हात्ती नियन्त्रणका लागि थापेको विद्युतीय धरापमा परी ४० को मृत्यु

A+ A A-

मेचीनगर नगरपालिका– ९ निवासी ५७ वर्षीय बुद्धिमाया तामाङको आइतबार हात्ती धपाउन प्रयोग गरिएको विद्युतीय तारमा परी करेन्ट लागेर मृत्यु भयो ।

गाईवस्तु धपाउने क्रममा तामाङलाई करेन्ट लागेको जिल्ला प्रहरी कार्यालय झापाका प्रहरी नायब उपरीक्षक महेन्द्रकुमार श्रेष्ठले जानकारी दिए । करेन्ट लागेर तामाङको घटनास्थलमै मृत्यु भएको थियो ।

यस्तै, गत का१६ गते हात्ती धपाउन लगाइएको विद्युतीय तारमा परेर झापामा दुई जनाको एकसाथ मृत्यु भयो । मृत्यु हुनेमा बुद्धशान्ति गाउँपालिका– ४ निवासी १८ वर्षीय अनिष राई र उनकै मामा भोजपुर निवासी ३५ वर्षीय मणिराम राई रहेका छन् ।

उनीहरूलाई बुद्धशान्ति गाउँपालिका– ४ मा हात्ती धपाउन लगाइएको विद्युतीय तारमा परेर करेन्ट लागेको थियो । माथिका दुईवटा घटना पछिल्ला प्रतिनिधि घटना मात्रै हुन् । जङ्गली हात्तीबाट जोगिन विच्छ्याइएको विद्युतीय तारमा परी झापामा यसअघि धेरैले ज्यान गुमाइसकेका छन् ।

मेचीनगर नगरपालिका– ९ माथिल्लो मागुरमाडीका ६० वर्षीय गङ्गा थपलियाको पनि गत साउनमा विद्युतीय धरापमा परी मृत्यु भयो । त्यस्तै अर्जुनधारा– ४ दहिझोडा निवासी २५ वर्षीया अनु लिम्बू, मेचीनगर ३ धरधरेका ५८ वर्षीय डिल्ले गहतराज, भद्रपुर–१० का ७१ वर्षीय डम्बरबहादुर लिम्बूसहित धेरैले विद्युतीय धरापमा परी ज्यान गुमाए ।

गत असारमा रणकाली सामुदायिक वन हल्दिबारी– ३ मा हात्ती धपाउन प्रयोग गरिएको विद्युतीय तारमा परेर तीनवटा हात्ती मरेका थिए ।
यसअघि पनि विद्युतीय तारमा परी झापा र इलामको सिमानामा पर्ने इरौंटार– ८ मा एउटा पोथी हात्ती मरेको थियो ।

झापाका विभिन्न क्षेत्रमा पछिल्लो समय हात्ती नियन्त्रणका लागि भन्दै जथाभावी विद्युतीय तारको प्रयोग गर्ने गरिएको छ । तर, त्यही तारमा परेर एकपछि अर्काे गर्दै मानिसको मृत्यु हुन थालेपछि चिन्ता थपिएको डिभिजनल वन कार्यालय झापाका प्रमुख विष्णुलाल घिमिरे बताए ।

हात्ती नियन्त्रणका लागि भन्दै डिभिजन वन कार्यालय, जिल्ला प्रशासन कार्यालय, जिल्ला प्रहरी कार्यालय, नेपाल विद्युत् प्राधिकरणको अनुमति नलिई हात्ती प्रभावित क्षेत्रका वासिन्दाले विद्युतीय तारको जथाभावी प्रयोग गरेका छन् ।

प्रकाशित मिति: सोमबार, मंसिर २, २०७६ १३:०३