ढुङ्गा उत्खनन् प्रकरण : उदयपुरको बेलका नगरपालिकामा तनाव (भिडियाेसहित)

A+ A A-

ढुङ्गा उत्खननको विषयलाई लिएर उदयपुरको बेलका नगरपालिकामा प्रहरी र स्थानीयवासीबीच तनाव बढेको छ । मापदण्डविपरीत खोलाका ढुंगा उत्खनन् गरेको भन्दै बेलका–४ का स्थानीयले नियन्त्रणमा लिएको २० वटा टिपर छुटाउने क्रममा प्रहरी र स्थानीयवासीबीच धकेलाधकेल भएको हो ।
स्थानीयवासी अहिले प्रदर्शनमा उत्रिएका छन् । लालबजारमा भेला भएका सयौं स्थानीवासीले बेलका नगरपालिकाका नगरप्रमुख दुर्गाकुमार थापा ‘स्वस्तिक’विरुद्ध नाराबाजी गरेका छन् । नगरप्रमुख थापालाई लालबजारमा उपस्थित भएर ढुंगा प्रकरणबारे छलफलमा बस्न उनीहरुले तीनघण्टे अल्टिमेटमसमेत दिएका छन् । ‘अन्यथा हामी यी टिपरमा आगजनी गर्नेछौं,’ स्थानीय प्रकाश मगरले भने, ‘एक गाडी गुण्डा पठाएर हामीलाई तर्साउने प्रयास भएको छ, हामी मर्न तयार छौं तर, यो विषयमा घुँडा टेक्दैनौं ।’

स्थानीय माया ओली कोइरालाले आफूलाई प्रहरीले हात हालेको आरोप लगाइन् । ‘यहाँ प्रदर्शनमा महिलाहरु पनि छौं, पुरुष प्रहरीले हामी केही महिलामाथि धक्कामुक्की गरेका छन्,’ उनले भनिन् ।

अहिले लालबजार क्षेत्रमा बाक्लो संख्यामा नेपाल प्रहरी र सशस्त्र प्रहरी परिचालन गरिएको छ ।

महाभारत वन क्षेत्रअन्तर्गत बेलका वडा नम्बर ४ र ६ को सिमानामा रहेको सिसुवा खोलाबाट जोखिम नै निम्तने गरी ढुंगा उत्खनन गरेको भन्दै बिहीबारदेखि स्थानीयवासीले २० वटा टिपरलाई नियन्त्रणमा लिएर राखेका हुन् ।

नगरपालिकाले स्थानीयको भन्दा ठेकेदारको कुरा सुनेर बलजफ्ती टिपर उम्काउने प्रयास गरिरहेको स्थानीयवासीको आरोप छ ।

बेलका नगरपालिकाका प्रवक्ता मोहन घिमिरेले विवाद मिलाउने प्रयास भइरहेको बताएका छन् ।

उनीहरुले डिभिजन वन कार्यालयका प्रतिनिधि आएर नबुझेसम्म ती टिपर नछाड्ने अडान लिएका छन् ।

‘१९ कात्तिकमा डिभिजन वनले उक्त क्षेत्रमा ढुंगा उत्खनन् गर्नु जोखिमपूर्ण भन्दै बेलका नगरपालिकालाई पत्र काटेको रहेछ,’ एक स्थानीयले भने, ‘तर यहाँ त झन् मनलाग्दी भयो ।’

यसअघि शुक्रबार शिलापत्रसँग कुरा गर्दै बेलका नगरपालिकाका प्रमुख कार्यकारी अधिकृत पुष्कर भट्टराईले ठेकेदारबाट कमीकमजोरी भएको स्वीकार गरेका थिए । ‘ठेक्का सम्झौतालाई उल्लंघन गरेर उनीहरुबाट केही कमजोरी भएको छ,’ भट्टराईले भने, ‘उनीहरुले कमजोरी सच्चाएर काम गर्नुपर्छ ।’

उनले मापदण्ड भन्दा पनि स्थानीयले टिपर राति हिँडेकोप्रति असन्तुष्टि जनाएको दाबी गरेका थिए । तर, स्थानीयवासीले भने ठेकेदारले खोला नै रित्तो पारेर ढुङ्गा उत्खनन गर्नुका साथै जोखिम न्यूनीकरणका लागि कसिएका बाँधको ढुङ्गासमेत नछाडेको बताएका छन् ।

नगरपालिकाले यो कुरा स्वीकार गरेको छ कि ठेकेदारले ढुङ्गा ओसारपसार समय र झिक्नुपर्ने स्थानका विषयमा भएको सहमति चाहिँ उल्लंघन गरेकै हो ।

सिरहाको बिपी कन्स्ट्रक्सनले ३ करोढ ५६ लाख रुपैयाँमा गत भदौमा ढुंगाको ठेक्का पाएको थियो ।

याे पनि..

मापदण्डविपरीत ढुंगा उत्खनन गरेको भन्दै उदयपुरमा २० वटा टिपर स्थानीयको नियन्त्रणमा

प्रकाशित मिति: शनिबार, कात्तिक ३०, २०७६ ०९:५७