मधेशकेन्द्रित चार दलले बनाए मोर्चा

A+ A A-

मधेशकेन्द्रित चार राजनीतिक दलहरूले लोकतान्त्रिक मधेशी मोर्चा गठन गरेका छन् । तराई–मधेश लोकतान्त्रिक पार्टी, नेपाल सद्भावना पार्टी, ऐतिहासिक जनता पार्टी र राष्ट्रिय सद्भावना पार्टीले कार्यगत एकता गर्दै लोकतान्त्रिक मधेशी मोर्चा गठन गरेका हुन् ।

सोमबार जनकपुरमा पत्रकार सम्मेलन गरी ११ बुँदे साझा अवधारणापत्र सार्वजनिक गर्दै मोर्चा घोषणा गरिएको हो । मधेशकेन्द्रित अरु दलले मधेशको मुद्दा छोडोर सत्ता स्वार्थमा लागेकोले मधेशीको मुद्दा अगाडि बढाउन मोर्चा गठन गरिएको तराई–मधेश लोकतान्त्रिक पार्टीका अध्यक्ष वृषेशचन्द्र लालले बताए । मोर्चाले मधेश आन्दोलनका मुद्दामा केन्द्रित रहेर सामसामयिक विषयहरूमा मधेशको सही प्रतिनिधित्व गर्ने लालको दाबी छ ।

अहिलेको निर्वाचन प्रणालीमा विकृतिहरू देखिएको उल्लेख गर्दै लालले स्थानीय तहको निर्वाचन गैरदलीय र प्रदेशसभा र संघीय संसदको निर्वाचनमा पूर्ण समानुपातिक निर्वाचन पद्दति अपनाउनुपर्ने बताए ।

नेपाल सद्भावना पार्टीका अध्यक्ष रामकुमार महतोले ओझेलमा पारिएका मधेशको मुद्दाहरूलाई अगाडि बढाउन लोकतान्त्रिक शक्तिहरू एकजुट भएर अगाडि बढ्ने बताए ।

मोर्चाले सार्वजनिक गरेको आवधारणापत्रमा लोकतन्त्रप्रति प्रतिबद्धता व्यक्त गर्दै विभिन्न षड्यन्त्र र कुटिल अभ्यासहरूबाट लोकतन्त्रमाथि भइरहेको प्रहारविरुद्ध मधेशी मोर्चाले लोकतान्त्रिक शक्तिहरूबीच एकजुटताको निमित्त पहल गर्ने भनिएको छ ।

मोर्चाले पहिचानमा आधारित रही प्रदेशहरूको सीमांकन, समानुपातिक समावेशिता, पूर्ण समानुपातिक प्रतिनिधित्व, भाषा र संस्कृतिको विशिष्टताको सम्मान, स्थानीय र प्रादेशिकतर्फको संघीय संसदको सदन राष्ट्रियसभामा जनसंख्यामा आधारित प्रतिनिधित्व तथा संघीय संसदीय अभ्यासमा राष्ट्रियसभाको समान भूमिकालगायतका विषयमा संविधान संशोधनको माग गरेको छ ।

मोर्चाले समावेशिताको सिद्धान्तको मर्मअनुसार वर्तमान संविधानको संशोधन गरी समानुपातिक समावेशिताको अभ्यासलाई न्यायोचित र सहज बनाउनुपर्ने, लाल आयोगको प्रतिवेदन सार्वजनिक गरी युवाहरूलाई स्वदेशमा रोजगारिको व्यवस्थासहितका विषय अवधारणा पत्रमा समावेश गरिएको छ ।

प्रकाशित मिति: सोमबार, चैत १३, २०७९ १७:४९