कर्णाली राजमार्ग : पहिरो पन्छाउँदै रकम असुल्दै, बिरामी बोकेको एम्बुलेन्ससँग पनि उठाइयो पैसा

कर्णाली राजमार्ग : पहिरो पन्छाउँदै रकम असुल्दै, बिरामी बोकेको एम्बुलेन्ससँग पनि उठाइयो पैसा

A+ A A-

शनिबार दिउँसो १ बजे कर्णाली राजमार्गअन्तर्गत दैलेखको दुल्लु नगरपालिका- २, बोटखोलामा एउटा ट्रक सडकको हिलोमा फस्यो । उक्त ट्रक निकाल्न एउटा डोजर आयो । डोजरले ट्रक निकाल्न सकेन । ट्रक पछाडि सर्‍यो । त्यतिबेलासम्म त्यहाँ करिब १ सयजति निजी तथा सरकारी सवारीसाधन, मालबाहक ट्रकको जाम भइसकेको थियो ।

ट्रक निकाल्न नसकेपछि डोजरले केही हिलो फाल्यो । त्यसपछि बल्लतल्ल उक्त ट्रक निकालियो । त्यसपछि एउटा समूहले सवारी साधनसँग पैसा उठाउन थाल्यो । उक्त डोजर निजी भएको भन्दै उनीहरूले हिलो पन्छाएबापत प्रतिगाडी २ सयदेखि ३ सय रुपैयाँसम्म उठाउन थाले । डोजर कसको हो र किन पैसा उठाएको भनेर कसैले खोजी गरेन ।

त्यसबारेमा सोधखोज गर्दा शिलापत्रकर्मीमाथि पाँच जनाको समूह जाइलाग्यो । डोजर चालक केही बोलेनन् । हिलो फालेबापत उक्त समूहले करिब १०/१२ हजार रुपैयाँ उठायो ।

ट्रकवालाहरूले पैसा दिए । उनीहरू भन्थे, 'पैसा दिए अगाडि बढ्न पाइन्छ । दुई/तीन सयको लोभमा किन लफडामा पर्ने ?'

अड्किएका सवारीसाधनमा बिरामी बोकेको एउटा एम्बुलेन्स पनि थियो । सो समूहले उक्त एम्बुलेन्ससँग पनि पैसा उठायो, अनि मात्र एम्बुलेन्स अगाडि बढ्न पायो ।

बेहाल कर्णाली राजमार्ग

कर्णाली राजमार्ग वर्षाको समयमा ठाउँ-ठाउँमा अवरुद्ध हुन्छ । एउटा मात्र लेन भएको राजमार्ग त्यो पनि अवरुद्ध हुँदा चार/पाँच दिन एउटै ठाउँमा बस्नुपर्ने बाध्यता छ ।

यस वर्ष पनि वर्षा सुरु भएसँगै कर्णाली राजमार्ग ठाउँ-ठाउँमा अवरुद्ध बनेको छ । हिलाम्मे राजमार्गमा मालवाहक साधनहरू अड्किने गरेका छन् ।

राजमार्गअन्तर्गत दैलेखको सियाला, किटु, घट्टेखोला, दहीखोला कालीकोटको गगनेखोला, हुल्म, सुनारखोला, पिली सेरावाडा, तिलागुफाको भिग्मलगायतका ठाउँमा पहिरो खसेको प्रहरीले जनाएको छ ।

दैलेखको आठबिस नगरपालिका- ५ को घट्टेखोलामा साना ढुङ्गा आउँदा सडक अवरुद्ध भएको चार दिन भएको नेपालगञ्बाट जुम्ला हिँडेको मालवाहक ट्रकका चालक महावीर शाहीले बताए । उनी आफू रोकिएको चार दिन भइसकेको बताउँछन् ।

‘यहाँ आएर अड्किएको चार दिन भयो । एउटा डोजर आएको त्यसले त्यो ढुङ्गा पन्छाउन सकेको छैन,’ शाहीले भने, ‘कर्णाली राजमार्गले वर्षायाममा सधैँ दु:ख दिने गरेको छ । यसलाई कसले राम्रो बनाउला ?’