कुनै पनि नेपाली हमासकाे अपहरणमा परेका छैनन्: एनआरएन इजरायल

तस्वीरः द टाइम्स अफ इजरायल/एएफपी

A+ A A-

इजरायलमा हमासको आक्रमणपछि कुनै पनि नेपाली अपहरणमा नपरेको गैरआवासीय नेपाली संघ इजरायलले जनाएको छ । इजरायलको दक्षिणी क्षेत्रबाट हमासले केही नेपाली विद्यार्थीलाई पनि नियन्त्रणमा लिएको भन्दै सामाजिक सञ्जालमा धेरैले पोस्ट गरिरहेका छन् ।

तर, एनआरएन इजरायलका अध्यक्ष श्रीकृष्ण भण्डारीले कुनै नेपाली अपहरणमा नपरेको बताए । ‘ती सबै गलत सूचना हुन् । नेपाली समुदायका कोही पनि अपहरणमा परेका छैनन्’, उनले शिलापत्रसित भने । उनले आफू इजरायली डिफेन्स फोर्स (आईडीएफ) सित सम्पर्कमा रहेर नेपाली समुदायबारे सूचना, जानकारी लिइरहेको बताए ।

'हामी यहाँ असाध्यै भयानक अवस्थामा गुज्रिरहेका छौँ । यस्तो बेला कसैले पनि मनगढन्ते कुरा सोसल मिडियामा लेखेर स्थितिलाई थप त्रासदिपूर्ण नबनाइदिन म आग्रह गर्छु', उनले भने । प्रभावित क्षेत्रबाट नेपाली समुदायको उद्धारका लागि आफूहरू खटिरहेको भण्डारीले जानकारी दिए ।

सम्बन्धित समाचार

मध्यपूर्वमा खतराको घण्टीः हमासको आक्रमणमा मारिने इजरायलीको संख्या ३०० पुग्यो, १५ सय घाइते

शनिबार बिहानदेखि हमासले इजरायलका विभिन्न ठाउँमा आकाश, जमिन र समुन्द्रबाट आक्रमण गरिरहेको छ । अध्यक्ष भण्डारीका अनुसार, आक्रमण अहिले पनि जारी छ ।

यस क्रममा ९ नेपाली विद्यार्थी गम्भीर रूपले घाइते भएकाे खबर बाहिरिएकाे छ । यद्यपि, इजरायलकाे तर्फबाट उनीहरूकाे अवस्थाबारे आधिकारिक विवरण सार्वजनिक भएको छैन । घाइतेहरूको उपचार भइरहेको छ ।

'घाइते अवस्थामा अस्पताल पुर्‍याइएका सबै जनाको अवस्था बुझ्ने प्रयास गरिरहेका छाैँ', भण्डारीले भने ।

सम्बन्धित समाचार

हमासले हिजाे बिहानदेखि थालेकाे आक्रमणमा परी मृत्यु हुनेकाे संख्या तीन सय नाघेकाे छ । आक्रमणमा १५ सय ९० जना बढी घाइते भएका इजरायल डिफेन्स फाेर्स (आईडीएफ) लाई उद्धृत गर्दै द टाइम्स अफ इजरायलले जनाएकाे छ । यीमध्ये तीन सयकाे अवस्था चिन्ताजनक छ । इजरायली शहरका अस्पतालहरू घाइतेहरूले भरिभराउ बनेका छन् ।

इजरायलले आफू युद्धमा रहेको भन्दै हिजैदेखि प्रत्याक्रमण थालेकाे छ । इजरायलकाे जवाफी आक्रमणमा कति मारिए भन्ने विवरण सार्वजनिक भएकाे छैन ।

गाजाका केही सीमावर्ती समुदायलाई प्यालेस्टाइनी विद्राेही समूह हमासकाे नियन्त्रणबाट मुक्त गराउने इजरायली सेनाकाे प्रयासका क्रममा नरसंहारको अवस्था बनेकाे बताइएकाे छ । इजरायली अखबार जेरुसलेम पाेस्टका अनुसार, हमासले सीमाभन्दा २४ किलोमिटर टाढासम्मका शहर र अन्य समुदायसहित दक्षिणी इजरायलका २२ ठाउँमा आक्रमण गरेको छ । केही स्थानसम्म आक्रमणकारीहरू बन्दुक बोकेर घण्टौँ घुमेका थिए । 'यस क्रममा उनीहरूले नागरिक र सैनिकमाथि गोली बर्साए, यीमध्ये कति नागरिक आफ्नै घरमा मारिए र केही सडकमै मारिए । एउटा ठूलो आउटडोर पार्टीमा पनि मानिसहरू मारिए', द टाइम्स अफ इजरायलमा समाचार छ ।

