जानकी मेडिकल शिक्षण अस्पतालमा आन्दोलनरत कर्मचारीले गरे तालाबन्दी

A+ A A-

आन्दोलनमा उत्रिएका कर्मचारीले जानकी मेडिकल कलेज शिक्षण अस्पतालमा तालाबन्दी गरेका छन् ।

धनुषाको रमदैयास्थित मेडिकल कलेज शिक्षण अस्पतालको प्रशासन कार्यालय, लेखा शाखा र मानव संशाधन शाखामा आन्दोलनरत कर्मचारीले आइतवार तालाबन्दी गरेका हुन् । विगतमा गरेको सहमति कार्यान्वयन नगरेको भन्दै गएको ९८ दिनदेखि कलेज परिसरमै रिले अनशनमा बस्दै आएका कर्मचारीले तालाबन्दी गरेका हुन् ।

७ महिना बराबरको तलब, ६ वटा दशैं खर्च, ७ वर्षको सञ्चयकोष, अस्पतालको गुणस्तरीय सेवा सुविधा सुधार, कर्मचारी उपर गरिएको कारबाही फिर्ता र विगतमा भएका सहमतिको पालना गर्नुपर्ने आन्दोलनरत कर्मचारीको माग छ । माग पूरा गर्न माग गर्दै उनीहरू ५ माघदेखि रिले अनशनमा बुस्दै आएका छन् ।

विगतमा समेत पकट-पटक गरी लामो समयदेखि आन्दोलनपछि कलेज प्रशासन र कर्मचारीबीच प्रशासन तथा कर्मचारी ट्रेड युनियनसँग माग पूरा गर्ने सहमति भएको थियो । गत मंसिर १३ गते २८ दिनपछि कलेजका कर्मचारीद्वय जानकी शरण यादव र कुलदिप साहले ३ बुँदे सहमतिपछि अनशन तोडेका थिए ।

तर, सो त्रिपक्षीय सहमति अहिलेसम्म पनि संस्था सञ्चालक पक्षले कार्यान्वयन नगरेकाले बाध्य भएर आफूहरू दोस्रो पटक रिले अनशनमा बसेको कर्मचारी हकहित संरक्षण संघर्ष समितिका संयोजक उमेश यादवले बताए ।

उनले रिले अनशन सुरु गरिएको दिनदेखि नै प्रत्येक दिन दुई जनाको टिम बनाएर अनशन जारी राखिएको जानकारी दिए । आन्दोलनरत कर्मचारीले रिले अनशनलाई निरन्तरता दिँदै थप सशक्त आन्दोलनको तयारी थालेका छन् । कलेज प्रशासनसँग भएका सम्झौता तथा जायज माग सम्बोधन नभएको भन्दै आन्दोलित कर्मचारीले अनशनलाई निरन्तरता दिँदै थप सशक्त आन्दोलनको तयारी थालेका हुन् ।

कर्मचारीको आन्दोलन र सहमति कार्यान्वयनका विषयमा कलेजका प्रशासन प्रमुख दयानन्द झासँग सम्पर्क गर्न खोज्दा उनी सम्पर्कमा आएनन् ।

प्रकाशित मिति: आइतबार, वैशाख १२, २०७८ २१:००