[फलोअप-४] : युवक प्रहरी सम्पर्कमा, परिवारले कुट्दै लगेकी युवती खोज्दै प्रहरी

A+ A A-

अन्तरजातीय विवाहपछि ज्यान मार्ने धम्की खेपेका कैलालीको भजनी नगरपालिका ४ का प्रकाश विश्वकर्मालाई प्रहरीले सुरक्षा दिने बताएको छ ।

जिल्ला प्रहरी कार्यालय कैलालीका एसपी विश्व अधिकारीले युवक-युवती दुवैलाई सुरक्षा दिने बताएका छन् । ‘उहाँहरूले भिडियोमार्फत नै अलपत्र छौँ भनेपछि अहिले युवकसित भजनीको इलाका प्रहरीमा के कसो भएको हो भनेर बुझेका छौँ,’ एसपी अधिकारीले भने, ‘हाम्रो पहिलो प्राथमिकता दुवैलाई सुरक्षा दिनु हो ।’

प्रकाशले मालती रावलसँग ४ असारमा विवाह गरेका थिए । विवाहपछि युवतीका आफन्तले 'रूकुमकाण्ड दोहोर्‍याइदिने' धम्की दिएपछि प्रकाश र मालतीले घर छाडेर भागेका थिए । घर छाडेर उनीहरू नेपालगञ्ज, बुटवल हुँदै कर्णाली चिसापानीको जंगलमा लुकेका थिए ।

कुटपिट गरेको, ज्यान मार्ने धम्की दिएको विषयमा पनि प्रहरीले अनुसन्धान गर्ने एसपी अधिकारीले बताए । ‘अहिलेको मुख्य प्राथमिकता उहाँलाई सुरक्षित राख्नु हो । त्यसपछि अरु विषयमा अनुसन्धान हुन्छ । युवती गर्भवती छिन् भन्ने सुनिएको छ, त्यस विषयमा पनि जाँच हुन्छ,’ उनले भने ।

प्रकाशका अनुसार उनी र मालती एक वर्षदेखि प्रेम सम्बन्धमा थिए । प्रकाशले शिलापत्रलाई बताएअनुसार मालतीको पेटमा एक महिनाको गर्भ छ । ज्यान बचाउन गुहार माग्दै पठाएको भिडियोमा उनीहरूले दुवैले सहमतिमा विवाह गरेको बताएका छन् ।

प्रकाश प्रहरीको सम्पर्कमा आए पनि मालती भने अझै प्रहरीको सम्पर्कमा आइसकेकी छैनन् । मालतीलाई उनको परिवार र आफन्तले प्रकाशको घरबाट कुटपिट गर्दै लिएर गएका थिए ।

‘युवक हाम्रो सम्पर्कमा आइसकेका छन्,’ एसपी अधिकारीले भने, ‘युवतीलाई उनको आफन्तले लिएर गएका छन् भन्ने छ, हामी उनको सम्पर्कमा पुग्ने प्रयास गरिरहेका छौँ ।’

उनले अहिले अधिकार, मुद्दा-मामिलाका कुरा भन्दै पनि दुवैको सुरक्षा महत्त्वपूर्ण भएको बताए । ‘अधिकारका कुरा, मुद्दाका कुराका लागि उहाँहरू लड्नुहोला । तर, अहिले उहाँहरूको सुरक्षा महत्त्वपूर्ण कुरा हो,’ एसपी अधिकारीले भने ।