बर्थिङ सेन्टरमा सुत्केरी गराउनेलाई नि:शुल्क एम्बुलेन्स सेवा र बालपोषण पोको

बर्थिङ सेन्टरमा सुत्केरी गराउनेलाई नि:शुल्क एम्बुलेन्स सेवा र बालपोषण पोको

A+ A A-

संखुवासभाको खाँदबारी नगरपालिकाले बर्थिङ सेन्टरमा सुत्केरी गराउनेलाई निःशुल्क एम्बुलेन्स बाल पोषण पोको दिने घोषणा गरेको छ ।

आमा र बच्चालाई स्वास्थ्य बनाउन बर्थिङ सेन्टरमा नै सुत्केरी गराउन प्रोत्साहन गर्ने उद्देश्यले नगरपालिकाले बालपोषण पोको कार्यक्रम ल्याएको नगर प्रमुख मुरारि खतिवडाले जानकारी दिए ।

बर्थिङ सेन्टरमा सुत्केरी गराउन आउने नगरपालिका भित्रका आमाले बालपोषण पोको कार्यक्रमअन्तर्गत एकमुष्ट नगद ३ हजार रुपैयाँ उपलब्ध गराइने प्रमुख खतिवडाले बताए ।

उनले भने, ‘बालबालिका र आमालाई आवश्यक पर्ने पोषणयुक्त खानेकुरा खरिद गर्ने सहयोग पुर्‍याउने उद्देश्यका साथ आर्थिक वर्ष २०७६/७७ को नीति नगर परिषदले पारित गरेको नगर प्रमुख खतिवडाले जानकारी दिए ।

बालपोषण पोकाे कार्यक्रमले बर्थिङ सेन्टरमा नै सुत्केरी गराउन आउनेको संख्या बढ्ने अपेक्षा गरिएको छ । निक साइमन संस्थाका दुई चिकित्सकले २४सै घण्टे प्रसूति सेवा दिइरहेका कारण जिल्ला अस्पताल खाँदबारी छिमेकी जिल्ला भोजपुरको षडानन्द नगरपलिका, साल्ला सिलिच्छो गाउँपालिका, अरुण गाउँपालिका र धनकुटा जिल्लाबाट समेत प्रसूति सेवा लिन आउने को संस्या वृद्धि भएको अस्पताल प्रशासनले जनाएको छ ।

प्रसूतिलाई नगरको निःशुल्क एम्बुलेन्स सेवा

खाँदबारी नगरपालिकाले सुरक्षित प्रसूति सेवा गराउनेलाई निःशुल्क एम्बुलेन्स सेवाको पनि व्यवस्था गरेको नगर प्रमुख मुरारी खतिवडाले जानकारी दिए ।

आमा र बच्चा दुवै ज्यान सुरक्षित बनाउन सुत्केरी महिलालाई निःशुल्क एम्बुलेन्स सेवाको व्यवस्था गरिएको उनले बताए । नगरपालिकाले नगरभित्र बसोबास गर्न गर्भवती भएका आमालाई बर्थिङ सेन्टरसम्म पुर्‍याउनका लागि निःशुल्क एम्बुलेन्ससमेत प्रदान गरिएको प्रमुख खतिवडाको भनाइ छ ।

खाँदबारी नगरपालिकाभित्र जिल्ला अस्पतालसहित अन्य तीनवटा बर्थिङ सेन्टर छन् । नगरभित्र तुम्लिङटार, सेकाहा र शितलपाटीमा मात्र बर्थिङ सेन्टर छन् ।

सडक सञ्जाल जोडिएका जुन सुकै स्थानका गर्भवतीलाई नगरपालिकाकै एम्बुलेन्स निःशुल्क सेवा प्रदान गर्न कार्यविधि बनाइएको नगरपालिले जनाएको छ ।

नगरपालिकाको एम्बुलेन्स उपलब्ध नभएको ठाउँमा अन्य जोकोहीको एम्बुलेन्स प्रयोग गर्न सक्ने र त्यसको बिल भर्पाइ नगरपालिकालाई बुझाएपछि सो खर्चबापतको भुक्तानी नगरपालिकाले ब्यहोर्नेसमेत नगर प्रमुख खतिवडाले बताए ।

सो सेवा र सुविधा लिनका लागि बच्चाको जन्मदर्ता गराउन जाँदा स्वीकृत बर्थिङ सेन्टर वा अस्पतालमै बच्चा जन्माएको प्रमाणपत्र र बर्थिङ सेन्टर आउँदाको एम्बुलेन्सको बिल भर्पाइ लिएर जानुपर्ने व्यवस्था गरिएको नगरपालिकाले जनाएको छ ।

नगरपालिकाको आमा र बच्चाको स्वास्थ्यमा कुनै समस्या आउन नदिन चालू आर्थिक वर्षमा यो कार्यक्रमका लागि ६ लाख रुपैयाँ बजेट विनियोजन गरिएको बताइएको छ ।

प्रकाशित मिति: शुक्रबार, मंसिर ६, २०७६ १३:०४