अन्तरजातीय विवाह प्रकरण : उपमेयरले घर फर्काउँछु भनिरहँदा केटालाई मरणासन्न हुनेगरी कुटियो

अन्तरजातीय विवाह प्रकरण : उपमेयरले घर फर्काउँछु भनिरहँदा केटालाई मरणासन्न हुनेगरी कुटियो

A+ A A-

अन्तरजातीय विवाह गरेर जंगलमा लुकेको जोडीलाई घर फर्काउने प्रयास भइहरँदा युवतीका आफन्तले युवकलाई मरणासन्न हुनेगरी कुटेका छन् ।

कैलालीको भजनी नगरपालिका- ४ का प्रकाश विश्वकर्मा र मालती रावल करिब एक महिनादेखि परिवार र समाजको डरले जंगलमा लुकेर बसेको भिडियो सार्वजनिक भएपछि नगरपालिकाले उनीहरूलाई घर फर्काउने प्रयास सुरु गरेको थियो ।

जंगलबाटै उनीहरूले आफूहरूलाई मार्ने धम्की आएको भन्दै बचाउन आग्रह गर्दै भिडियो सार्वजनिक गरेका थिए । भिडियो सार्वजनिक भएपछि नगरपालिकाले उनीहरूलाई घर फर्काउन प्रहरीलाई आग्रह गरेको नगरपालिकाकी उपमेयर छायादेवी देवकोटाले बताइन् ।

नगरपालिकाको न्यायिक समितिको नेतृत्वसमेत गर्ने उपमयेर देवकोटाले शिलापत्रसँग उनले भनिन्, ‘हामीलाई आधिकारिक उजुरी आएको छैन । तर, मिडिया र सामाजिक सञ्जालमा यो विषय देखेपछि हामीले इलाका प्रहरी कार्यालयलाई भनेर उहाँहरूलाई घर फर्काउनु र यो विषयमा बुझ्नू भनेका छौँ ।’

सम्बन्धित समाचार

अन्तरजातीय विवाह गरेका जोडीको जंगलबाटै आग्रह- हामीलाई बचाउनुस् (भिडियो)

युवकका परिवारका सदस्यले डरले गर्दा प्रहरी र नगरपालिकामा उजुरी नदिएको बताएका छन् । आफ्नो इच्छाले विवाह गरेको जोडीलाई जातीय विभेदको सिकार हुन नदिनेमा आफूहरू प्रतिवद्ध रहेको उनले बताइन् । ‘उहाँहरूलाई बोलाएर छलफल गरेर समाजमा बस्ने वातावरण मिलाउँछौँ,’ उनले भनिन् ।

नगरपालिकाले समाजमा स्थापित गर्ने भनिरहँदा युवती र युवकलाई कुटपिट गरिएको छ । युवतीलाई युवकको घरबाटै कुटेर लगेरको युवकले बताएका छन् ।

शिलापत्रसँग कुराकानी गर्दै उनले भने:

हामी भागेर गाको २१ दिन जति भयो । हामीले मन्दिरमा गएर विवाह गरेका हौँ । उनको (मालती रावल)को परिवारले सुरुमा ठीक छ भने । तर, पछि हामीलाई मार्ने, कुट्ने, काट्ने धम्की दिएपछि हामी घर छाडेर जंगलमा बस्न गयौँ । तर, बारम्बार घरमा आएर मेरो परिवारलाई धम्की दिन थाले । मलाई पनि रूकुम काण्ड दोहोर्‍याउँछु भन्दै म्यासेज गर्न थाले । घरमा बुबा मुटुको बिरामी हुनुहुन्छ । त्यसपछि मलाई घरका मान्छेले ‘त घर नआउने भए हामीलाई मार्छन्, घरमा आगो लगाउँछन्’ भनेपछि म र मालती आज १ बजेतिर घर गयौँ ।

घर पुगेका एक्कै छिनमा उसको माइती आए । २० वटा बाइक र गाडीमा आएर उसलाई कुट्दै गाडीमा हालेर लगे । मलाई पनि कुटेका छन् । हामीलाई गाली, गलौज, डुम, कामी भन्नु नभन्नु भनेका छन् ।

मैले डरले पुलिसलाई पनि खबर गर्न सकेको छैन । हाम्रो पक्षमा बोलिदिने को छ र ?

हामी दुई जना एक वर्षदेखि प्रेममा थियौँ । ऊ गर्भवती भएको पनि एक महिना भयो । अब मलाई झन् डर लागेको छ । उसलाई पनि कुटेरै मार्छन् होला, मलाई त झन् के बाँकी राख्थे र ?

हामीलाई मार्छौं भनेर धम्की त दिइसकेका छन् । हामीले हाम्रो इच्छाले विवाह गरेका हौँ । उसलाई कुटेर मारेर ममाथि आरोप पनि लगाउन सक्छन् सर । हामीलाई बचाउनुपर्‍यो ।

इलाका प्रहरी कार्यालयलाई कुटपिटको विषयमा बुझ्न पठाइसकेको बताइन् उपमेयर देवकोटाले ।

कैलालीका प्रहरी प्रमुख एसपी विश्व अधिकारीका अनुसार युवतीलाई प्रहरीले आफ्नो संरक्षणमा राख्ने प्रयास गर्दै छ । अधिकारीले शिलापत्रसँग भने, ‘केटाकेटी दुवै परिवारको सम्पर्कमा आइसकेका छन् । केटीलाई प्रहरीको संरक्षणमा राख्ने तयारी हुँदै छ ।’

सम्बन्धित समाचार

अन्तरजातीय विवाह प्रकरण : रुकुमकाण्ड दोहोर्‍याउने धम्कीपछि पीडितले प्रहरीमा उजुरी गर्न सकेनन्

अन्तरजातीय विवाह गरेका जोडीको जंगलबाटै आग्रह- हामीलाई बचाउनुस् (भिडियो)

अन्तरजातीय विवाह प्रकरण : युवकलाई प्रहरी कार्यालय बोलाइयो

प्रकाशित मिति: शुक्रबार, असार २५, २०७८ १४:५९