मैदानमा बल र ब्याटले कौशल देखाइरहेका कुशल

A+ A A-

पछिल्लो समय नेपाली क्रिकेटले राम्रो प्रदर्शन गर्दै गइरहँदा यसको श्रेय कुशल मल्ललाई पनि जान्छ । कुशल नेपाली टिमका भरपर्दा अलराउण्डर हुन् । जो विपक्षी टिमका लागि खतराको घण्टी पनि हुन् ।

टिमको प्रदर्शन खराब रहेको बेला पनि कुशल मैदानमा विपक्षी टिममाथि छक्का र चौकाको वर्षा गर्छन् । कम बोल्ने स्वभावका उनको ब्याट र बल भने बढी बोल्छ ।

उनी कठिन परिस्थितिबाट नेपाली टिमलाई सम्हालेर अगाडि लान सक्छन् । टप अर्डर र मिडिल अर्डर दुवै स्थानमा राम्रो ब्याटिङ गर्न सक्छन् । उनको बलिङ पनि त्यत्तिकै किफायती छ । पार्टटाइम बलरका रूपमा परिचित उनले विकेट पनि लिइरहेका हुन्छन् । ‘मलाई मिडिल अर्डर र टप अर्डरमा मोन्टी सरले खेलाइरहनुभएको छ । केही गाह्रो भइरहेको छैन । टिमलाई आवश्यक पर्दा जहाँबाट पनि खेल्न सक्नुपर्छ’, कुशल भन्छन् ।

कुशल त्यस्ता ब्याटर हुन्, जसको नाममा शतकमा कीर्तिमान छ । एसीसी प्रिमियर कपमा ओमानविरुद्ध कुशलले ओडीआईमा पहिलो शतक बनाउने क्रममा ५९ बलमा ९ चौका र ९ छक्का प्रहार गरे । उनी नेपालबाट एकदिवसीय अन्तर्राष्ट्रिय क्रिकेटमा सबैभन्दा छिटो शतक बनाउने खेलाडी पनि बने । ६४ बलमा १०८ रन बनाएर आउट भएका कुशलले ओमानविरुद्धको त्यो खेलमा १० छक्का हानेका थिए । त्यसो त कुशलभन्दा अघि नेपालबाट पाँच खेलाडीले ओडीआईमा शतक बनाएका थिए ।

कुशल मल्ल त्यस्ता खेलाडी हुन् जसको नाममा विश्व कीर्तिमान पनि छ । २०७६ साल माघ २५ गते आईसीसी क्रिकेट विश्वकप लिग टुअन्तर्गत अमेरिकाविरुद्धको खेलमा टीयू क्रिकेट मैदानमा कुशलले आफ्नो डेब्यू खेलमा नै अर्धशतक बनाउँदै विश्व कीर्तिमान राखेका थिए । अमेरिकाविरुद्धको त्यो खेलमा कुशलले ४९ बलमा तीन छक्का र चार चौका प्रहार गर्दै सबैभन्दा कान्छो उमेरमा अर्धशतक बनाएर विश्व कीर्तिमान राखे । उनले अर्धशतक बनाउँदा उनी १५ वर्ष ३४० दिनको भएका थिए । उनी २००४ मा जन्मेका हुन् ।

कुशलले अहिलेसम्म २२ ओडीआई खेल खेलेका छन् । जसमा एक शतक र चार अर्धशतकसहित ५१४ रन बनाएका छन् । त्यस्तै, १८ विकेट लिइसकेका छन् । कुशलले अमेरिका, यूएई, नामिबिया र स्कटल्यान्डविरुद्ध अर्धशतक बनाएका छन् । त्यसो त कुशलले एसीसी प्रिमियर कप क्रिकेट प्रतियोगितामा मलेसियाविरुद्ध अर्धशतक बनाएका छन् । उनले त्यो खेलमा अविजित ७० रन बनाएका थिए । तर, यो खेलले ओडीआई र लिस्ट ए मान्यताप्राप्त भने होइन । यसकारण अफिसियल रुपमा कुशलको यो अर्धशतक दर्ज भएन ।

प्रकाशित मिति: बुधबार, जेठ २४, २०८० २०:३५