विश्वकप छनोटः ‘हिटरम्यान’ करणको प्रदर्शन कस्तो होला ?

A+ A A-

तीव्र गतिका बलर करण केसी नेपाली क्रिकेटका ‘गेम चेन्जर’ हुन् । उनै करणले नेपाललाई थुप्रै खेल जिताएका छन् । करण विश्वकप छनोटमा पनि केन्द्रमा छन् । उनी बल र ब्याटबाट विपक्षी टिमलाई हायल कायल बनाउन सक्ने प्रतिभावान् खेलाडी हुन् ।

सन् २०१८ फेब्रुअरी १४ मा भएको आईसीसी विश्व क्रिकेट लिग डिभिजन दुईमा क्यानाडाविरुद्धको खेलमा करणको ब्याटिङ त सबैलाई थाहा नै छ । टीयू क्रिकेट मैदानमा गत फेब्रुअरी १४ मै आईसीसी विश्वकप लिग टुअन्तर्गत नामिबियाविरुद्ध गरेको प्रदर्शन पनि कसैले भुल्न सकेका छैनन् । त्यसैले त करणलाई सबैले भन्दै आउने गरेका छन्, ‘भ्यालेन्टाइन डे ब्वाई ।’

त्यो खेलमा करणले उत्कृष्ट प्रदर्शन गर्दै क्यानडाविरुद्ध ३१ बलमा चार छक्का र तीन चौका प्रहार गर्दै अविजित ४२ रन बनाएका थिए । जुन खेलमा नेपाल एक विकेटले विजयी भएको थियो । त्यसपछि भने करणको उचाइ आकाशियो ।

करणलाई नचिन्नेहरूले पनि चिन्न थाले । जबजब नेपाल ब्याटिङमा होस् या बलिङमा, संकटमा परेको बेला करण आइपुग्छन् नेपाली टिम सम्हाल्न । यसै वर्षको नामिबियाविरुद्धको खेलमा पनि करणले पाँच विकेट लिए । ब्याटिङमा १२ बलमा अविजित २० रन बनाएपछि नेपालले नामिबियाविरुद्ध दुई विकेटको जित निकालेको थियो ।

karan kc1686832793.jpg

करण नेपालका राम्रा अलराउन्डर हुन् । उनी जति बलिङमा राम्रो गर्न सक्छन्, उति नै खुवी ब्याटिङमा पनि छ । एकदिवसीय अन्तर्राष्ट्रिय क्रिकेटमा नेदरल्यान्ड्सविरुद्धको ऐतिहासिक खेलमा उनले डेब्यु गरेका थिए ।

३१ वर्षीय करणले ओडीआईमा ४० खेल खेल्दै ६१ विकेट लिइसकेका छन् । उनले अहिलेसम्म तीन खेलमा ५–५ विकेट लिएका छन् । ओमानविरुद्ध दुई खेलमा ५–५ विकेट लिँदा नामिबियाविरुद्ध पनि उनले पाँच विकेट लिएका छन् । ब्याटिङतर्फ पनि करण जमेकै छन् । उनले २७ इनिङ्सबाट ३१४ रन बनाएका छन् । जसमा उनको उच्च रन ४२ छ ।

karan (2)1686833020.jpg

जिम्बाब्वेमा असार ३ देखि २४ गतेसम्म विश्वकप छनोट प्रतियोगिता हुँदै छ । समूह ‘ए’ मा आयोजक राष्ट्र जिम्बाब्वेसँगै नेपाल, विश्वकप विजेता वेस्ट इन्डिज, नेदरल्यान्ड्स र अमेरिका छन् । समूह ‘बी’ मा श्रीलंका, आयरल्यान्ड, यूएई, स्कटल्यान्ड र ओमान छन् । असार ३ गते जिम्बाब्वेसँग खेल्दै विश्वकप छनोटको उद्घाटन गर्ने नेपालले त्यसपछि असार ५ गते अमेरिकासँग खेल्नेछ । असार ७ गते विश्वविजेता वेस्ट इन्डिजसँग खेल्ने नेपालले समूह चरणतर्फ आफ्नो अन्तिम खेल नेदरल्यान्ड्ससँग असार ९ गते खेल्नेछ ।

यो पनि पढ्नुहोस्ः