गुल्सन झा: लक्ष्य अलराउण्ड प्रदर्शन

A+ A A-

गुल्सन झा पछिल्लो समय नेपाली राष्ट्रिय क्रिकेट टिमका उदाउँदा अलराउण्डर हुन् । नेपाली टिम धान्ने एक खम्बा पनि । उनको अलराउण्डर प्रदर्शनले यही भन्छ ।

गुल्सन झा भन्नेबित्तिकै त्रिवि क्रिकेट मैदानमा नेपालले यूएईलाई पराजित गर्दै विश्वकप छनोटमा सिधै पुगेको त्यो खेल सबैको दिमागमा आउँछ । त्रिवि मैदानमै यूएईविरुद्ध नै एसीसी प्रिमियर कपको फाइनल खेल त सबैलाई याद नै होला । यी दुवै खेलमा खेल विजेताका रूपमा गुल्सन उदाए ।

गुल्सनको उदय यसरी भयो, जसको ब्याटिङले यूएईको सपना मरुभूमिकै बालुवामा विलिन बनायो । यता, उनकै उच्च प्रदर्शनमा नेपालले भने महत्त्वपूर्ण दुई ठूला उपलब्धि पायो । त्रिवि क्रिकेट मैदानमा २ चैत २०७९ मा आईसीसी क्रिकेट विश्वकप लिग-२ को अन्तिम खेलमा यूएईले नेपाललाई ३११ रनको चुनौती दियो । यो खेलमा यूएईलाई पराजित गरे नेपाल सिधै विश्वकप छनोटमा प्रवेश गर्ने थियो ।

नेपाल डिएल मेथोडमा निकै पछि थियो । एकपछि अर्को विकेट गइरहँदा मौसमले पनि नेपाललाई साथ दिइरहेको थिएन । ४२ ओभर बलिङमा यूएईका कप्तान मोहम्मद वासिम आए । यो ओभरको पहिलो बलमा रन नलिएका गुल्सनले दोस्रो बलमा दुई रन बटुले । त्यसपछि तेस्रो बलमा छक्का र त्यसपछि चौथो, पाँचौँ तथा छैटौँ बलमा लगातार तीन चौका प्रहार गर्दै यो ओभरमा मात्रै उनले २० रन बटुले । योसँगै नेपाल यूएईभन्दा डीएलमा अगाडि पुग्यो ।

खराब मौसमका कारण डीएलमा यूएईलाई ९ रनले पराजित गर्दै नेपाल विश्वकप छनोटमा पुग्न सफल भयो । यो सबैले सदाबहार सम्झिरहने क्षण थियो । ४८ बलमा चार चौका र दुई छक्का प्रहार गरेका गुल्सनले अविजित ५० रन बनाए । यो उनको एकदिवसीय अन्तर्राष्ट्रिय क्रिकेटमा पहिलो अर्धशतक थियो ।

gulshan jha1687173949.jpg

वैशाख १८ र १९ गते त्रिवि क्रिकेट मैदानमा एसीसी प्रिमियर कपको फाइनल खेलमा यूएईले नेपालाई ११८ रनको सामान्य चुनौती दियो । तर, २२ रन हुँदा नेपालले महत्त्वपूर्ण तीन विकेट गुमायो । तेस्रो नम्बरमा ब्याटिङ गर्न आएका गुल्सन फेरि नेपालका लागि नायक बने, यूएईका लागि भने खलनायक । गुल्सनले भीम सार्कीसँग उत्कृष्ट साझेदारी गर्दै नेपाललाई सात विकेटको जित दिलाए । ८६ बल खेलेका गुल्सनले ६ छक्का र तीन चौका प्रहार गर्दै ६७ रन बनाए । ओडीआईमा गुल्सनको यो दोस्रोपटक अर्धशतक थियो । गुल्सनकै उत्कृष्ट प्रदर्शनमा यूएईलाई हराउँदै नेपाल एसिया कपमा प्रवेश गर्‍यो । जहाँ नेपालले भारत र पाकिस्तानसँग खेल्नेछ ।

जिम्बाब्बेमा असार ३ देखि सुरु भएको विश्वकप छनोट २४ गतेसम्म चल्नेछ । समूह ‘ए’ मा आयोजक राष्ट्र जिम्बाब्बेसँगै नेपाल, वेष्ट इन्डिज, नेदरल्यान्ड्स र अमेरिका छन् । समूह ‘बी’ मा श्रीलंका, आयरल्यान्ड, यूएई, स्कटल्यान्ड र ओमान छन् ।

gulsan jha 11687174684.jpg

प्रतियोगिताको उद्घाटन खेलमा नेपाल आयोजक जिम्बाब्बेसँग आठ विकेटले पराजित भयो । टस हारेर पहिले ब्याटिङ गरेको नेपालले निर्धारित ५० ओभरमा आठ विकेटको क्षतिमा २९० रन बनाएको थियो । २९१ रनको चुनौती पछ्याउँदै ब्याटिङ गरेको जिम्बाब्बेले ४४.१ ओभरमा दुई विकेटको क्षतिमा लक्ष्य भेट्टायो ।

gulsan jha1687328035.jpg

गुल्सनले एक विकेट लिँदा एक विकेट सोमपाल कामीले लिए । गुल्सनले जिम्बाब्बेविरुद्ध १३ रन मात्रै बनाए । अमेरिकाविरुद्ध नेपालले आफ्नो दोस्रो खेलमा ६ विकेटको जित निकाल्दा गुल्सनले तीन विकेट लिए । नेपालको लक्ष्य विश्वकप छनोटको सुपर सिक्समा पुग्ने रहेको छ । नेपाललाई सुपर सिक्समा पुर्‍याउन गुल्सन आफ्नो बलबुताले भ्याएसम्म संघर्ष गर्ने लक्ष्यमा छन् । अब नेपालले असार ७ गते विश्वविजेता वेष्ट इन्डिजसँग खेल्ने नेपालले समूह चरणतर्फ आफ्नो अन्तिम खेल नेदरल्यान्ड्ससँग असार ९ गते खेल्नेछ ।

यो पनि पढ्नुहोस्ः