विश्वकप छनाेट: विपक्षी टिमको नजरमा सन्दीप

A+ A A-

सन्दीप लामिछाने नेपालका सबैभन्दा भरपर्दा खेलाडी हुन् । अनुभवी खेलाडी सन्दीप किफायती बलिङसँगै राम्रो ब्याटिङ गर्न सक्छन् । उनै सन्दीपसँग विपक्षी टिमका ब्याटर निकै पनि सजक हुने गर्छन् ।

सन्दीप यस्ता नेपाली खेलाडी हुन्, जसको नाममा दुर्लभ विश्व कीर्तिमानसम्म छ । कीर्तिमानी खेलाडीमाथि विश्वकप छनोट खेल्ने विपक्षी टिमको नजर पुग्नु स्वाभाविक नै हो । जिम्बाब्वेमा असार ३ देखि २४ गतेसम्म हुने विश्वकप छनोट प्रतियोगितामा सबैकाे नजर सन्दीपमाथि हुनेछ ।

समूह ‘ए’ मा आयोजक राष्ट्र जिम्बाब्वेसँगै नेपाल, विश्वकप विजेता वेस्ट इन्डिज, नेदरल्यान्ड्स र अमेरिका छन् । समूह ‘बी’ मा श्रीलंका, आयरल्यान्ड, यूएई, स्कटल्यान्ड र ओमान छन् । असार ३ गते जिम्बाब्वेसँग खेल्दै विश्वकप छनोटको उद्घाटन गर्ने नेपालले त्यसपछि असार ५ गते अमेरिकासँग खेल्नेछ । असार ७ गते विश्वविजेता वेस्ट इन्डिजसँग खेल्ने नेपालले समूह चरणततर्फ आफ्नो अन्तिम खेल नेदरल्यान्ड्ससँग असार ९ गते खेल्नेछ । विश्वकप छनोटकै लागि नेपालले दक्षिण अफ्रिकामा अभ्यास गरे आइतबार जिम्बाब्वे प्रस्थान गरिसकेकाे छ ।

गत वैशाखमा काठमाडौंमा सम्पन्न एसीसी प्रिमियर कपमा सन्दीप प्रतियोगिताका सर्वोत्कृष्ट खेलाडी घोषित भएका थिए । त्यही एसीसी प्रिमियर कपमा ओमानविरुद्ध विकेट लिएसँगै सन्दीपले विश्व कीर्तिमान पनि राखे । २२ वर्षीय सन्दीपले ओमानविरुद्धको त्यो खेलमा विकेट लिएसँगै एकदिवसीय अन्तर्राष्ट्रिय (ओडीआई) दुर्लभ विश्वकीर्तिमान राखे । सन्दीपले ४२ खेलमा १०० विकेट पूरा गर्दै अफगानिस्तानका बलर राशिद खानको सबैभन्दा छिटो १०० विकेटको विश्वकीर्तिमान तोडेका थिए ।

राशिदले ४४ खेलमा १०० विकेटको विश्वकीर्तिमान राखेका थिए । उनले सन् २०१८ मा वेस्ट इन्डिजविरुद्ध एक विकेट लिएसँगै त्यसअघि अस्ट्रेलियाका मिचेल स्टार्कको रेकर्ड तोडेका थिए । रेकर्ड तोडेपछि सन्दीपले भनेका थिए, ‘मेरो नामभन्दा अगाडि नेपालका नाम आउँछ । हामी मरेर जाउँला तर त्यो रेकर्डमा नेपालको नाम रहिरहनेछ । एकदम राम्रो उपलब्धि पाए १०० विकेटको । कोही नेपाली बलरले नै यो रेकर्ड तोडोस्’, त्यसबेला सन्दीपले भनेका थिए ।

२०७९ भदौ २१ गते सन्दीपले आफूलाई बलात्कार गरेको भन्दै नाम परिवर्तित गौशला २६ ले प्रहरीसामु उजुरी दिएकी थिइन् । सन्दीप आफ्नै गल्तिका कारण बलात्कारजस्तो जघन्य अपराधमा मुछिए । उनीविरुद्धको मुद्दा अहिले पनि काठमाडौं जिल्ला अदालतमा चलिरहेको छ । बलात्कार आरोपको मुद्दाको पेसी आगामी असार २९ गतेसम्मलाई सरेपछि सन्दीप दक्षिण अफ्रिकामा अभ्यास गरिरहेको नेपाली टिमसँग आबद्ध हुन जेठ २२ गते त्यसतर्फ गएका थिए ।

सन्दीपले छोटो समयमै धेरै थोक पाए । विश्वका प्राय: सबै फ्रेन्चाइज लिग खेलेका सन्दीपले आफ्नो सबै थोक गुमाए पनि । तर, यो यात्रामा सन्दीप भन्छन्, ‘पुबुदु दासानायके सरले मलाई जुन तरिकाले चितवनको यात्राबाट ल्याउनुभयो । राजु सरले सिकाउनुभयो । पुबुदु सरले त्यहाँबाट टिपेर यहाँसम्म ल्याउनुभयो । त्यसमाथि पारस दाइको कप्तानीमा खेल्न पाएँ ।’ उनी थप्छन्, ‘आफूलाई निकै भाग्यमानी मान्छु । सानासाना कुरामा मलाई सहयोग गर्ने, माइकल क्लार्कसँग भेटेँ, धेरै लिग खेलेँ ज–जसले मलाई सहयोग गर्नुभएको छ । त्यो सबै स्मरणीय छ ।’

२०१८ अगस्ट १ तारिखमा नेदरल्यान्ड्सविरुद्ध ओडीआईमा डेब्यु गरेका सन्दीप नेपालका पूर्वकप्तानसमेत हुन् । उनले ४३ खेलबाट १०४ विकेट लिइसकेका छन् । त्यस्तै, एकविदसीयमा उनले २८४ रन बनाएका छन् । सन्दीप जिम्बाब्वेमा हुने विश्वकप छनोटमा नेपाललाई सफलता दिलाउँदै अर्को उचाइमा पुर्‍याउने लक्ष्यमा छन् ।

यो पनि पढ्नुहोस्:

अर्को ऐतिहासिक सफलताको लडाइँमा कप्तान रोहित

प्रदर्शन सुधार्ने लक्ष्यमा कुशल

समर्थककाे नारा तयार छ- 'सोमपाल कामी, क्या दामी'

मैदानमा बल र ब्याटले कौशल देखाइरहेका कुशल

प्रकाशित मिति: आइतबार, जेठ २८, २०८० १६:५८