सुर्खेतमा मंगलबार मध्यरातबाट निषेधाज्ञा, के गर्न पाइन्छ के पाइँदैन ?

A+ A A-

महामारीका रूप फैलिए कोरोना भाइरस (कोभिड–१९) को संक्रमण सुर्खेतमा निरन्तर बढिरहेको छ । यसको नियन्त्रण तथा रोकथाम गर्नका लागि जिल्ला प्रशासन कार्यालय सुर्खेतले एक हप्ताका लागि निषेधाज्ञा जारी गरेको छ ।

जिल्लामा संक्रमण रोकथाम तथा नियन्त्रणलाई थप प्रभावकारी बनाउन जरुरी देखिएकाले संक्रामक रोग ऐन, २०२० को दफा २ एवं स्थानीय प्रशासन ऐन, २०२८ को दफा ६(३) बमोजिम हाल १४ वैशाखको राति १२ बजेदेखि २१ वैशाखसम्म सुर्खेत जिल्लाभर निषेध गर्ने निर्णय भएको जिल्ला प्रशासन कार्यालयले जनाएको छ ।

जिल्ला प्रशासन कार्यालय सुर्खेतका सहायक प्रमुख जिल्ला अधिकारी रोमबहादुर महतका अनुसार यो अवधिमा विद्युत्, दूरसञ्चार, सूचना तथा सञ्चार, शान्ति सुरक्षा, फोहोरमैला व्यवस्थापन, अस्पताल, औषधि पसल, ग्यास, पेट्रोलियन पदार्थ, तरकारी, खाद्य तथा दुग्ध पदार्थ, बैंकको एटीएमजस्ता अत्याआवश्यक सेवाहरू एवं सार्वजनिक निर्माण कार्य र हवाई सेवा सञ्चालनमा रहनेछन् ।

त्यस्तै, एम्बुलेन्स, शववाहन, दमकल, झण्डावाल सरकारी र नीलो (कूटनीतिक) प्लेटका सवारीसाधन, अत्यावश्यक सेवा सञ्चालनमा खटिएका जनशक्ति प्रयोग गरेका सवारीसाधन (पोशाक र परिचयपत्र अनिवार्य) भएमा चल्नेछन् । यी सेवा एवं कार्यमा संग्लन कर्मचारी/व्यक्तिहरूले अनिवार्य रूपमा मास्क, भौतिक दूरीलगायतका जनस्वास्थ्यका मापदण्ड अनिवार्य पालना गर्नुपर्नेछ । तर, दैनिक उपभोग्य वस्तु (तरकारी, खाद्य, दूध ग्यास पसल बिहान ६ देखि ९ बजेसम्म खुल्ला रहनेछन् ।

आदेशको अवज्ञा गर्ने वा काममा बाधा पुर्‍याउने व्यक्तिलाई संक्रामक रोग ऐन २०२० अनुसार स्थानीय ऐन २०२८ अनुसार कारबाही हुने जिल्ला प्रशासन कार्यालय सुर्खेतले जनाएको छ ।