भारत र चीनबाहेक अन्य देशका नागरिकलाई नेपाल प्रवेशमा रोक

A+ A A-

नेपालसँग सीमा जोडिएका छिमेकी देशका नागरिकबाहेक अन्य देशका नागरिकलाई सरकारले स्थलमार्गबाट नेपाल प्रवेशमा रोक लगाएको छ ।

सरकारका प्रवक्ता पार्वत गुरुङले नेपाल आउनुपर्ने भारतीय नागरिकलाई ७२ घण्टाभित्रको पीसीआरको नेगेटिभ रिपोर्ट देखाउनुपर्ने र १० होटल क्वारेन्टाइनमा बस्ने गरी होटल बुक गरेको प्रमाण पेस गरेका आधारमा नेपाल प्रवेश गर्न दिने सरकारले निर्णय गरेको बताए ।

उनका अनुसार स्थलमार्गबाट नेपाल प्रवेश गर्न चाहेन चिनियाँ नागरिकले पनि भिसाका साथै ७२ घण्टाभित्र पीसीआर परीक्षण गरेको नेगेटिभ रिपोर्ट र १० दिन होटल क्वारेन्टाइनमा बस्ने गरी होटल बुकिङ गरेको प्रमाण पेस गर्नुपर्नेछ ।

हवाई मार्गबाट प्रवेश गर्दा पनि ७२ घण्टाभित्र पीसीआर गरेको नेगेटिभ रिपोर्ट देखाउनुपर्ने निर्णय सरकारले गरेको छ । विदेशबाट आउने नेपालीले पनि ७२ घण्टाभित्रको पीसीआरको नेगेटिभ रिपोर्ट पेस गर्नुपर्नेछ भने नेपाल आएपछि अनिवार्य १० दिन होटल वा होम क्वारेन्टाइनमा बस्नुपर्नेछ ।

भारतबाट आउने नेपाली पनि स्थानीय तहको निगरानीमा अनिवार्य रूपमा होम क्वारेन्टाइनमा बस्नुपर्नेछ । क्वारेन्टाइनमा बसे/नबसेको निरीक्षण गरेर स्थानीय तह र जिल्ला प्रशासन कार्यालयले गृह मन्त्रालयमा रिपोर्ट गर्नेछन् ।

विमानस्थलमा बुधबार ट्रान्जिट हुनेबाहेक विदेशी नागरिकलाई नेपालबाट तेस्रो मुलुक जान प्रस्थान अनुमति नदिने तर यसअघि नै नेपालमा रहेका विदेशी नागरिकलाई प्रस्थान गर्न दिने सरकारले निर्णय गरेको छ ।

देशभरका विद्यालय तथा शिक्षालयमा भौतिक उपस्थिति नभई भर्चुअल माध्यम वा वैकल्पिक माध्यमबाट पठनपाठन जारी राख्ने सरकारले निर्णय गरेको उनले बताए । सबै प्रकारका परीक्षाहरू अर्को आदेश नभएसम्म स्थगित गर्ने सरकारले निर्णय गरेको छ ।

प्रकाशित मिति: बुधबार, वैशाख १५, २०७८ १५:१५