एमालेले भन्यो- सरकारले सुरक्षा दिन नसके प्रचण्ड र गृहमन्त्रीको बाटो हेरेर बस्दैनौँ

एमालेले भन्यो- सरकारले सुरक्षा दिन नसके प्रचण्ड र गृहमन्त्रीको बाटो हेरेर बस्दैनौँ

A+ A A-

नेकपा एमालेले सरकारले शान्ति सुरक्षाको चुस्त व्यवस्थापन गर्न नसके मुलुकमा अराजकता आउने चेतावनी दिएको छ । शुक्रबार पार्टी मुख्यालयमा पत्रकार सम्मेलन गरी एमालेका उपमहासचिव विष्णु रिमालले सरकारले शान्ति सुरक्षाको प्रबन्ध गर्न सक्नुपर्ने बताए ।

सरकारले शान्ति सुरक्षा दिन नसके जनता र सम्बन्धित दलले आफ्नो सुरक्षा आफैँले गर्नुपर्ने अवस्था आउने रिमालले चेतावनी दिए । 'कसैले सुरक्षा दिन सक्दिँन भन्छ भने एमालेले आफूलाई सुरक्षित बनाउन सक्छ । त्यस्तो अवस्था आयो भने कस्तो स्थिति बन्ला ?' रिमालले प्रश्न गरे ।

पार्टी अध्यक्ष केपी ओलीमाथि आक्रमण भइरहेको भन्दै रिमालले सरकारले सुरक्षाको प्रत्याभूति दिलाउन नसकेको टिप्पणी गरे ।

त्यस्तै मुलुकमा आर्थिक संकट गहिरिँदै गएको टिप्पणी गर्दै रिमालले सरकारले कर्मचारीलाई तलब खुवाउन पनि नसक्ने अवस्था आएको टिप्पणी गरे ।

उनले आफूहरू सरकार फेर्ने खेलमा नरहेको भन्दै सरकारले गलत काम गरे भने चुप नबस्ने टिप्पणी गरे । 'हामी प्रमुख प्रतिपक्षी हौँ । जो जो सरकारमा हुनुहुन्छ उहाँहरूले चलाउनुहोस् । हाम्रो भनाइ यति मात्रै हो की बेठिक भएमा हामी चुप बस्दैनौँ,' रिमालले भने ।

कोशी नामकरणको सम्बन्धमा बोल्दै एमाले सचिव योगेश भट्टराईले प्रदेशको नामकरण गर्ने अधिकार प्रदेशसभाको भएको उल्लेख गरे । प्रदेशसभाले गरेको उक्त निर्णयको विरोध गर्न पाइने भए पनि त्यसको सीमा हुने टिप्पणी गरे ।

मधेश प्रदेशको नामकरणमा आफूहरूले विरोध गरेको भए पनि ढुंगामुढा गर्न भने नगएको भट्टराईले टिप्पणी गरे । प्रदेशको नामकरणमा सत्तारुढ माओवादी केन्द्रले दोहोरो चरित्र देखाएर आगोमा घिउ थपेको टिप्पणी गरे ।

प्रदेशको नामकरणका सम्बन्धमा मुख्यमन्त्री हिक्मत कार्कीले प्रचण्डलगायत शीर्ष नेताहरूसँग समन्वय गरेको र त्यसमा प्रचण्ड पनि सहमत भएको भट्टराईको दाबी छ । तर, आन्दोलन चर्किन थालेपछि माओवादी केन्द्र कोशी नामबाट पछाडी हटेर दोहोरो चरित्र देखाएको उनको टिप्पणी छ ।

नेता, जनप्रतिनिधि तथा आम नागरिकको सुरक्षा दिने पहिलो दायित्व सरकारको हुने उल्लेख गर्दै भट्टराईले आफूहरुले सुरक्षा हातमा लिन नचाहेको टिप्पणी गरे । 'हामी राज्य अथवा सरकारका संयन्त्रहरूलाई हातमा लिन चाहँदैनौँ । उनीहरूले काम गरुन् । सुरक्षा निकायले काम गरोस् । सरकारले राम्रोसँगले निर्देशन गरोस्,' भट्टराईले भने ।

'आज हामीले संसदमा पनि भन्यौँ कि प्रधानमन्त्री स्वयं आएर संसदलाई आश्वस्त गर्नुपर्‍यो । यो स्थिति के हो ? केपी ओलीमाथिको आक्रमण यो के हो ? के को संकेत हो ? प्रधानमन्त्रीले भन्नुपर्‍यो,' भट्टराईले भने, 'संसदमार्फत आम जनतालाई आस्वस्त गर्नुपर्‍यो । भएन भने प्रचण्डको बाटो हेरेर बस्दैनौँ नि हामी, गृहमन्त्रीको बाटो हेरेर बस्दैनौँ हामी ।'

संसदमा एमालेले पार्टी अध्यक्ष केपी ओलीमाथि भएको आक्रमणका बारेमा जवाफ मागेको टिप्पणी गरे ।

'हामीलाई थाहा छ नि हाम्रो सुरक्षा कसरी गर्नुपर्छ । हाम्रा नेताको सुरक्षा, नेता मात्रै होइन । एमालेको दायित्व त आम नागरिकको सुरक्षा गर्ने दायित्व हो । केपी ओलीको सुरक्षा गरिरहँदा हामी तीन करोड नेपालीको सुरक्षा कसरी गर्ने भन्ने दायित्व पनि हामी लिन्छौँ । खाली केपी ओलीको हामी केही नेताको सुरक्षाको कुरा मात्रै यहाँ छैन ।'

प्रकाशित मिति: शुक्रबार, वैशाख १५, २०८० १६:५३