तीन दिनमै लाइसेन्स दिने उपप्रधानमन्त्री श्रेष्ठको घोषणा, मिथिलाञ्चलमा छठको रौनक (भिडियो)

तीन दिनमै लाइसेन्स दिने उपप्रधानमन्त्री श्रेष्ठको घोषणा, मिथिलाञ्चलमा छठको रौनक (भिडियो)

A+ A A-

सोमबार सभामुख देवराज घिमिरेले प्रधानमन्त्री पुष्पकमल दाहाल 'प्रचण्ड'सँग भेटवार्ता गरेका छन् । प्रधानमन्त्री निवास बालुवाटारमा प्रचण्ड र घिमिरेबीच भेटवार्ता भएको हो । सभामुखको अधिकारमा अंकुश लगाउन खोजिएको चर्चा चलिरहेका बेला यो भेटवार्ता भएको हो ।

उपप्रधानमन्त्री एवं भौतिक पूर्वाधार तथा यातायातमन्त्री नारायणकाजी श्रेष्ठले सवारी अनुमतिपत्र (लाइसेन्स) को पर्खाइमा बसेका सवारीचालकले तीन दिनमा पाउने बताएका छन् । अबको ८ महिनापछि सवारीचालकले सहज रूपमा ट्रायल दिएको तीन दिनमा लाइसेन्स पाउने बताए । सरकारले नयाँ प्रिन्टिङ मेसिन खरिद गरेर लाइसेन्स वितरणलाई प्रभावकारी बनाउन लागेको श्रेष्ठको भनाइ छ ।

त्यस्तै, बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग ऐन संशोधनका लागि पेस गरिएको विधेयक त्रुटिपूर्ण रहेको भन्दै पीडित र मानवअधिकारवादी संस्थाहरूले आपत्ति जनाएका छन् । सरकारले ३ चैतमा ऐनलाई तेस्रो संशोधन गर्न बनेको विधेयक संसदमा दर्ता गरेको छ । विधेयकका कतिपय व्यवस्थामा गम्भीर त्रुटि रहेको र जस्ताको त्यस्तै अघि बढे संक्रमणकालीन न्याय जटिल बन्ने र अन्तर्राष्ट्रियकरण हुने चेतावनीसमेत दिएका छन् ।

उता, तराईमा चैती छठ पर्व धुमधामका साथ मनाइएको छ । छठ पर्वको अवसरमा जनकपुरका विभन्न पोखरी तथा सरोवरहरूको डिलमा भक्तजनहरूको भिड लागेको छ । छठ पूजाका लागि व्रत वस्ने व्रतालु महिलाले सोमबार अस्ताउँदो सूर्यको अर्घ दिएका छन् । मंलगबार बिहान उदाउँदो सूर्यलाई अर्घ दिई यो पर्व विधिवत् रूपमा समपन्न हुनेछ ।

त्यस्तै, राष्ट्रिय स्वतन्त्र पार्टी साविकको मन्त्रालय पाए सरकारमा जाने भएको छ । गत १० पुसमा गठबन्धन बन्दा रास्वपाले गृह, शिक्षा, विज्ञान तथा प्रविधि, श्रम, रोजगार तथा सामाजिक सुरक्षा र स्वास्थ्य राज्यमन्त्री पाएको थियो । साविककै मन्त्रालय पाए मात्र रास्वपा सरकारमा सहभागी हुने प्रवक्ता डा. मुकुल ढकालले बताए ।

मधेशकेन्द्रित चार राजनीतिक दलहरूले लोकतान्त्रिक मधेशी मोर्चा गठन गरेका छन् । तराई–मधेश लोकतान्त्रिक पार्टी, नेपाल सद्भावना पार्टी, ऐतिहासिक जनता पार्टी र राष्ट्रिय सद्भावना पार्टीले कार्यगत एकता गर्दै लोकतान्त्रिक मधेशी मोर्चा गठन गरेका हुन् । सोमबार जनकपुरमा पत्रकार सम्मेलन गरी ११ बुँदे साझा अवधारणापत्र सार्वजनिक गर्दै मोर्चा घोषणा गरिएको हो ।

म्यान्मारको सैन्य सरकारका प्रमुख जनरल मिन अङ लाइङले सैनिक शासनको विरोध गर्नेहरूलाई आतंकवादी करार गरिदिएका छन् । सेनाको वार्षिक सैन्य परेडमा उनले सैन्य सरकारको विरोध गर्नेहरूलाई दमन गरेर सकाइदिने चेतावनी दिएका छन् । म्यान्मारमा मानवअधिकारको अवस्थाबारे प्रश्न उठाउने देशहरूलाई पनि लाइङले आतंकवादीको समर्थक पनि भनेका छन् ।

ओलम्पिकअन्तर्गत महिला फुटबलको एसियाली छनोटको पहिलो चरणमा नेपालले भियतनामसँग दशरथ रंगशालामा खेल्ने भएको छ । आयोजक नेपालसँगै समूह ‘सी’ मा भियतनाम, अफगानिस्तान र प्यालेस्टाइन रहेका थिए । तर, अफगानिस्तान र प्यालेस्टाइनले नखेल्ने भएपछि यो समूहमा नेपाल र भियतनाम मात्रै भएको हो ।

प्रकाशित मिति: सोमबार, चैत १३, २०७९ १९:४५