बागमतीमा कांग्रेस नेतृत्वमा सरकार बन्न सक्छ ?

A+ A A-

संघीय सरकारका प्रधानमन्त्री पुष्पकमल दाहाल प्रचण्डले विश्वासको मत लिनुअघि नै बागमती प्रदेश सरकारले नयाँ मुख्यमन्त्री पाउने भएको छ । पाँच दिनको समय दिएर बागमती प्रदेशका प्रदेश प्रमुख यादवचन्द्र शर्माले मुख्यमन्त्रीका लागि बहुमतसहितको दाबी पेस गर्न आह्वान गरे ।

बागमती प्रदेशमा २५ पुस अपराह्न ४ बजेभित्रै दाबी पेस गर्नुपर्नेछ । बागमतीको मुख्यमन्त्रीका लागि सत्ता गठबन्धनमा सहमति जुटेको छैन । केन्द्रमा हुने सहमतिअनुसार नै मुख्यमन्त्री कुन दलले पाउने भन्ने टुंगो लाग्ने नेताहरूले बताउँदै आएका थिए । प्रधानमन्त्री प्रचण्डले २६ पुसमा विश्वासको मत लिँदैछन् ।

११० सदस्यीय बागमती प्रदेशसभामाको ठूलो दल कांग्रेस हो । ऊसँग ३७ सिट छ । एमालेसँग २७ सिट छ । माओवादीसँग २१, राप्रपासँग १३, एकीकृत समाजवादीसँग ७, नेमकिपासँग ३, हाम्रो नेपाल पार्टी र नेसपासँग एक–एक सिट छ । यो प्रदेशमा राप्रपाले मुख्यमन्त्री दाबी गरिरहेको छ ।

सरकार बनाउन ५५ सिट चाहिनेमा वर्तमान सत्ता गठबन्धनसँग ६१ सिट पुग्छ । तर, राप्रपालाई विश्वासमा लिने हो भने र एकीकृत समाजवादीको समर्थन कायम गर्ने हो भने कांग्रेससँग ५७ सिट पुग्छ । यसो भएमा कांग्रेसले सरकार बनाउन सक्छ ।

संघीय सरकारले शुक्रबार साझा नीति तथा कार्यक्रम ल्याउँदैछ । ‘हाम्रा मागहरू छन् । ती मागहरू नीति कार्यक्रममा परे भने सरकारमा जान्छौँ । त्यसका आधारमा प्रदेशको समीकरण बन्छ,’ राप्रपाका प्रवक्ता सगुन लावतीले शिलापत्रसँग भने । संघीय सरकारमा सहभागी भए प्याकेज डिलमै सहमति हुने उनले जानकारी दिए । पार्टीले मुख्यमन्त्री दाबी गरे पनि सहमतिका आधारमा प्रदेशमा के गर्ने भन्ने तय गर्ने उनले बताए ।

प्रदेशको ठूलो दल कांग्रेसले आफ्नो नेतृत्वमा सरकार गठनको पहल थालेको छ । प्रदेश संसदीय दलका नेता बहादुरसिंह लामा मुख्यमन्त्री बन्ने लबिङमा छन् । ‘शुक्रबार पार्टीमा छलफल गर्छौं । त्यसपछि सबै दलहरूसँग छलफल हुन्छ । म प्रदेश सरकारको नेतृत्व लिने प्रयासमा छु,’ लामाले शिलापत्रसँग भने ।

संघीय सरकारलाई समर्थन गर्ने/नगर्ने निर्णय नगरेको एकीकृत समाजवादीले पनि प्रदेशमा के गर्ने भन्ने निर्णय गरिसकेको छैन । ‘२४ गतेसम्म समय छ । हामीसँग सरकार बनाउने ठूलो शक्ति छैन । संघको समीकरणका आधारमा प्रदेशमा समीकरण बन्छ । हामी पर्ख र हेरको अवस्थामा छौँ,’ एकीकृत समाजवादीका प्रवक्ता जगन्नाथ खतिवडाले शिलापत्रसँग भने ।

प्रकाशित मिति: बिहीबार, पुस २१, २०७९ १९:३१