युक्रेन नेटोमा आबद्ध हुन सक्ने नेटो प्रमुखको अभिव्यक्तिपछि युद्ध झनै भीषण हुने संकेत (भिडियो)

युक्रेन नेटोमा आबद्ध हुन सक्ने नेटो प्रमुखको अभिव्यक्तिपछि युद्ध झनै भीषण हुने संकेत (भिडियो)

A+ A A-

रुस र युक्रेनबीच लगातार १४ महिनायता युद्ध जारी छ । सैन्य संख्या र हतियार क्षमतालाई आधार मान्दा केही महिनामै युक्रेन रुसको कब्जामा जाने अनुमान थियो तर त्यसो हुन सकेन ।

हालसम्म पनि रुसलाई युक्रेनले कडा प्रतिकार गरिरहेको छ । यस युद्धमा दुवैतर्फका ३ लाख ५४ हजार सैनिकको ज्यान गइसकेको अमेरिकी रक्षा विभागले जनाएको छ । मृतकमध्ये २ लाख ३० हजार सेना रुसका हुन् । यस युद्धमा युक्रेनतर्फ कति आर्थिक क्षति भयो भनेर अनुमान गर्न सकिने अवस्था छैन ।

अमेरिकासहित पश्चिमा राष्ट्रहरूले लगातार शक्तिशाली हतियारहरू सहयोग गरिरहँदा युक्रेनले रुसलाई विभिन्न क्षेत्रमा विफल बनाइरहेको छ । रुसी सेनाले नियन्त्रण गरेको कैयौँ क्षेत्रहरू पनि अहिले युक्रेनले फिर्ता गरिसकेको छ । यसअघि ७० प्रतिशत युक्रेनी भूभाग रुसी कब्जामा गएको थियो ।

भिडियो

तर युक्रेनी सेनाले लगातार प्रतिकार गर्दा रुसले अहिले २० देखि २५ प्रतिशत युक्रेनी भूभाग मात्र नियन्त्रणमा लिन सकेको छ ।

पछिल्लो समय रुस र युक्रेनबीच बाख्मुतमा भीषण युद्ध भइरहेको छ । रुसले भाडाका लडाकु वाग्नर समूहको साथमा बाख्मुतको ७५ प्रतिशत भूभाग कब्जा गरिसकेको छ । रुसी सेनाको मिसाइलबाट बाख्मुत लगभग पूरै खरानीमा परिणत भएको देख्न सकिन्छ ।

शनिबार मात्र डोनेट्स्कको बाख्मुत क्षेत्रका ३ जिल्ला रुसको कब्जामा गएको रोयटर्सले उल्लेख गरेको छ । युक्रेनी सेनाले सार्वजनिक गरेको भिडियोमा बाख्मुतका भवनहरू ध्वस्त भएको देख्न सकिन्छ ।

गतहप्ता मात्र उत्तर एट्लान्टिक सन्धि सङ्गठन नेटोका प्रमुख जेन्स स्टोल्टनबर्ग युक्रेन पुगेका थिए । उनले सो क्रममा युक्रेन नेटोमा आबद्ध हुन सम्भव भएको अभिव्यक्ति दिएका थिए ।

युक्रेनका राष्ट्रपति भोलोदिमिर जेलेन्स्कीले आफूहरूलाई चाँडै नेटोमा आबद्ध गराउन आग्रह गरेपछि स्टोल्टनबर्गले भनेका छन्, ‘युक्रेनको सही स्थान नेटो नै हो । समयसँगै हाम्रो समर्थनमा यो सम्भव हुनेछ ।’

युक्रेनले नेटोमा आबद्ध हुने मनसाय बनाएपछि नै रुसले युक्रेनमा आक्रमण थालेको थियो । यतिबेला नेटोकै प्रमुखले युक्रेनलाई सो सन्धि संगठनमा स्थान दिने बताएपछि रुसले झनै भीषण आक्रमण गर्ने अनुमान छ । नेटोमा अमेरिकासहित ३१ देश आबद्ध छन् । यो संगठनले आफ्ना सदस्य राष्ट्रमा हुने कुनैपनि आक्रमणको एकसाथ प्रतिकार गर्ने वाचा गरेका छन् ।

सोभियत संघको पतनपछि सन् १९९१ मा युक्रेन रुसबाट अलग भएको थियो । त्यसयता युक्रेनले पश्चिमा राष्ट्रसँग लगातार सम्बन्ध बढाएको छ, जुन रुस रुचाउँदैन ।

युक्रेन अमेरिकाआबद्ध सैन्य गठबन्धन नेटोमा आबद्ध हुन खोजेपछि रुसले क्रुद्ध हुँदै युक्रेनमाथि आक्रमण थालेको हो । रुसले अमेरिकालगायत अन्य युरोपेली राष्ट्रलाई युक्रेनलाई नेटोमा आबद्ध नगराउन आग्रह गरेको थियो । रुसी राष्ट्रपति भ्लादमिर पुटिनले बारम्बार युक्रेनलाई कहिल्यै सो संगठनको सदस्य बन्न नदिने ग्यारेन्टी गर्नुपर्ने बताएका थिए । तर, अमेरिकाले रुसी मागको अस्वीकार गरेको थियो ।

शीतयुद्धको अन्त्यमा नेटोले पूर्वतर्फ विस्तारका गतिविधि नगर्ने मौखिक प्रतिबद्धताहरू तोडेर रुसलाई धोका दिएको मस्कोको आरोप छ । तर, नेटोले त्यस्ता प्रतिबद्धता भएको विषय स्वीकार गर्दैन ।

प्रकाशित मिति: आइतबार, वैशाख १०, २०८० १३:४७