नेपालको आसः अब फेरि दीपेन्द्रको ब्याट र बल बोल्नेछ

A+ A A-

जस्तो आक्रामक ब्याटिङ उस्तै किफायती बलिङ । यही परिचयले राष्ट्रिय टिममा निरन्तर स्थान बनाउँदै आएका खेलाडी हुन्- दीपेन्द्रसिंह ऐरी । तर, पछिल्लो समयमा उनको ब्याट चलेको छैन ।

दीपेन्द्र ब्याटिङ, बलिङ र फिल्डिङ तीनै पक्षमा अब्बल सावित भएका खेलाडी हुन् । दीपेन्द्रले फिल्डिङबाट मात्रै विपक्षी टिमको १०-१५ रन कम गराउँछन् भन्नेहरू पनि छन् । प्रतिभावान् खेलाडी दीपेन्द्रको ब्याटिङ भने पछिल्लो समय राम्रो भइरहेको छैन । ब्याटिङमा जम्न नसकिरहेका बेला उठेका प्रश्नको जवाफ दीपेन्द्रले जिम्बाब्बेमा हुने विश्वकप छनोटमा ब्याटिङबाटै दिनुपर्छ । त्यसो त, दीपेन्द्र नेपालका नम्बर वान अलराउण्डर हुन् । यसमा दुई मत छैन ।

पछिल्लो खेलमा राम्रो प्रदर्शन गर्न नसक्दा दीपेन्द्रमाथि प्रश्न उठ्न थालेको छ । हुन पनि उनको ब्याट चल्न नसकेको पनि धेरै भयो । ब्याट नचले पनि उनले बलिङबाट टिमलाई राहत दिने गरेका छन् । टिमबाट निरन्तर खेल्दै आइरहेका दीपेन्द्र गत वैशाखमा त्रिवि क्रिकेट मैदानमा सम्पन्न एसीसी प्रिमियर कपको फाइनलमा बेन्चमा बस्नुपरेको थियो । उनको स्थानमा गुल्सन झाले टिममा स्थान बनाएका थिए । गुल्सनकै उत्कृष्ट प्रदर्शनमा नेपाल यूएईलाई सात विकेटले हराउँदै उपाधिसहित एसिया कपमा छनोट भएको थियो ।

दीपेन्द्र ब्याटिङकै कारण टिममा परेनन् । पछिल्लो १० खेलमा दीपेन्द्र यूएईविरुद्ध ७, पपुवा न्युगिनीविरुद्ध ८, यूएईविरुद्ध ४, पपुवा न्युगिनीविरुद्ध ७ र यूएईविरुद्ध ३४ रन बनाएका छन् । त्यस्तै, यूएईविरुद्ध नै १०, मलेसियाविरुद्ध ५, ओमानविरुद्ध ७, कतारविरुद्ध १२ र कुवेतविरुद्ध शून्य रन बनाएका छन् ।

त्यसो त दीपेन्द्र नै यस्ता ब्याटर हुन्, नेपालका सबै ब्याटर सस्तैमा समेटिँदा समर्थकहरू दीपेन्द्र छन् नि भनेर ढुक्क हुन्थे । दीपेन्द्रमाथि टिमको पनि पूर्ण विश्वास हुन्थ्यो । उनको ब्याटिङमा पनि त्यस्तै जादुमयी चल्थ्यो । एकदिवसीय अन्तर्राष्ट्रिय क्रिकेट (ओडीआई) मा दीपेन्द्रले एक शतक बनाउँदा दुई अर्धशतक बनाएका छन् । सन् २०२२ मार्च २६ तारिखमा दीपेन्द्रले कीर्तिपुरमा पपुवा न्युगिनीविरुद्ध शतक बनाएका थिए । उनले बनाएका अर्धशतकमा स्कटल्यान्डविरुद्ध अविजित ८५ र यूएईविरुद्ध ५४ रन जोडेका छन् ।

अब आउने खेलमा भने प्लेइङ इलाभेनमा पर्न दीपेन्द्रले ब्याटिङमा सुधार गर्नैपर्छ । बलिङमा भने उनी जमिरहेका छन् । कठिन अवस्थामा पनि उनले नेपाललाई विकेट दिलाइरहेका छन् । दीपेन्द्रले अर्को ऐतिहासिक फड्को मारेका छन् । उनलाई मंगलबार राति ग्लोबल टी-२० क्यानडा लिगका लागि मोन्ट्रयल टाइगर्सले अनुबन्धन गरेको छ । योसँगै अन्तर्राष्ट्रिय फ्रेन्चाइज लिगमा समेत दीपेन्द्रको प्रवेश भएको छ । आफूलाई अब्बल सावित गर्न उनले विश्वकप छनोटमा मात्रै होइन, ग्लोबल टी-२० क्यानडा लिगमा पनि राम्रो खेल्नुपर्ने हुन्छ ।

dipendra and kushal bhurtel1686737694.jpg

यतिबेला दीपेन्द्रको अर्जुनदृष्टि नै विश्वकप छनोट हो । जिम्बाब्बेमा असार ३ देखि २४ गतेसम्म विश्वकप छनोट प्रतियोगिता हुँदैछ । समूह ‘ए’ मा आयोजक राष्ट्र जिम्बाब्बेसँगै नेपाल, विश्वकप विजेता वेष्ट इन्डिज, नेदरल्यान्ड्स र अमेरिका छन् । समूह ‘बी’ मा श्रीलंका, आयरल्यान्ड, यूएई, स्कटल्यान्ड र ओमान छन् । असार ३ गते जिम्बाब्बेसँग खेल्दै विश्वकप छनोटको उद्घाटन गर्ने नेपालले त्यसपछि असार ५ गते अमेरिकासँग खेल्नेछ । असार ७ गते विश्वविजेता वेष्ट इन्डिजसँग खेल्ने नेपालले समूह चरणतर्फ आफ्नो अन्तिम खेल नेदरल्यान्ड्ससँग असार ९ गते खेल्नेछ ।

नेपालको लक्ष्य नै विश्वकप छनोटको सुपर सिक्समा पुग्ने छ । सुपर सिक्समा पुगेमा नेपालका ठूलो उपलब्धि हुनेछ । सुपर सिक्सपछि नेपालको लक्ष्य विश्वकपमा पुग्ने हुनेछ । यही ऐतिहासिक सफलताको एक योद्धा बन्ने लक्ष्यमा छन् दीपेन्द्र ।

यो पनि पढ्नुहोस्ः