राष्ट्र संघको महासभामा उपस्थित भए पनि आमनेसामने भएनन् जेलेन्स्की र लाभरोभ, के–के भने ?

राष्ट्र संघको महासभामा उपस्थित भए पनि आमनेसामने भएनन् जेलेन्स्की र लाभरोभ, के–के भने ?

A+ A A-

रुसले युक्रेनमा आक्रमण गरेको १९ महिना पूरा हुन लागेको छ । अझै पनि दुवै देशका सेनाबीच लडाइँ जारी छ । यस्तोमा यतिबेला युद्धमा होमिएका दुवै देशका शीर्ष नेताहरू एउटै कार्यक्रममा उपस्थित भएका छन् ।

बुधबार युक्रेनका राष्ट्रपति भोलोदिमिर जेलेन्स्की र रुसका विदेशमन्त्री सर्गेई लाभरोभ राष्ट्र संघको महासभामा उपस्थित त भए तर उनीहरू आमनेसामने भएनन् ।

युद्धमा होमिएका नेताहरूको जम्काभेट आशा गरिए पनि त्यो हुन सकेन । किनभने रुसी विदेशमन्त्री लाभरोभ महासभामा उपस्थित हुनुअगाडि नै जेलेन्स्की आफ्ना भनाइहरू राखेर बाहिरिइसकेका थिए ।

जेलेन्स्की र लाभरोभले सम्भावित आमनेसामने हुने अवस्थालाई टार्दा यी नेताहरूले एकअर्काका प्रतिनिधिहरूलाई समेत नहेरेको समाचार संस्था एपीले जनाएको छ ।

जेलेन्स्कीले आफ्नो सम्बोधनमा रुसलाई आतंकवादी राष्ट्र भन्दै युक्रेनमा रुसी आक्रमणको घोर निन्दा गरे । उनले रुसलाई भिटो अधिकारबाट वञ्चित गर्नुपर्ने पनि माग गरे । जेलेन्स्कीले भनेका छन्, ‘रुसजस्तो दुष्टलाई विश्वास गर्न सकिँदैन । रुसलाई एकजुट भएर रोक्नुपर्छ । जबसम्म रुसी आक्रमणलाई रोक्न सकिँदैन, तबसम्म जलवायु परिवर्तनजस्ता साझा समस्यालाई सम्बोधन गर्न सकिँदैन ।’

जेलेन्स्की थप भन्छन्, ‘युद्ध अपराधलाई दण्डित गर्नुपर्छ, निर्वासित व्यक्तिहरू घर फर्कनुपर्छ, र अर्काको देश कब्जा गर्नेहरूले आफ्नै भूमिमा फर्कनुपर्छ ।’

उनकै छेउमा राष्ट्र संघका लागि रुसी प्रतिनिधि दिमित्री पोलियान्स्की पनि थिए । जेलेन्स्कीले रुसविरुद्ध बोलिरहँदा उनले फोन चलाएर जेलेन्स्कीका भनाइहरू बेवास्ता गरिरहेका थिए ।

आफ्ना भनाइहरू राखेर राष्ट्र संघको महासभाबाट जेलेन्स्की बाहिरिएपछि रुसी विदेशमन्त्री लाभरोभ बैठकमा उपस्थित भएका थिए । उनले सो क्रममा जेलेन्स्कीले भिटो शक्ति खारेजीको विषयमा बोलेको सन्दर्भलाई जोड्दै भने, ‘भिटोको अधिकार राष्ट्र संघको बडापत्रमा संस्थालाई विभाजित गर्न सक्ने निर्णयहरू अवलम्बन गर्नबाट रोक्नका लागि स्थापित एक वैध साधन हो ।’ राष्ट्र संघको सुरक्षा परिषद्‌का पाँच स्थायी सदस्यलाई भिटो शक्तिको अधिकार छ । त्यसमा रुस पनि पर्छ ।

लाभरोभले भनेका छन्, ‘युक्रेनले क्राइमिया र डोनबासको जनसंख्यालाई प्रतिनिधित्व गर्दैन, र त्यो प्रमाणित गर्न आवश्यक छैन । किभ शासनको आपराधिक कार्यलाई पश्चिमा राष्ट्रबाट निःसर्त समर्थन प्राप्त हुनु त्यो आत्मनिर्णयको सिद्धान्तको उल्लङ्घनबाहेक केही होइन ।’

यसैबीच, रुसको प्रमुख सहयोगी इरान जसले रुसलाई ड्रोन हतियार दिइरहेको छ, का राष्ट्रपति इब्राहिम रायसीले अमेरिकाका कारण युक्रेनमा युद्ध लम्बिएको आरोप लगाए । उनका अनुसार युरोपलाई कमजोर बनाउन अमेरिकाले खेल रचिरहेको छ ।

उनले राष्ट्र संघको महासभामा भनेका छन्, ‘संयुक्त राज्य अमेरिकाले युरोपेली देशहरूलाई कमजोर बनाउन युक्रेनमा हिंसाको आगो सल्काएको छ । दुर्भाग्यवश यो दीर्घकालीन योजना हो ।’

प्रकाशित मिति: बिहीबार, असोज ४, २०८० १७:२१