प्रदर्शन सुधार्ने लक्ष्यमा कुशल

A+ A A-

कुशल भुर्तेल नेपाली क्रिकेट टिमका मुख्य खेलाडी हुन् । ओपनर ब्याटर कुशल उत्कृष्ट प्रदर्शन गर्दै जिम्बाब्वेमा हुने विश्वकप छनोट प्रतियोगितामा नेपाललाई जित दिलाउने लक्ष्यमा छन् ।

जिम्बाब्वेमा असार ३ देखि २४ गतेसम्म विश्वकप छनोट प्रतियोगिता हुँदैछ । समूह ‘ए’ मा आयोजक राष्ट्र जिम्बाब्वेसँगै नेपाल, विश्वकप विजेता वेस्ट इन्डिज, नेदरल्यान्ड्स र अमेरिका छन् । समूह ‘बी’ मा श्रीलंका, आयरल्यान्ड, यूएई, स्कटल्यान्ड र ओमान छन् । असार ३ गते जिम्बाब्वेसँग खेल्दै विश्वकप छनोटको उद्घाटन गर्ने नेपालले त्यसपछि असार ५ गते अमेरिकासँग खेल्नेछ । असार ७ गते विश्वविजेता वेस्ट इन्डिजसँग खेल्ने नेपालले समूह चरणततर्फ आफ्नो अन्तिम खेल नेदरल्यान्ड्ससँग असार ९ गते खेल्नेछ । अहिले विश्वकप छनोटकै लागि नेपालले दक्षिण अफ्रिकामा अभ्यास गरिरहेको छ ।

२६ वर्षीय कुशल भुर्तेल आफ्नो प्रदर्शनलाई सुधार गर्दै टिमलाई उत्कृष्ट दिने लक्ष्यमा छन् । तर, उनको प्रदर्शन एकनासको छैन । कुशलले खेलेका पछिल्ला १३ एकदिवसीय अन्तर्राष्ट्रिय खेलमा एक शतक, दुई अर्धशतक बनाएका छन् । २०७९ फागुन २ गते आईसीसी क्रिकेट विश्वकप लिग टुअन्तर्गत टीयू क्रिकेट मैदानमा नामिबियाविरुद्ध कुशलले शतक बनाएका थिए । कुशलले एकदिवसीय अन्तर्राष्ट्रिय क्रिकेटमा बनाएको त्यो शतक नै उनको पहिलो शतक हो ।

अर्को ऐतिहासिक सफलताको लडाइँमा कप्तान रोहित

त्यसपछि उनले स्कटल्यान्डविरुद्ध १६, नामिबियाविरुद्ध एक, स्कटल्यान्डविरुद्ध एक, पपुवा न्युगिनीविरुद्ध ५६, यूएईविरुद्ध पाँच, पपुवा न्युगिनीविरुद्ध शून्य, पपुवा न्युगिनीविरुद्ध ४५, यूएईविरुद्ध आठ, पपुवा न्युगिनीविरुद्ध ३३, यूएईविरुद्ध ५०, ओमानविरुद्ध शून्य र यूएईविरुद्ध एक रन बनाएका छन् ।

कुशलले अहिलेसम्म ३८ एकदिवसीय अन्तर्राष्ट्रिय खेल खेलेका छन् । जसमा ३७ पारीबाट उनले ७७३ रन बनाएका छन् । उनले एक शतक र पाँच अर्धशतक बनाएका छन् । त्यस्तै, उनले ३८ खेलमध्ये आठ इनिङ्सबाट चार विकेट लिएका छन् ।