मधेश प्रदेशमा एक वर्षमा सवारी दुर्घटनामा परी ५४६ जनाको मृत्यु

A+ A A-

आर्थिक वर्ष २०७९/८० मा मधेश प्रदेशमा भएका सवारी दुर्घटनामा परी ५४६ जनाको मृत्यु भएको छ । प्रदेश प्रहरी कार्यालय जनकपुरका अनुसार एक वर्षको अवधिमा प्रदेशका ८ वटै जिल्लामा भएका सवारी दुर्घटनामा परी ५४६ जनाले ज्यान गुमाएका हुन् ।

प्रहरीका अनुसार २०७९/८० मा भएका ५ हजार ९ सय ८८ सवारी दुर्घटनामा ५ सय ४६ जनाको मृत्यु भएको छ भने २ हजार २ सय जना गम्भिर घाइते भएका छन् । त्यस्तै, ७ हजार ४ सय ७६ जना समान्य घाइते भएका छन् ।

त्यस्तै, सोही अवधिमा मधेशका ८ वटै जिल्लामा ३ लाख ९३ हजार १८३ जनालाई ट्राफिक प्रहरीले कारबाही गरी २६ करोड ८६ लाख ८६ हजार ५ सय रुपैयाँ राजस्व उठाएको छ । प्रहरीले गत आर्थिक वर्षमा ९८७ वटा सवारीसाधनहरूलाई नियन्त्रणमा लिएको छ ।

बढ्दो दुर्घटना न्यूनीकरणका लागि ८ वटै जिल्लामा ६ हजार ३०६ पटक चेतनामुलक कार्यक्रम गरिएको प्रहरीले जानकारी दिएको छ । त्यसमा ५ लाख २६ हजार १२१ जनालाई ट्राफिकसम्बन्धी जनचेतना जगाएको मधेश प्रदेश प्रहरी कार्यालयका प्रवक्ता प्रहरी उपरीक्षक महेन्द्र कुमार श्रेष्ठले जानकारी दिए ।

मधेश प्रदेशबाट प्रहरीले उठायो ९५ करोड राजस्व

आर्थिक वर्ष २०७९/८० मा प्रहरीले मधेश प्रदेशका आठ वटै जिल्लाबाट ९४ करोड ९६ लाख ५५ हजार २२० रुपैयाँ मूल्य बराबरको सवारीसाधन, लत्ताकपडा, खाद्यान्नलगायतका समानहरू नियन्त्रणमा लिइ भन्सारमा बुझाएको छ ।

प्रदेश प्रहरी कार्यालयका अनुसार भारतीय सीमासँग जोडिएका विभिन्न नाकाबाट चोरी तस्करी भई नेपाल भित्रिएका सवारीसाधनलगायतका समानहरू नियन्त्रणमा लिइ सम्बन्धित जिल्लाका भन्सार कार्यालयलाई बुझाइएको प्रवक्ता श्रेष्ठले बताए ।

मधेश प्रदेशअन्तर्गत रहेका ८ वटै जिल्लाको जिल्लागत तथ्याङ्गक हेर्दा आर्थिक वर्ष २०७९/८० मा सबभन्दा बढी पर्सा जिल्लाबाट तस्करीका मालसमान प्रहरीले नियन्त्रणमा लिएको छ । प्रहरीले पर्सामा ४७ करोड ७८ लाख ४८ हजार ९५ रुपैयाँको मालसमान नियन्त्रणमा लिइ भन्सार कार्यालयलाई बुझाएको छ ।

त्यस्तै, सप्तरीमा ४ करोड ५ लाख ८८ हजार ९२६, सिरहामा ३ करोड ६४ लाख ७ हजार ७०२, धनुषामा ७ करोड ८१ लख ९२ हजार ३५६, महोत्तरीमा ७ करोड २ लाख ५६ हजार ८९६, सर्लाहीमा ७ कोड ११ लाख ३४ हजार ५९५, रौतहटमा ४ करोड ९० लाख ४२ हजार ६६१, वारामा १२ करोड ६१ लख २३ हजार ९८९ मूल्य बराबरको समान नियन्त्रणमा लिइ भन्सारमा बुझाइएको प्रवक्ता श्रेष्ठले जानकारी दिए ।

प्रकाशित मिति: बिहीबार, साउन ११, २०८० २०:३८