स्वर्णिमको विश्लेषण- पुराना नेतृत्वप्रतिको वितृष्णा, नयाँको आशा र भरोसा

A+ A A-

जिल्ला समन्वय समिति तनहुँको भवनभित्र क्षेत्र नम्बर १ को मतगणना जारी छ । बाहिर सिमसिम पानीमा रुझ्दै शुभेच्छुकहरू मतपरिणामको प्रतीक्षामा छन् । कोही छाता ओढेर बसेका छन् । कोही पीपलको रुखमुनि ओत लागेका छन् । युवादेखि ज्येष्ठ नागरिकसम्म पुगेका छन्, मतपरिणाम सुन्न ।

‘घण्टीका समर्थक चौरमा छाता ओढेर मतपरिणाम सुन्न आउनुभएको हो,’ रास्वपा गण्डकी प्रदेशका महामन्त्री अशोक खड्काले भने, ‘महिलादेखि वृद्धवृद्धासम्मको उपस्थिति छ ।’ मतगणनास्थलमा कांग्रेस एमालेका शुभेच्छुक भने कमै देखिएका छन् । ‘कांग्रेस महामन्त्री गगन थापा र विश्वप्रकाश शर्माले यही ठाउँमा आएर चुनावी भाषण गर्नुभएको थियो । त्यो ठाउँमा सुनसान छ,’ खड्काले भने ।

chunab (2)1682324677.jpg

जब माइकबाट मतपरिणाम सार्वजनिक हुन्छ, घण्टीका समर्थक खुसी देखिन्छन् । ‘स्वर्णिम सरले जितेको हेर्न मतदाता आतुर हुनुहुन्छ,’ खड्काले भने । कांग्रेसको गढ भनेका वडाहरूबाट पनि ७० प्रतिशतसम्म मत स्वर्णिमलाई गएको देखिन्छ । करिब दोब्बर मतले अगाडि रहेका स्वर्णिमले जित्ने लगभग निश्चित भएको शुभेच्छुकहरूको दाबी छ ।

chunab (1)1682324677.jpg

निर्वाचन आयोगका प्रवक्ता शालिग्राम शर्माका अनुसार दिउँसो १ बजेसम्म ४० प्रतिशत मतगणना सकियो । अझै ६० प्रतिशत मतगणना हुन बाँकी छ । स्वर्णिमले १२ हजार ७०५ मत ल्याउदा कांग्रेसका गोविन्द भट्टराईले ७ हजार ६४७ मत ल्याएका छन् । तेस्रोमा एमालेका सर्वेन्द्र खनाल छन् । उनले ४ हजार २ सय १९ मत पाएका छन् ।

chunab (4)1682324678.jpg

र, स्वर्णिमलाई बधाई र शुभकामना दिन सुरु भएको छ । शुभेच्छुकहरूबाट स्वर्णिमको फोनमा घण्टी बजिरहेको छ । बधाई र शुभकामना दिनेलाई स्वर्णिम भनिरहेका छन्, ‘अन्तिम परिणाम कुरौँ ।’ तर, आफूले पाएको मत पुराना दल र नेतृत्वप्रतिको वितृष्णा भएको उनको विश्लेषण छ । मतगणना जारी रहँदा शिलापत्रसँग उनले भने, ‘यो प्रस्टै छ । पुराना नेतृत्वप्रतिको चरम वितृष्णा हो । नयाँ युवाको आशा र भरोसा हो ।’