गाजामा परमाणु बम हान्ने इजरायली मन्त्रीको धम्कीपछि अरब देशहरू रुष्ट

A+ A A-

इजरायलका सम्पदा मन्त्रीले हमासद्वारा नियन्त्रित गाजा स्ट्रिपमा परमाणु बम हान्ने चेतावनी दिएपछि अरब देशहरू रुष्ट बनेका छन् । मन्त्री एमिचाई एलियाहुले गाजापट्टीमा परमाणु हतियार आक्रमण एक विकल्प भएको चेतावनी दिएपछि सिरिया, लेबनान र साउदी अरबजस्ता देशले कडा शब्दमा उक्त धम्कीको आलोचना गरेका छन् ।

इजरायलको सरकारले भने मन्त्री एलियाहुको भनाइबाट आफूलाई टाढै राखेको छ । मन्त्रिपरिषद्‌को बैठकमा समेत उनलाई भाग लिन दिइएको छैन । उनको इजरायलभित्रै आलोचना सुरु भएको छ भने उनलाई पदबाट बर्खास्त गर्नुपर्ने मागहरू उठिरहेका छन् ।

सिरियाको विदेश मन्त्रालयले परमाणु हतियार प्रयोगको भनाइपछि इजरायली सरकारालाई आतंकवादी भनेको छ । सिरियाका अनुसार इजरायली मन्त्रीको अभिव्यक्ति त्यहाँको ‘सरकारले गरेको आतंकवादको प्रमाण हो ।’

इजरायलले अहिलेसम्म आफूसँग परमाणु हतियार छ भनेर पुष्टि गरेको छैन, तर त्यहाँकै सरकारका मन्त्रीले परमाणु हतियार प्रयोगको धम्की दिनुले इजरायलले परमाणु हतियारबारे तथ्य लुकाइरहेको सिरियाली आशंका छ ।

साउदी अरबले पनि परमाणु हतियार आक्रमणको धम्कीबारे अभिव्यक्तिको निन्दा गरेको छ । साउदीको विदेश मन्त्रालयले भनेको छ, ‘इजरायली मन्त्रीको बयानले यो पुष्टि हुन्छ कि इजरायली सरकारमा कति हदसम्म अतिवाद र बर्बरता कायम छ ।’

मन्त्री एलियाहुलाई बर्खास्त गर्नुपर्नेमा निलम्बन मात्र गरेकाले इजरायली सरकारमा मानवता र नैतिकता नभएको र अन्तर्राष्ट्रिय कानुन र मूल्य मान्यतालाई उसले सम्मान नगर्ने साउदी बताउँछ ।

यसैबीच, इजरायलमा आक्रमण गरिरहेको हमासलाई समर्थन गर्ने राष्ट्र इरानले पनि इजरायली मन्त्रीको भनाइमा प्रतिक्रिया जनाएको छ । इरानका विदेशमन्त्री हुसेन अमिर अब्दुल्लाहियानले इजरायललाई आणविक हतियार नि:शस्त्रीकरण गर्न आह्वान गर्दै त्यस्ता धम्की दिनु गलत भएको बताए ।

हुसेनले भनेका छन्, ‘इजरायली मन्त्रीको परमाणु बम आक्रमणको धम्की वास्तवमा इजरायलले युद्ध हारेको प्रमाण हो । संयुक्त राष्ट्रसंघ सुरक्षा परिषद् र अन्तर्राष्ट्रिय आणविक ऊर्जा एजेन्सीले तुरुन्त कदम चाल्नुपर्छ र इजरायललाई नि:शस्त्रीकरण गर्नुपर्छ ।’

यसैबीच, लेबनानका हिज्बुल्लाह समूह जसले हमासलाई सहयोग गरिरहेका छ, उसले पनि परमाणु हतियार प्रयोगको विषयमा आपत्ति जनाएको छ । हिज्बुल्लाहले भनेको छ, ‘इजरायली मन्त्रीको उक्त बयानले अभूतपूर्व आतंकवादी गतिविधिलाई संकेत गर्छ, जसले पूरा विश्वमा खतरा सिर्जना हुन सक्छ ।’

एक महिनायता जारी यस युद्धमा इजरायली सेनाले गाजापट्टीमा २५ हजार टनभन्दा बढी बमहरू खसाएको छ, जुन दुई परमाणु बमबराबर भएको बताइएको छ ।

यसरी इजरायलसँग परमाणु हतियार रहेको विषयमा आशंका उब्जिरहँदा इजरायका प्रधानमन्त्री बेन्जामिन नेतान्याहुले भने आफ्ना मन्त्रीको भनाइ वास्तविकताभन्दा धेरै पर भएको बताएका छन् । नेतान्याहुले भनेका छन्, ‘मन्त्री एलियाहु युद्धका बेला निर्णय लिने सुरक्षा परिषद्‌का हिस्सा होइनन् । हमासविरुद्धको युद्धमा निर्देशन दिइरहेको क्याबिनेटमा उनलाई कुनै अधिकार नै छैन ।’

यस्तोमा मन्त्री एलियाहुले पनि आफ्ना भनाइ सच्याएका छन् । उनले परमाणु हतियार भनेर खतरनाक हमलालाई संकेत गर्न मात्र खोजेको उल्लेख गरेका छन् । उनी भन्छन्, ‘हामीले आतंकवादीलाई जवाफ दिनुपर्छ, किनभने आतकंवाद सही बाटो होइन ।’ बीबीसीहिन्दीको सहयोगमा

प्रकाशित मिति: मंगलबार, कात्तिक २१, २०८० १५:४६