फलोअप-७ : मेयर भन्छन्- मलाई थाहा छैन, उपमेयर भन्छिन्- जातीय भेदभाव सह्य हुँदैन

फलोअप-७ : मेयर भन्छन्- मलाई थाहा छैन, उपमेयर भन्छिन्- जातीय भेदभाव सह्य हुँदैन

A+ A A-

कैलालीको भजनी नगरपालिकाकी उपमेर छायादेवी देवकोटाले जातीय भेदभाव सह्य नहुने बताएकी छिन् ।

उपमेयर देवकोटाले नगरपालिका-४ का प्रकाश विश्वकर्मा र उनको परिवारमाथि जातीय भेदभाव भएको विषय स्वीकार्य नहुने बताएकी हुन् ।

मालती रावलसँग ४ असारमा विवाह गरेका प्रकाशलाई मालतीका परिवारले रुकुमकाण्ड दोहोर्‍याइदिने धम्की दिएका थिए । प्रकाशको परिवारलाई पनि ‘डुम’ भन्दै गालीगलौज पनि गरेका छन् युवतीका आफन्तले ।

कानुनले नै निषेध गरिसकेको जातीय भेदभाव तथा छुवाछूत र त्यसैका आधारमा गरिने कुनै पनि प्रकारको विभेदमा माफी दिन नसकिने बताउँछिन् उपमेयर देवकोटा । शिलापत्रसँगको कुराकानीमा उनले भनिन्, ‘उमेर पुगेपछि मन मिलेर कसैले विवाह गर्छन् भने त्यसमा जातपातको कुरा गर्न मिल्दैन । कानुनले नै निषेध गरेको कुरा त कसैले उठाउनै मिल्दैन । उमेर नपुगेर विवाह गरेको भए पनि जातीय कुरा गर्न मिल्दैन । उमेर पुगेको छ, चित्त मिलेको छ भने उनीहरूले वैवाहिक जीवन बिताउन पाउँछन् ।’

प्रकाश र मालतीलाई समाजमा सम्मानजनक रूपमा स्थापित गर्न पनि आफूहरूले सहयोग गर्ने उनले बताइन् । ‘जातीय कुरा गरेर कसैलाई पनि गरिने विभेद सह्य हुँदैन । यस्तो गरेमा कानुनी प्रक्रिया अनुसार कारबाही हुन्छ,’ उनले भनिन् ।

उपमेयरले जातीय विभेद सह्य नहुने बताइरहेका बेला भजनी नगरपालिकाका मेयर शेरबहादुर चौधरीले भने प्रकाश र मालतीको घटना आफूलाई थाहा नभएको बताए । शिलापत्रसँग छोटो कुराकानी गरेका उनले भने, ‘मलाई यस विषयमा जानकारी आएको छैन । म बुझ्ने प्रयास गर्छु ।’

मेयर चौधरीले यस विषयमा थप टिप्पणी गर्न चाहेनन् ।

यता प्रकाशकै वडाका दलित सदस्य नन्दकला विश्वकर्माले पनि जातीय कारण देखाएर गरिएको विभेदविरुद्ध कानुनी कदम चाल्ने बताइन् । ‘मन र चित्त मिलेर गरिएको विवाहमा जातीय कारण देखाउन मिल्दैन,’ वडा सदस्य विश्वकर्माले भनिन्, ‘दलित भनेर कुटपिट गर्‍यो । रुकुम घटना घटाउँछु भनेर धम्की दिएको सुनेकी छु । यस्तो हो भने त यस्तो धम्की दिनेलाई कानुनी कारबाही हुनुपर्छ ।’

प्रकाशको परिवारलाई मार्ने धम्की दिएपछि आज (शुक्रबार) मात्र प्रकाश र मालती घर आएका थिए । मालतीका आफन्त र परिवारले उनलाई प्रकाशको घरबाट थुतेर कुट्दै लगेका छन् । ज्यान जोगाइ पाऊ भन्दै मालती र प्रकाशले सार्वजनिक गरेको भिडियोमा मालतीले आफू गर्भवती रहेको बताएकी छिन् । प्रकाशका अनुसार मालतीको पेटमा एक महिनाको गर्भ छ ।

इलाका प्रहरी कार्यालय भजनीका अनुसार मालतीको बसोबास क्षेत्र टीकापुर नगरपालिकाको क्षेत्रमा पर्छ । मालतीलाई टीकापुर प्रहरी र जिल्ला प्रहरी कार्यालयले सम्पर्क गरिरहेको छ ।

सम्बन्धित समाचार

फलोअप–६ : जातीय भेदभावको जाहेरी प्रहरीले लिन मानेन

फलोअप–६ : कैलालीकाे अन्तर्जातीय बिहेमा न्यायलाई एक मौका (भिडियो सम्पादकीय)

फलोअप-४ : युवक प्रहरी सम्पर्कमा, परिवारले कुट्दै लगेकी युवती खोज्दै प्रहरी

फलोअप-३ : युवकलाई प्रहरी कार्यालय बोलाइयो

फलोअप-२ : रुकुमकाण्ड दोहोर्‍याउने धम्कीपछि पीडितले प्रहरीमा उजुरी गर्न सकेनन्

फलोअप-१ : उपमेयरले घर फर्काउँछु भनिरहँदा केटालाई मरणासन्न हुनेगरी कुटियो

अन्तरजातीय विवाह गरेका जोडीको जंगलबाटै आग्रह- हामीलाई बचाउनुस् (भिडियो)

प्रकाशित मिति: शुक्रबार, असार २५, २०७८ २०:०८