कर्णाली प्रदेशसभामा निलम्बित तीन सांसद प्रवेश गरेको भन्दै एमालेले गर्‍यो संसद् अवरुद्ध

कर्णाली प्रदेशसभामा निलम्बित तीन सांसद प्रवेश गरेको भन्दै एमालेले गर्‍यो संसद् अवरुद्ध

A+ A A-

कर्णाली प्रदेशसभाको आठौँ अधिवेशनको तेह्रौं बैठकमा एमालेले कर्णाली संसद् सचिवालयले निलम्बन गरेका तीन सांसद प्रवेश गरेको भन्दै एमालेले संसद् बैठक अवरुद्ध गरेको छ । आइतबार दिउँसो २ बजे बसेको प्रदेशसभाको बैठक अवरुद्ध पारिएको हो ।

फ्लोर क्रस गरेर मुख्यमन्त्री महेन्द्रबहादुर शाहीलाई विश्वासको मत दिएर सरकारमा सामेल भएका कारण एमालेबाट निलम्बित सांसद भौतिक एवम् शहरी विकासमन्त्री अम्मरबहादुर थापा, भूमि व्यवस्था कृषि तथा सहकारी मन्त्री कुर्मराज शाही, उद्योग पर्यटन वन तथा वातावरण मन्त्री नन्दसिंह बुढा प्रदेशसभाको बैठकमा उपस्थित भएको भन्दै आपत्ति जनाउँदै एमालेले प्रदेशसभाको बैठक अवरुद्ध पारेको हो ।

एमाले संसदीय दलका नेता यामलाल कँडेलले ३ वैशाखमा फ्लोर क्रस गरेर संसदीय दलको निर्णयविरुद्ध जाने चारै जनालाई एमालेले कारबाही गरेको र संसदीय दलको सदस्य र पार्टीको साधारण सदस्यबाट समेत हटाइएका उहाँहरू हामीले चाहेर वा खोजेर अथवा हारगुहार गरेर सांसद भएको बताए । ‘उहाँहरूलाई सर्वोच्च अदालतले नै एमाले संसदीय दलको सदस्यको हैसियतमा फर्काइदिएको हो,’ उनले भने, ‘एउटै दल सत्ता पक्ष र प्रतिपक्ष कहाँ हुन्छ ?’

एमालेका सांसदहरूले सरकार नछाडेसम्म संसदीय दलको बैठक बस्न नसक्ने नेता कँडेलले बताए ।

एमालेका सांसदहरूले बैठक सुरु हुनासाथ अवरोध गरेपछि कार्यसूचीमा प्रवेश नै नगरी बैठक स्थगित भएको हो । एमाले लामो समयदेखि संसदको बैठक अवरुद्ध गरेका कारणले आगामी आर्थिक वर्षको बजेटका विषयमा संसदमा छलफल हुन पाएको छैन ।

एमालेले फ्लोर क्रस गर्ने सांसदहरू थापा, शाही र बुढालाई कर्णाली प्रदेशसभा सचिवालयले गत शुक्रबार एक महिनाका लागि निलम्बलन गर्नुका साथै सर्वोच्च अदालतमा एमाले अध्यक्ष ओलीले भ्याकेट दर्ता गराएका छन् ।

कर्णाली प्रदेशसभाको अर्को बैठक १८ असारका दिन दिउँसो २ बजे बस्ने गरी स्थगित भएको सभामुख राजबहादुर शाहीले जानकारी दिए ।

प्रकाशित मिति: आइतबार, असार १३, २०७८ १८:१७