इजरायललाई अर्को चुनौती, लेबनानका हिजबुल्लाहले पनि इजरायलमा आक्रमण थाल्यो (भिडियो)

इजरायललाई अर्को चुनौती, लेबनानका हिजबुल्लाहले पनि इजरायलमा आक्रमण थाल्यो (भिडियो)

A+ A A-

शनिबार बिहानैदेखि हमास समूहले इजरायलतर्फ भीषण आक्रमण सुरु गरेका छन् । हमासले हालसम्म ५ हजारभन्दा बढी रकेट र क्षेप्यास्त्रहरू आक्रमण गरिएको बताएको छ ।

उक्त आक्रमणपछि यतिबेला इजरायल र प्यालेस्टाइन अशान्त छन् । इजरायलले पनि प्यालेस्टाइनको गाजा क्षेत्रमा जवाफी कारबाही सुरु गरेको छ, जसलाई हमासको अखडा मानिने गर्छ ।

हमासले लगातार हजारौँ रकेट र क्षेप्यास्त्रहरू हान्दा इजरायलको आकाश रकेट र क्षेप्यास्त्रले भरिएको थियो । उक्त आक्रमणमा इजरायलका कैयौँ ठूला भवनहरू ढलेका भिडियोहरू सार्वजनिक भएका छन् ।

हमासको आक्रमण र इजरायलको जवाफी कारबाहीमा परेर ५ सयभन्दा बढीको मृत्यु भइसकेको छ भने दुवैतर्फ सयौँ घाइते भएका छन् । हमासको आक्रमणले ३ सय इजरायली नागरिकको ज्यान गइसकेको छ, उता इजरायलको जवाफी कारबाहीमा प्यालेस्टाइनका २५६ जनाको मृत्यु भएको छ ।

यस्तै, इजरायलका १९०० नागरिक घाइते छन् भने प्यालेस्टाइनका १७ सय घाइते भएका छन् । इजरायलले गाजा क्षेत्रमा भीषण कारबाही थालेकाले त्यहाँका नागरिकहरूलाई सुरक्षित स्थानमा जान इजरायलको सरकारले चेतावनी जारी गरेको छ ।

भिडियो

इजरायल र हामासबीच युद्ध चलिरहँदा लेबनानका लडाकुहरूले समेत इजरायलतर्फ आक्रमण थालेका छन् । यसरी अब युद्ध झनै हिंस्रक बन्ने अनुमान गरिएको छ । इजरायलले दाबी गर्ने क्षेत्र माउन्ट डोभमा इरान समर्थित लडाकू समूह हिजबुल्लाहले आक्रमण गरेको हो । इजरायलले भने यस द्वन्द्वमा नफस्न हिजबुल्लाहलाई चेतावनी दिएको छ ।

तर, हिजबुल्लाहले प्यालेस्टाइनी प्रतिरोधसँग ऐक्यबद्धता जनाउन आक्रमण गरेको जवाफ दिएको छ । हमासले इजरायलमा आक्रमण आफ्नो अभियान भएको बताएको छ । यस अभियानको नाम ‘अल अक्सा फ्लड’ भनिएको छ ।

हमासको आक्रमणसँगै अमेरिकाले इजरायललाई आफ्नो पूर्ण समर्थन रहने बताएको छ भने चीनले अन्तर्राष्ट्रिय समुदायले मिलेर द्वन्द्व रोक्न कदम चाल्नुपर्ने बताएको छ ।

शनिबार हमासले गाजा क्षेत्रबाट मात्र आक्रमण गरेन, हमासका लडाकुहरू इजरायलका सात स्थानमै घुसेका थिए । उनीहरू समुद्र र आकाशबाट प्यारासुटहुँदै इजरायल पसेको बताइएको छ । उनीहरूले भीषण आक्रमण गर्नुका साथै दर्जनौँ इजरायलीलाई अपहरणसमेत गरेको अन्तर्राष्ट्रिय सञ्चारमाध्यमहरूले जनाएका छन् ।

प्रकाशित मिति: आइतबार, असोज २१, २०८० १३:०२