विश्वकप छनोटः ज्ञानेन्द्रका लागि अन्तिम अवसर

A+ A A-

ज्ञानेन्द्र मल्ल नेपाली क्रिकेटका आदर्श पात्र हुन् । आफ्नो प्रदर्शन उत्कृष्ट नभए पनि ज्ञानेन्द्र टिमका अन्य सदस्यका लागि हिम्मतका पात्र हुन् । यही भएर पनि ज्ञानेन्द्रले निरन्तर टिममा स्थान बनाइरहेका छन् । तर, विश्वकप छनोट ज्ञानेन्द्रका लागि टिममा स्थान बनाइराख्न अन्तिम अवसर हुन सक्छ ।

पूर्वकप्तान ज्ञानेन्द्र नेपाली क्रिकेटका कुनै एक समयका मिडिल स्टम्प हुन् । जब ज्ञानेन्द्र क्रिजमा आउँथे, नेपाली टिमलाई जिततर्फ डोर्‍याउँथे । नेपालको जितमा उनको भूमिका मुख्य हुन्थ्यो । डिभिजन-५ देखि एकदिवसीय मान्यता हुँदै नेपाली क्रिकेट यहाँसम्म आइपुग्दासम्म ज्ञानेन्द्रको योगदान अमूल्य छ । ज्ञानेन्द्र राम्रो खुबी भएका ब्याटर हुन् । तर, पछिल्लो समय भने उनी लयमा छैनन् । एकपछि अर्को खेलमा उनको प्रदर्शन खस्किँदै गइरहेको छ ।

gyanendra malla1686562894.jpg

ज्ञानेन्द्र मल्ल पछिल्लो समय बेन्चमा बस्दै आइरहेका छन् । उनको स्थानमा भीम सार्कीले उत्कृष्ट प्रदर्शन गरिरहँदा ज्ञानेन्द्र प्लेइङ इलाभेनमा पनि पर्दै आएका छैनन् । भीमले एकपछि अर्को खेलमा राम्रो प्रदर्शन गरिरहेका छन् । तेस्रो नम्बरमा ब्याटिङ गर्ने ज्ञानेन्द्रकै पोजिसनमा भीम र कुशल मल्लले राम्रो खेलिरहँदा ज्ञानेन्द्र प्लेइङ इलाभेनमा पर्न नसकेका हुन् ।

गत वैशाखमा नेपाल एसीसी प्रिमियर कपको उपाधि जित्दै एसिया कपमा प्रवेश गर्‍यो । काठमाडौंमा सम्पन्न एसीसी प्रिमियर कपमा ज्ञानेन्द्र बेन्चमै बसे । नेपालले खेलेका पाँचै खेलमा उनी प्लेइङ इलाभेनमा परेनन् । यसअघि नेपालले आईसीसी क्रिकेट विश्वकप लिग-२ का अन्तिमका तीन खेलमा ज्ञानेन्द्र लगातार बेन्चमा बसे । गत वर्षको चैतमा त्रिवि क्रिकेट मैदानमा सम्पन्न लिग-२ को अन्तिम त्रिदेशीय सिरिजको यूएईविरुद्ध दुई र पपुवा न्युगिनीविरुद्ध एक गरी लगातार तीन खेलमा प्लेइङ सेटमा पर्न सकेनन् । त्रिवि मैदानमा लिग-२ अन्तर्गत पपुवा न्युगिनीविरुद्ध खेलेको खेल नै ज्ञानेन्द्रको पछिल्लो खेल हो । यसपछि नेपालले लगातार आठ खेल खेल्दा ज्ञानेन्द्र बेन्चमै रहे ।

gyanendra malla 21686562911.jpg

अब टिममा परिरहन उनका लागि चुनौती छ । जिम्बाब्बेमा असार ३ देखि २४ गतेसम्म विश्वकप छनोट प्रतियोगिता हुँदैछ । समूह ‘ए’ मा आयोजक राष्ट्र जिम्बाब्बेसँगै नेपाल, विश्वकप विजेता वेष्ट इन्डिज, नेदरल्यान्ड्स र अमेरिका छन् । समूह ‘बी’ मा श्रीलंका, आयरल्यान्ड, यूएई, स्कटल्यान्ड र ओमान छन् । असार ३ गते जिम्बाब्बेसँग खेल्दै विश्वकप छनोटको उद्घाटन गर्ने नेपालले त्यसपछि असार ५ गते अमेरिकासँग खेल्नेछ । असार ७ गते विश्वविजेता वेष्ट इन्डिजसँग खेल्ने नेपालले समूह चरणततर्फ आफ्नो अन्तिम खेल नेदरल्यान्ड्ससँग असार ९ गते खेल्नेछ । विश्वकप छनोटकै लागि नेपालले दक्षिण अफ्रिकामा अन्तिम अभ्यास सकाएर आइतबार जिम्बाब्बे पुगेको छ ।

gyanendra malla 11686562928.jpg

३२ वर्षीय ज्ञानेन्द्रले ३५ एकदिवसीय अन्तर्राष्ट्रिय खेल खेलेका छन् । जसमा ८५६ रन बनाउँदा उनले सात अर्धशतक पूरा गरेका छन् । ओडीआईमा नेपालबाट अर्धशतक बनाउने ज्ञानेन्द्र नै पहिलो खेलाडी हुन् । सन् २०१८ मा नेदरल्यान्ड्सविरुद्धको ऐतिहासिक ओडीआई खेलमा ज्ञानेन्द्रले अर्धशतक बनाएका थिए । त्यो खेलमा उनले ६१ बलमा आठ चौका प्रहार गर्दै ५१ रन बनाएर आउट भएका थिए । ओडीआईमा ज्ञानेन्द्रको उच्च रन ७५ रहेको छ । उनले नामिबियाविरुद्ध सन् २०२२ मा ७५ रन बनाएका थिए ।

यी पनि पढ्नुस्:

अर्को ऐतिहासिक सफलताको लडाइँमा कप्तान रोहित

समर्थककाे नारा तयार छ- 'सोमपाल कामी, क्या दामी'

मैदानमा बल र ब्याटले कौशल देखाइरहेका कुशल

विश्वकप छनाेट: विपक्षी टिमको नजरमा सन्दीप

प्रदर्शन सुधार्ने लक्ष्यमा कुशल

प्रकाशित मिति: सोमबार, जेठ २९, २०८० १५:२२