सरकारी स्कुलले होस्टेल र बस अनिवार्य राख्नुपर्छ : मुख्यमन्त्री गुरुङ

A+ A A-

गण्डकी प्रदेशका मुख्यमन्त्री पृथ्वीसुब्बा गुरुङले बालबच्चा पढाउने बहानामा गाउँघरमा तीब्र बसाइँ सराइ बढेको बताउँदै त्यसलाई रोक्न अब हरेक स्थानीय तहले स्कुल बसको ब्यवस्था गर्नुपर्ने बताएका छन् ।

‘पाहार ट्रष्ट नेपाल’को सातौं वार्षिक साधारसभा तथा तेस्रो महाधिवेशनलाई सम्बोधन गर्दै मुख्यमन्त्री गुरुङले हरेक स्थानीय तहले कम्तिमा चारपाँचवटा गाउँका विद्यार्थीलाई समेटेर विद्यालय निर्माण र स्कुल बसको ब्यवस्था गर्नुपर्ने बताए ।

‘अब, स्थानीय तहले पायक पर्ने गरी विद्यालय निर्माण र बसको व्यवस्था गरेर अभिभावकसहित विद्यार्थीलाई सुविधा दिनुपर्छ,’ उनले भने, ‘विद्यालयले टाढाका विद्यार्थीका लागि होस्टेलको समेत व्यवस्था गर्नुपर्छ ।’

गण्डकी प्रदेश सरकारले अहिले पहिलो चरणमा परीक्षणस्वरुप उच्च हिमाली जिल्लाहरू मुस्ताङ, मनाङ र म्याग्दीमा गरी ५ ठाउँमा त्यस प्रकारको विद्यालय सञ्चालन गर्ने तयारीमा रहेको उनले बताए ।

मुख्यमन्त्री गुरुङले नेपालमा संघीयता आइसकेपछि स्थानीय तहमा धेरै जिम्मेवारी हस्तान्तरण भएपछि शिक्षा क्षेत्र मारमा परेको बताए । ‘नेपालको शैक्षिक क्षेत्र अहिले अस्तव्यस्त अवस्थामा छ,’ उनले भने, ‘राज्यले यसको उचित व्यवस्थापन गर्न जरुरी छ, अब, ब्यवस्थापनमा ढिलाइ गर्न हुँदैन ।’

पाहार ट्रष्टले ग्रामीण भेगको शैक्षिक क्षेत्रमा सरकारले समेत गर्न नसकेको काम गरिरहेको बताउदै टाँठाबाठा र नेताहरूले यतिको काम गरेको भए धेरै प्रचारप्रसार हुने बताए । ‘सोझो भूतपूर्व सैनिकहरूले नेतृत्व गरेको संस्था भएकाले ठूलाठूला परियोजनासमेत चुपचाप सम्पन्न हुने गरेका छन्,’ उनले भने ।

स्थानीय तहले विनाअध्ययन र योजना नै भौतिक संरचनाहरु तयार गर्दा केही समयमा नै ती संरचना कामै नलाग्ने अवस्थामा पुगेको बताए । उनले यस्ता गलत कार्यले राज्यको करोडौं रुपैयाँ नोक्सान भएको समेत दाबी गरे ।

नेपालका विश्वविद्यालयले आफैं बनाएको शैक्षिक क्यालेन्डरअनुसार पठनपाठन गर्न नसकेको मुख्यमन्त्री गुरुङले आरोप लगाए । उनले विश्वविद्यालयहरुले अन्तर्राष्ट्रिय विश्वविद्यालयसँग प्रतिस्पर्धा गर्ने खालको पढाइ सञ्चालन गर्नुपर्नेमा उनको जोड थियो ।

प्रकाशित मिति: बिहीबार, माघ १६, २०७६ ००:०२