हमासको योजनाबारे इजरायललाई पहिल्यै चेतावनी दिएकाे इजिप्टकाे दाबी, प्रधानमन्त्री भन्छन्- पूरै झुट

हमासको योजनाबारे इजरायललाई पहिल्यै चेतावनी दिएकाे इजिप्टकाे दाबी, प्रधानमन्त्री भन्छन्- पूरै झुट

A+ A A-

गत शनिबार इजरायलमाथि हमासले घातक आक्रमण गर्नुभन्दा तीन दिनअघि नै इजिप्टले सीमा सम्भावित आक्रमणबारे चेतावनी दिएको खुलेको छ । अमेरिकाको संसदीय समितिका अध्यक्षले यस्तो दाबी गरेका हुन् ।

अमेरिकी प्रतिनिधिसभाको विदेश मामिलासम्बन्धी समितिका अध्यक्ष माइकल मेकालले प्यालेस्टाइनी लडाकु समूह हमासको कथित चेतावनीबारे मिडियामा खुलासा गरेका हुन् ।

इजरायलका प्रधानमन्त्री बेन्जामिन नेतान्याहुले भने रिपोर्टलाई ‘पूर्णतः गलत’ भनेका छन् । इजरायलको ७५ वर्षे इतिहासमा हमाले सबैभन्दा घातक आक्रमण गरेको छ । अहिलेसम्म ११ सयभन्दा बढी इजरायलीको मृत्यु भइसकेको छ । इजरायली गुप्तचर संस्था मोसाद अहिले प्रश्नको घेरामा छ । हमासको आक्रमणबारे मोसादले किन सुइँको पाएन भन्ने प्रश्न सबैभन्दा धेरै उठिरहेको छ । यसलाई मोसादको सबैभन्दा ठूलो असफलताका रूपमा हेरिएको छ ।

माइकल मेकलले के भने ?

समाचार एजेन्सी एएफपीका अनुसार, मध्यपूर्वमा जारी संकटबारे अमेरिकामा बुधबार सांसदहरूका लागि बन्द ढोकाभित्र गोप्य ब्रिफिङ राखिएको थियो । उक्त बैठकपछि मेकलले भने, ‘हमासले आक्रमण गर्नुभन्दा तीन दिनअघि नै इजिप्टले इजरायलका अधिकारीलाई यस्तै खालको कुनै घटना हुन सक्ने चेतावनी दिएको कुरा हामीलाई थाहा छ ।’

रिपब्लिकन पार्टीका मेकल टेक्सासबाट निर्वाचित सांसद हुन् । उनले भने, ‘यो गोप्य जानकारी हो । म यसबारे विस्तारमा भन्न चाहन्नँ । तर, चेतावनी दिइएको कुरा म भन्छु । यस्तो चेतावनी कुनै स्तरमा कसरी दिइएको थियो भन्ने कुरामा चाहिँ प्रश्न उठ्नुपर्छ भन्ने लाग्छ ।’

समाचार एजेन्सी एसोसिएटेड प्रेसका अनुसार, इजिप्टको गुप्तचर संस्थाका एक अधिकारीले नाम नबताउने सर्तमा भनेका छन्, ‘गाजाका तर्फबाट ‘केही ठूलै’ योजना बनिरहेको चेतावनी इजिप्टले इजरायललाई बारम्बार दिएको हो ।'

ती अधिकारीले विस्फोट हुने चेतावनी पनि आफूहरूले दिएको उनले बताए । उनले भनेका छनु, ‘आक्रमण चाँडै नै हुने र यो ठूलो हुने पूर्वजानकारी हामीले गराएका थियौँ । तर, हाम्रो चेतावनीलाई कम आँकियो ।’ इजिप्टका अधिकारीहरूका अनुसार, गाजाको खतरा आशंकालाई इजरायलले खासै वास्ता गरेन र आफ्ना बढी ध्यान वेस्ट बैंकमा केन्द्रित गरेको थियो ।

