तीनपल्टका डब्लुडब्लुई च्याम्पियन ब्रे वायटकाे निधन, ट्रिपल एचले खुलाए कारण

तीनपल्टका डब्लुडब्लुई च्याम्पियन ब्रे वायटकाे निधन, ट्रिपल एचले खुलाए कारण

A+ A A-

वर्ल्ड रेसलिङ इन्टरटेन्मेन्ट (डब्लुडब्लुई) स्टार ब्रे वायटले ३६ वर्षको उमेरमा हिजो अन्तिम सास लिए । उनको वास्तविक नाम विन्डह्याम रोटुन्डा हो । जटिल तथा अज्ञात खालको स्वास्थ्य समस्यासँग जुध्ने क्रममा उनी केही महिनायता डब्लुडब्लुईमा निष्क्रिय थिए ।

वायट सन् २००९ देखि डब्लुडब्लुईमा जोडिएका थिए । यद्यपि, सन् २०२१ र २०२२ मा उनी डब्लुडब्लुईमा थिएनन् । उनलाई एक वर्षका लागि बाहिर राखिएको थियो । उनी गत वर्ष सेप्टेम्बरमा धुमधाम र रहस्यमय कथाका साथ डब्लुडब्लुईमा फर्केका थिए ।

वायट डब्लुडब्लुईमा तीनपल्टका विश्व च्याम्पियन हुन्, जसमध्ये एकपल्ट उनी डब्लुडब्लुई र दुईपल्ट युनिभर्सल च्याम्पियन बनेका थिए । अगस्ट २०१८ देखि २०१९ सम्म विश्राम लिएपछि उनी नयाँ चरित्र, द फिण्ड बनेर फर्किए ।

यी पहलवान लामो संघर्ष गरी स्थापित थिए । उनका बुबा हल अफ फेमर माइक रोटुन्डा थिए । समाचारअनुसार, उनका हजुरबुबा ब्ल्याकज्याक मुलिगनले एक व्यावसायिक पहलवानका रूपमा आफ्नो छाप छोडेका थिए । यही परम्परालाई जारी राख्दै उनका काका, बेरी र केन्डल विन्डह्यामले पनि कुस्तीको दुनियाँमा आफ्नो करिअर बनाएका थिए ।

के कारण भयो वायटकाे निधन ?

डब्लुडब्लुईका पल लेवेस्क ‘ट्रिपल एच’ ले सामाजिक सञ्जालमामार्फत वायटको निधनबारे जानकारी दिएका थिए । उनका अनुसार, वायटको मृत्यु हृदयघातबाट भएको हो । ‘अहिले डब्लुडब्लुई अफ फेमर माइक रोटुन्डाको फोन आयो, जसले हामीलाई दुखद् खबर सुनाए । हाम्राे डब्लुडब्लुई परिवारका सदस्य, विन्डह्याम रोटुन्डा, जसलाई ब्रेको नामले पनि चिनिन्छ, उनको आज अप्रत्याशित निधन भएको छ । हाम्रो समवेदना उनको परिवारलाई छ । यो समय हरकोहीले उनीहरूको निजताको सम्मान गरुन्, हामी यही चाहन्छौँ’, पल लेवेस्कले ट्वीट गरेका छन् ।

प्रकाशित मिति: शनिबार, भदौ ९, २०८० ०८:०९