(फलोअप-८) अन्तरजातीय विवाह : प्रहरीले जाहेरी लिन नमानेपछि सीडीओ कार्यालयमा उजुरी दिँदै प्रकाश

(फलोअप-८) अन्तरजातीय विवाह : प्रहरीले जाहेरी लिन नमानेपछि सीडीओ कार्यालयमा उजुरी दिँदै प्रकाश

A+ A A-

अन्तरजातीय विवाहपछि ज्यान मार्ने धम्की खेपेका कैलाली भजनी नगरपालिका-४ का प्रकाश विश्वकर्माले सीडीओ कार्यालयमा उजुरी दिने भएका छन् ।

४ असारमा कैलालीकै मालती रावलसँग विवाह अन्तरजातीय विवाह गरेका प्रकाशलाई युवतीका परिवारले ज्यान मार्ने धम्की दिएका थिए । अर्को ‘रुकुम घटना दोहोर्‍याउने’ भन्दै प्रकाश र उनका परिवारलाई युवतीका परिवारले धम्की दिएका थिए ।

यही डरले प्रकाश र मालती २१ दिनसम्म घरबाहिर बसेका थिए । २५ असारमा घर आएपछि मालती र प्रकाशलाई युवतीका आफन्तले कुटपिट गरेका थिए । मालतीलाई कुटपिट गर्दै प्रकाशको घरबाट खोसेर लगेका थिए ।

त्यही दिन इलाका प्रहरी कार्यालयमा उजुरी गर्न गए पनि प्रहरीले उजुरी लिएको थिएन । त्यसपछि आज (आइतबार) स्थानीय अधिकारकर्मी र मानव अधिकारसम्बन्धी काम गर्ने संघसंस्थाको पहलमा जिल्ला प्रशासन कार्यालयमा प्रकाश र उनको परिवारको सुरक्षाका लागि निवेदन दिन लागिएको विजय विश्वकर्माले बताए ।

प्रकाशको घरबाट आफन्तले कुट्दै लगेकी मालतीलाई धनगढीको एक बालगृहमा राखिएको छ । स्रोतका अनुसार बाल सुधार गृहमा मालतीका हातखुट्टा बाँधेर राखिएको छ ।

अन्तरजातीय विवाह गरे पनि प्रकाश र मालती दुवै जनाको विवाह गर्ने उमेर पुगेको छैन । उमेर नपुगेको कारण देखाउँदै मालतीलाई सुधार गृहमा लगेर राखिएको बताइएको छ । मालती १८ वर्ष चार महिना पुगिन् भने प्रकाश १९ वर्ष ८ महिना पुगे ।

प्रकाश र मालती एक वर्षदेखि प्रेम सम्बन्धमा थिए । उमेर पुगेपछि आफूहरू फेरि एक हुने बताउँछन् प्रकाश । ‘कानुनले उमेर पुगेन भनेको छ,’ प्रकाश गुनासो गर्छन्, ‘तर, अरु जातिको भएको भए उमेर नपुगे पनि यति लफडा हुने थिएन । म दलित भएका कारण यो सब गरे ।’

प्रकाश, उनको परिवार तथा अधिकारकर्मीले उमेर नपुग्दासम्म प्रकाश र मालती आ-आफ्ना अभिभावकको संरक्षणमा राख्ने र उमेर पुगेपछि विवाह गर्न दिनुपर्ने माग गरिरहेका छन् ।

‘उमेर नपुग्दासम्म आ-आफ्नो अभिभावकको संरक्षणमा रहुन् । तर, उमेर पुगेपछि भने उनीहरूले आफ्नो इच्छा अनुसार विवाह गर्न पाउनुपर्छ,’ विजय भन्छन्, ‘अहिले प्रकाश र उनको परिवारलाई पनि सुरक्षा दिनुपर्छ भन्ने हाम्रो माग हो ।’

प्रकाशलाई मालतीका आफन्तले रूकुम घटना दोहोर्‍याउने र मार्ने धम्की दिँदै म्यासेज गरेको प्रमाण देखाउँदा पनि प्रहरीले जाहेरी लिएको थिएन ।

सम्बन्धित समाचार

फलोअप-७ : मेयर भन्छन्- मलाई थाहा छैन, उपमेयर भन्छिन्- जातीय भेदभाव सह्य हुँदैन

फलोअप–६ : जातीय भेदभावको जाहेरी प्रहरीले लिन मानेन

फलोअप–६ : कैलालीकाे अन्तर्जातीय बिहेमा न्यायलाई एक मौका (भिडियो सम्पादकीय)

फलोअप-४ : युवक प्रहरी सम्पर्कमा, परिवारले कुट्दै लगेकी युवती खोज्दै प्रहरी

फलोअप-३ : युवकलाई प्रहरी कार्यालय बोलाइयो

फलोअप-२ : रुकुमकाण्ड दोहोर्‍याउने धम्कीपछि पीडितले प्रहरीमा उजुरी गर्न सकेनन्

फलोअप-१ : उपमेयरले घर फर्काउँछु भनिरहँदा केटालाई मरणासन्न हुनेगरी कुटियो

अन्तरजातीय विवाह गरेका जोडीको जंगलबाटै आग्रह- हामीलाई बचाउनुस् (भिडियो)

प्रकाशित मिति: आइतबार, असार २७, २०७८ १५:४३