यो विषयमा जानकारी भएका इजिप्टका दुई अधिकारी (नाम नखुलाइएका) को भनाइ उद्धृत गर्दै फाइनान्सियल टाइम्सले कुनै विशेष आक्रमणको कुनै स्पष्ट जानकारी नभएको लेखेको छ । गत बुधबार इजरायलका प्रधानमन्त्री बेन्जामिन नेतान्याहुले यस खालको कुनै पनि चेतावनी दिइएको कुरा सरासर गलत भएको बताएका छन् ।

इजिप्टको उत्तरी सीमाको ठूलो भाग इजरायलको सीमासँग जोडिएको छ भने एक भाग गाजाको दक्षिणी सीमासँग गाँसिएको छ । इजिप्टले अक्सर इजरायल र हमासबीचको द्वन्द्वमा मध्यस्थतकर्ता रूपमा काम गर्दै आएको छ ।

हमासको आक्रमणपछि इजरायलले आपत्कालीन सरकारको पहिलो बैठक राखेका प्रधानमन्त्री नेतान्याहुले हमासका सबै सदस्यलाई सिध्याउने चेतावनी दिए ।

उता अमेरिकी राष्ट्रपति जो बाइडेनले नेतान्याहुसँग कुराकानी गरेको र इजरायलले युद्धका नियमहरूलाई पूर्णतः पालना गर्नुपर्ने बताएका छन् । बीबीसी इजरायलका अनुसार बाइडेनले भनेका छन्, ‘इजरायली नागरिकको आक्रोश र दुःख हामी बुझ्छौँ तर जेनेभा सम्झौता पालना गर्न हामीले इजरायललाई भनेका छौँ ।’

बाइडेनले हमासको आक्रमणको स्वागत गरेकोमा इरानलाई पनि चेतावनी दिएका छन्, ‘सावधान रहनू ।’ हमास आक्रमणको चार दिनपछि बुधबार नेतान्याहु र बेनी गेन्ट्जले राजनीतिक प्रतिद्वन्द्वितालाई अलग्गै राखेर बनेको युद्धकालीन सरकार बनाउन एक साथ उभिने निर्णय गरेका थिए । वैचारिक मतभेदका कारण दुवै नेता एकअर्काका विरोधीका रूपमा देखिएका थिए ।

नेतान्याहुको प्रस्तावित न्यायिक सुधारप्रति विपक्षी पार्टीले चर्को विरोध गरिरहेको थियो । यसलाई लिएर विपक्षी समर्थकले देशभर विरोध प्रदर्शन गरिरहेका थिए । यी प्रदर्शनलाई नेतान्याहुका राजनीतिक प्रतिद्वन्द्वीसँगै सेना र गुप्तचर विभागका पूर्ववरिष्ठ अधिकारी, पूर्वप्रधानन्यायाधीश र उद्योगी नेताले पनि समर्थन गरेका थिए ।

सेन्ट्रिस्ट नेसनल युनिटी पार्टीका प्रमुख बेनी गेन्ट्जले देशमा बनेको नयाँ सरकार ‘एकमत’मा हमासजस्तो खतरालाई धर्तीबाट पूर्णतः मेटाउनका लागि बनेको बताएका छन् । देशको नयाँ युद्धकालीन सरकार गठबन्धन सरकार हो, जसमा नेतान्याहु र बेनी गेन्ट्जसँगै पूर्वरक्षामन्त्री सहभागी छन् । उता ‘वार क्याबिनेट’ नामबाट एक अस्थायी मन्त्रिपरिषद् पनि बनाइएको छ, जसमा रक्षामन्त्री योआभ गेलान्ट छन् ।

देशका प्रमुख प्रतिपक्षी नेता येर लापिडले गठबन्धनसँग टाढै बस्ने निर्णय गरेका छन् । यद्यपि, नेतान्याहु र बेनी गेन्ट्जले संयुक्त विज्ञप्तिमा ‘वार क्याबिनेट’ मा एक सिट येर लापिडका लागि राखिने बताएका छन् । विज्ञप्तिमा भनिएको छ, ‘युद्धका बेला यस्तो कुनै बिलमा कुराकानी हुने छैन । युद्धसँग असम्बन्धित कुनै निर्णय पनि गरिने छैन । वरिष्ठ अधिकारी सबैको नियुक्ति युद्ध समाप्त नहुँदासम्मका लागि बढाइएको छ ।’

