट्रिय दलित समाज कल्याण संघ कैलाली, राष्ट्रिय दलित नेटवर्क धनगढी, समता मिडिया सेन्टर, दलित साहित्य सोपान धनगढी, राष्ट्रिय दलित पत्रकार संघ नेपाल, मिसन आम्बेडकर नेपाल, क्रियाशील दलित पत्रकार संघले प्रकाश र उनको परिवारको सुरक्षा गर्नुपर्ने मागसहित विज्ञप्ति जारी गरेको छ ।

‘प्रकाशको घरपरिवारलाई धम्की आएको र झलझलिया गाउँका मानिसहरूसमेत त्रसित भएका छन् । तसर्थ निजको परिवारको जिउधनको सुरक्षामा ध्यान दिन जोडदार माग गर्दछौँ,’ विज्ञप्तिमा लेखिएको छ । प्रकाश र उनको परिवारको सुरक्षाका लागि भन्दै सोमबार जिल्ला प्रशासन कार्यालय कैलालीमा ज्ञापनपत्र समेत बुझाइनेछ । ज्यान मार्ने धम्की आउँदा समेत प्रहरीले उजुरी नलिएपछि प्रकाश र उनको परिवारले सोमबार जिल्ला प्रशासन कार्यालयमा उजुरी दिने बताएका छन् ।

युवतीको परिवारबाट प्रकाशलाई ज्यान मार्ने धम्की आएपछि डरले प्रकाश र मालती २१ दिनसम्म घरबाहिर बसेका थिए । २५ असारमा घर आएपछि मालती र प्रकाशलाई युवतीका आफन्तले कुटपिट गरेका थिए । मालतीलाई कुटपिट गर्दै प्रकाशको घरबाट खोसेर लगेका थिए । त्यही दिन इलाका प्रहरी कार्यालयमा उजुरी गर्न गए पनि प्रहरीले उजुरी लिएको थिएन ।

प्रकाशको घरबाट आफन्तले कुट्दै लगेकी मालतीलाई धनगढीको एक बालगृहमा राखिएको छ । अन्तरजातीय विवाह गरे पनि प्रकाश र मालती दुवै जनाको विवाह गर्ने उमेर पुगेको छैन । उमेर नपुगेको कारण देखाउँदै मालतीलाई सुधार गृहमा लगेर राखिएको बताइएको छ । मालती १८ वर्ष चार महिना पुगिन् भने प्रकाश १९ वर्ष ८ महिना पुगे ।

प्रकाश र मालती एक वर्षदेखि प्रेम सम्बन्धमा थिए । उमेर पुगेपछि आफूहरू फेरि एक हुने बताउँछन् प्रकाश । ‘कानुनले उमेर पुगेन भनेको छ,’ प्रकाश गुनासो गर्छन्, ‘तर, अरु जातिको भएको भए उमेर नपुगे पनि यति लफडा हुने थिएन । म दलित भएका कारण यो सब गरे ।’

प्रकाश, उनको परिवार तथा अधिकारकर्मीले उमेर नपुग्दासम्म प्रकाश र मालती आ-आफ्ना अभिभावकको संरक्षणमा राख्ने र उमेर पुगेपछि विवाह गर्न दिनुपर्ने माग गरिरहेका छन् । ‘उमेर नपुग्दासम्म आ-आफ्नो अभिभावकको संरक्षणमा रहुन् । तर, उमेर पुगेपछि भने उनीहरूले आफ्नो इच्छा अनुसार विवाह गर्न पाउनुपर्छ,’ विजय भन्छन्, ‘अहिले प्रकाश र उनको परिवारलाई पनि सुरक्षा दिनुपर्छ भन्ने हाम्रो माग हो ।’