अन्तरजातीय विवाह प्रकरण : रुकुमकाण्ड दोहोर्‍याउने धम्कीपछि पीडितले प्रहरीमा उजुरी गर्न सकेनन्

अन्तरजातीय विवाह प्रकरण : रुकुमकाण्ड दोहोर्‍याउने धम्कीपछि पीडितले प्रहरीमा उजुरी गर्न सकेनन्

A+ A A-

कैलालीमा अन्तरजातीय विवाह गरेका एक जोडीलाई कुटपिट गर्दै गत वर्ष वैशाखमा घटेको 'रुकुमकाण्ड दोहोर्‍याइदिने' युवतीका आफन्तले धम्की दिएका छन् । गत वर्ष वैशाखमा रुकुम पश्चिमको चौरजहारीमा भएको घटनामा नवराज विकसहित छ जना युवकको हत्या भएको थियो ।

कैलाली भजनी नगरपालिका- ४, झलझलियाका प्रकाश विश्वकर्मा र मालती रावलले ४ असारमा विवाह गरेका थिए । विवाहपछि युवतीका आफन्तले युवकलाई 'मार्ने धम्की' दिएपछि ज्यान जोगाउन उनीहरू २१ दिनजति जंगलमा लुके । शुक्रबार उनीहरूले सामाजिक सञ्चालमार्फत भिडियो सार्वजनिक गर्दै आफूहरूलाई बचाउन आग्रह गरे ।

भिडियोमा युवती भन्छिन्, ‘जबर्जजस्ती विवाह भनेर मुद्दा हालिरहेका छन् । हामी जबर्जस्ती भनेर आ'को होइन, आफ्नै मनले विवाह गरेर आएको हो, तैपनि घरका सदस्यहरू मानिरा'का छैनन् । हामी दुई माया गरेर आ'को, मेरो पेटमा नि बच्चा छ ।’

अन्तरजातिय विवाह गरेका जोडीको जंगलबाटै आग्रह हामीलाई बचाउनुहोस#ShilapatraMedia #Shilapatranews #Nepal pic.twitter.com/9P6RXcYvgS
— Shilapatra (@Shilapatra) July 9, 2021

एक वर्षअघिदेखि प्रेमसम्बन्धमा थिए उनीहरू । युवतीको पेटमा एक महिनाको गर्भ रहेको उनीहरूले बताएका छन् । युवक प्रकाशका अनुसार युवतीको परिवारले मार्ने, काट्ने धम्की दिइरहेका छन् ।

युवतीका एक आफन्तले त रुकुम काण्ड दोहोर्‍याउने धम्की नै दिएका छन् । युवकले पठाएको म्यासेजको स्क्रिनसटमा युवतीका आफन्तले ‘डुमिनी’ भन्दै गाली गर्दै रुकुम काण्ड दोहोर्‍याउने धम्की दिएका छन् ।

युवतीको परिवारले युवकको परिवारलाई बारम्बार धम्की दिएपछि प्रकाश र मालती आज दिउँसो मात्र जंगलबाट घर फर्किएका थिए । ‘घरकालाई नै मार्छौं भनेपछि हामी आज मात्र घर गएका थियौँ,’ प्रकाशले भने, ‘घरमा पनि बुबा मुटुको रोगी हुनुहुन्छ ।’

घर पुगेलगत्तै युवतीका आफन्तले युवतीलाई कुटपिट गर्दै लगेका छन् । २० वटाजति मोटरसाइकल र गाडीमा आएका युवतीका आफन्तले युवकलाई कुटपिट पनि गरेका छन् ।

जंगलबाटै ज्यान बचाउन आग्रह गर्दै भिडियो सार्वजनिक भएपछि नगरपालिकाले उनीहरूलाई घर फर्काउन प्रहरीलाई आग्रह गरेको बताइन् उपमेयर छायादेवी देवकोटाले ।

नगरपालिकाको न्यायिक समितिको नेतृत्वसमेत गर्ने उपमयेर देवकोटाले शिलापत्रसँग उनले भनिन्, ‘हामीलाई आधिकारिक उजुरी आएको छैन । तर, मिडिया र सामाजिक सञ्जालमा यो विषय देखेपछि हामीले इलाका प्रहरी कार्यालयलाई भनेर उहाँहरूलाई घर फर्काउनु र यो विषयमा बुझ्नू भनेका छौँ ।’

आफ्नो इच्छाले विवाह गरेको जोडीलाई जातीय विभेदको सिकार हुन नदिनेमा आफूहरू प्रतिवद्ध रहेको उनले बताइन् । ‘उहाँहरूलाई बोलाएर छलफल गरेर समाजमा बस्ने वातावरण मिलाउँछौँ,’ उनले भनिन् ।

आफूमाथि जातीय विभेद र कुटपिट हुँदा पनि डरले प्रहरीमा खबर गर्न नसकेको बताएका छन् प्रकाशले । ‘उनीहरू ठूला मान्छे हुन् । हामी त सानो मान्छे । हाम्रो पक्षमा बोलिदिने को छ र ?,’ उनले डराउँदै भने, ‘अब मलाई झन् डर लागेको छ । उसलाई पनि कुटेरै मार्छन् होला, मलाई त झन् के बाँकी राख्थे र ।’

उनी गुहार माग्दै अगाडि भन्छन्, ‘तपाईंहरूका लागि त एक दलित मर्‍यो भन्ने मात्र त होला नि !’ मालती र आफूलाई मात्र नभई आफ्नो परिवारलाई पनि मानसिक तनाव दिएको उनले बताए ।

कैलालीका प्रहरी प्रमुख एसपी विश्व अधिकारीका अनुसार युवतीलाई प्रहरीले आफ्नो संरक्षणमा राख्ने प्रयासमा लागेको छ । अधिकारीले शिलापत्रसँग भने, ‘केटाकेटी दुवै परिवारको सम्पर्कमा आइसकेका छन् । केटीलाई प्रहरीको संरक्षणमा राख्ने तयारी हुँदै छ ।’

सम्बन्धित समाचार

अन्तरजातीय विवाह प्रकरण : उपमेयरले घर फर्काउँछु भनिरहँदा केटालाई मरणासन्न हुनेगरी कुटियो

अन्तरजातीय विवाह गरेका जोडीको जंगलबाटै आग्रह- हामीलाई बचाउनुस् (भिडियो)

अन्तरजातीय विवाह प्रकरण : युवकलाई प्रहरी कार्यालय बोलाइयो

प्रकाशित मिति: शुक्रबार, असार २५, २०७८ १५:३७