अन्तरप्रदेश उडान भर्ने कम्पनीलाई इन्धनमा सहुलियत: पर्यटनमन्त्री भट्टराई

A+ A A-

संस्कृति, पर्यटन तथा नागरिक उड्डयन मन्त्री योगेशकुमार भट्टराईले अन्तरप्रदेश उडान गर्ने हवाई सेवा कम्पनीलाई इन्धनमा सहुलियत दिइने बताएका छन् । नेपाल नागरिक उड्डयन प्राधिकरणले सोमबार विराटनगरमा विमानस्थलको विकास र विस्तारका लागि तयार पारिएको गुरुयोजना सम्बन्धी अन्तरक्रिया कार्यक्रममा उनले प्रदेशको आर्थिक क्रियाकलाप बृद्धि र काठमाडौंको हवाई ट्राफिक घटाउन कार्य गरिरहेको पनि जानकारी दिए ।

मन्त्री भट्टराईले सन् २०२५ अगावै विराटनगर विमानस्थलको धावनमार्ग १ हजार ५ सय मिटरबाट बढाएर २ हजार ५ सय मिटर बनाइसक्ने प्रतिवद्धता समेत व्यक्त गरे । उनले विराटनगर विमानस्थलबाट हिमाली उडान सेवा शुरु गर्न प्रदेश सरकार तथा स्थानीय सरकारको सहयोग आवश्यक रहेको बताउँदै आगामी दिनमा साना जहाजको उडान प्रदेशको राजधानीबाट अन्य क्षेत्रमा गरी काठमाडौसँग प्रदेशको ‘कनेक्टिङ’ उडान गर्ने नीति सरकारको रहेको बताए ।

उनले निजी क्षेत्रको सहकार्यमा विमानस्थल सञ्चालन गर्ने सरकारको सोच रहेको बताउँदै उद्यमीहरुको पूँजीको सुरक्षाको ग्यारेण्टी सरकारले लिने भएकाले ढुक्क साथ लगानी गर्न आव्हान गरे ।

कार्यक्रममा प्रदेश नं. १ का मुख्यमन्त्री शेरधन राईले विराटनगर विमानस्थलको विस्तार र जग्गा अधिग्रहणको निर्णय यही महिना भित्र गर्न सम्बन्धित निकायलाई आग्रह गर्दै प्रदेश सरकारले विमानस्थलको धावन मार्ग विस्तारमा आवश्यक सहयोग गर्ने प्रतिबद्धता जनाए । मुख्यमन्त्री राईले प्रदेश सरकारले विराटनगर विमानस्थललाई उच्च प्राथमिकतामा राखेकोमा पनि जोड दिए ।

सो अवसरमा प्रदेश १ का आन्तरिक मामिला तथा कानूनमन्त्री हिक्मतकुमार कार्कीले आवश्यक जग्गा अधिग्रहण गरी विमानस्थलको धावन मार्ग २ हजार ५ सय मिटर बनाई क्षेत्रीयस्तरको अन्तर्राष्ट्रिय विमानस्थलका रुपमा विकास गर्नुपर्र्नेमा जोड दिए ।

कार्यक्रममा प्राधिकरणका इन्जिनियर प्रदीप अधिकारीले विमानस्थलको सन् २०४० सम्मको गूरु योजना प्रस्तुत गर्दै ११ अर्ब लगानी गरेर विमानस्थलको हाल रहेको १२० विघा क्षेत्रफलमा थप ८३ विघा जग्गा अधिग्रहण गरेमा २४ वर्षपछि व्यस्त समयमा प्रतिघण्टा १ हजार २ सय हवाई यात्रुलाई सेवा दिन सकिने जानकारी दिए ।

उनले विमानस्थल विस्तारबाट सन् २०४० मा प्रतिवर्ष ९ लाख ५० हजार स्वदेशी तथा २ लाख २५ हजार वाह्य पर्यटकलाई सेवा उपलब्ध गराउन सकिने धारणा प्रस्तुत गरे ।

विराटनगर विमानस्थललाई अन्तराष्ट्रिय विमानस्थलका रुपमा विकास गर्न डिपिआर पनि तयार भएको छ ।

प्रकाशित मिति: सोमबार, मंसिर १६, २०७६ २१:५१