शनिबार बिहानदेखि हमासले इजरायलमाथि हवाइ, समुद्री र स्थल आक्रमण थालेकाे हाे । हमासले यो आक्रमणलाई इजरायलविरुद्धको 'अपरेसन' भनेको छ । तर, इजरायलले यसलाई 'युद्ध' भनेको छ । इजरायली प्रधानमन्त्री बेन्जामिन नेतन्याहुले हमासलाई यसको कठोर जवाफ दिने बताएका छन् ।

इजरायल र हमासबीचकाे लडाइँमा प्यालेस्टाइनी र इजरायली गरी गतवर्ष सयभन्दा बढीकाे मृत्यु भएकाे थियाे । सन् २०१४ मा पनि प्यालेस्टाइनका तर्फबाट यस्तै आक्रमण भएको थियो । त्यो बेला ५२ दिनसम्म लगातार हमासले बम हानेको थियो । २०१८ मा पनि तनाव चुलिएकाे थियाे ।

के हाे विवाद ?

इजरायल-प्यालेस्टाइन विवादकाे जरा लामाे छ । हमास प्यालेस्टाइनीकै अधिकार स्थापित गर्ने भनेर खुलेको संगठन हो । तर यसले हिंस्रक आक्रमण गर्ने गरेको छ । जमिनको कुरा गर्ने हो भने प्यालेस्टाइन र इजरायल नङ र मासुजस्तै हुन् । अर्थात् इजरायलभित्रै प्यालेस्टाइन छ, प्यालेस्टाइनभित्रै इजरायल छ तर भावनामा उनीहरूबीच आकाश जमिनको अन्तर छ ।

इजरायलीले आफ्नो जमिन मिचेर साम्राज्य खडा गरेको प्यालेस्टाइनीहरू बताउँछन् । जमिनकै विवादमा सन् १९६७ मा इजरायल र वरिपरिका इस्लाम देशबीच युद्ध भएको थियो । तर युद्धमा विजयी भएर इजरायलले प्यालेस्टाइन, जोर्डनलाई सम्झौताका लागि बाध्य पारेको थियो । त्यसपछि पनि प्यालेस्टाइनका तर्फबाट हमास र इजरायलबीच भयंकर लडाइँ भएका थिए ।

इजरायल र प्यालेस्टाइनबीचकाे विवादकाे मुख्य जडकाे कुरा गर्ने हाे भने, त्याे जेरुसेलम हाे । याे पुरानाे विवादमा अरबी मुलुकहरू प्यालेस्टाइनकाे पक्षमा छन् । जाेर्डन भने इजरायलसँग कतिपय सम्झाैताले बाँधिएकाे छ । जेरुसेलम अहिले इजरायलकाे राजधानी हाे । तर, प्यालेस्टाइन पूर्वी जेरुसेलमलाई आफ्नो भावी राष्ट्र मान्छ । संसारको सबैभन्दा पुरानो यो शहरलाई मुस्लिम, यहुदी र क्रिस्चियनहरू आफ्नो पवित्र धार्मिक स्थल मान्छन् । प्यालेस्टाइन याे भूभाग इजरायलले छाेडाेस् भन्ने चाहन्छ । तर, इजरायलले यो भूमिमा आफ्नो अधिकार रहेको र फिर्ता नहुने बताउँदै आएको छ ।

पछिल्लो आक्रमणमा ठूलो संख्यामा इजरायली मारिएकाले यो युद्धले भयानक रूप लिनसक्ने अनुमान गरिएको छ । किनकि, आफ्नो क्षतिमा इजरायलले कठोर र क्रुर जवाफी हमला गर्ने गरेको छ ।

प्रकाशित मिति: आइतबार, असोज २१, २०८० ०८:३९