आपत्कालीन सरकारले सैन्य कारबाहीका लागि राष्ट्रियस्तरमा सहमति जुटाउनेछ । यस क्रममा उसले सैन्य रणनीतिका जानकारहरूको राय पनि वार क्याबिनेटसम्म पुर्‍याउनेछ । गत साता शनिबार अचानक तथा सुनियोजित आक्रमणमा हमासका करिब १५ सय लडाकु गाजासँग जोडिएको इजरायलको सीमा तोडेर इजरायली भूमिमा छिरेका थिए । हवाई मार्ग, जमिन र समुद्रको बाटो इजरायल पसेर ठूलो संख्यामा मानिसहरूमाथि आक्रमण गरेका थिए ।

इजरायलमा हमासको आक्रमणका कारण मृत्यु हुनेको संख्या १२ सय पुगिसकेको छ । उता गाजाविरुद्ध इजरायलको जवाफी कारबाहीमा अहिलेसम्म ११ सयभन्दा धेरै मानिसको मृत्यु भएको छ । रिपोर्टका अनुसार, इजरायलका करिब १ सय ५० नागरिकलाई हमासका लडाकुले बन्धक बनाएका छन्, जसमा वृद्ध र बालबालिका पनि सामेल छन् ।

आफ्ना जवाफी आक्रमणमा इजरायलले गाजामा हमासको अड्डामा हवाई आक्रमण गरिरहेको छ । गाजाका आमनागरिकको भनाइमा यहाँ बिजुली उत्पादनको एउटै केन्द्र थियो , आक्रमणका कारण गाजामा बिजुलीको आपूर्ति बन्द भएको छ । यसै हप्ताको सुरुमा योआभ ग्यालेन्टले प्यालेस्टाइनी क्षेत्र (गाजा)विरुद्ध जवाफी कारबाहीको चेतावनी दिँदै भनेका थिए– बिजुली, पानी र खानाको आपूर्ति रोकिएको छ ।

सम्बन्धित समाचार

इजरायल-हमास लडाइँकाे नालीबेली ? (पाेडकास्ट)

बुधबार इजरायली सेनाले आफ्ना हजारौँ सैनिक गाजाको सीमानजिकै रहेकाले जमिनको बाटोबाट गाजामा आक्रमण गर्नका लागि तयार रहेको बताएको थियो । इजरायली सेना दक्षिणतिर हमासका लडाकुसँग युद्धमा व्यस्त रहँदा उत्तरमा लेबनानसँग जोडएको सीमाबाट हिज्बुल्लाह र सिरियाको सीमाबाट बम आक्रमणको घटना भयो । अमेरिकी राष्ट्रपति बाइडेनले ‘आफूमाथि भएको आक्रमणको जवाफ दिनु इजरायलको कर्तव्य हो’ भनी दिएको अभिव्यक्तिको हमासले आलोचना गरेको छ । हमासको आक्रमणलाई अमेरिकाले ‘विश्वंसको भावनाबाट प्रेरित कारबाही’ भनेको थियो ।

जो बाइडेनको अभिव्यक्तिलाई हमासले ‘भड्काव’ भनेको छ । साथै, गाजाक्षेत्रमा तनाव बढाउनका लागि बाइडेनले यस्तो अभिव्यक्ति दिएको आरोप पनि लगाएको छ । इजरायलमाथि हमासको आक्रमणपछि अमेरिकाले आफ्नो युद्धपोत, जहाज र जेट भूमध्यसागरको पूर्वी क्षेत्रमा पठाउने बताएको छ । साथै, उसले इजरायललाई हतियार र युद्धका लागि उपकरण दिने कुरा पनि गरेको छ ।

सम्बन्धित समाचारहरूः